Pangungkapon
5 Huida ma di tangan ni Ibana na hundul di habangsa i sada gulungan. Hona surat do gulungan i di luar dohot di bagasan jala disegel do i dohot pitu segel. 2 Dung i huida ma sada suru-suruan na gogo jala didok ibana ma gogo, “Ise do na patut mambungka gulungan i dohot mambungka segelna i?” 3 Alai ndang adong manang ise pe na di banua ginjang, manang na di tano on, manang na di toru ni tano, na boi mambungka gulungan i manang na mangida tu bagasan. 4 Gabe tumatangis ma ahu, ala ndang adong na tama mambungka gulungan i manang na mangida tu bagasan. 5 Alai didok sahalak sian angka sintua i ma tu ahu, “Unang be tumatangis ho. Ida ma! Adong do Singa na sian marga Juda, na sian keluarga ni si Daud naung monang. Ibana ma na boi mambungka gulungan i dohot pitu segelna i.”
6 Dung i huida ma sada anak ni biru-biru jongjong jonok tu habangsa i, di tonga-tonga ni opat kerubim i dohot angka sintua i. Songon naung hona bunu do anak ni biru-biru i. Adong do pitu tandukna jala pitu matana. Pitu matana i manggombarhon pitu tondi parbadia ni Debata na disuru tu tano on. 7 Ro ma anak ni biru-biru i, dijalo ma gulungan i sian tangan siamun ni Ibana na hundul di habangsa i. 8 Tingki dijalo Anak ni Biru-biru i gulungan i, marsinggang ma opat kerubim i dohot 24 sintua i di jolona. Ganup angka sintua i maniop harpa dohot mangkuk na sian mas na marisi gok daupa. (Daupa manggombarhon tangiang ni angka na badia.) 9 Jala diendehon nasida ma sada ende na imbaru. Ninna ma, “Tama do ho manjalo gulungan i dohot mambungka segelna. Ai nunga hona bunu ho jala marhite mudarmu nunga ditobus* ho angka jolma tu Debata sian saluhut marga, bahasa dohot bangso. 10 Nunga dibahen ho nasida gabe raja dohot malim tu Debatanta, jala mamarenta do nasida tu saluhut tano on.”
11 Dung i huida jala hubege ma soara ni godang suru-suruan di humaliang ni habangsa i, angka kerubim i dohot angka sintua i. Godang ni nasida marpulu ribu hali marpulu ribu* jala marribu hali marribu. 12 Jala gogo ma didok nasida, “Tama do Anak ni Biru-biru naung hea dibunu i manjalo huaso, hamoraon, bisuk, gogo, hasangapon, hamuliaon, dohot pasu-pasu.”
13 Dung i hubege ma angka tompaan na adong di banua ginjang, di tano on, di toru ni tano, di laut dohot saluhut isina mandok, “Puji-pujian, hasangapon, hamuliaon, dohot hagogoon saleleng ni lelengna ma di Ibana na hundul di habangsa i dohot di Anak ni Biru-biru i.” 14 Didok opat kerubim i ma, “Amen!” Marsinggang ma angka sintua i jala marsomba.