1 Korint

10 Hamu angka dongan, naeng ma nian ninna rohangku botoonmuna, molo angka ompunta najolo dilinggomi ombun do nasida mardalan, jala sude do nasida mamolus sian laut. 2 Sude do nasida tardidi gabe angka na mangihuthon si Musa, tingki mardalan nasida dilinggomi ombun jala mamolus sian laut. 3 Jala sude do nasida mangallang sipanganon na nilehon ni Debata, 4 jala sude do nasida manginum aek na pinarade ni Debata. Ai diinum nasida do aek na sian dolok batu na rap dohot nasida, i ma dolok batu na nilehon ni Debata jala dolok batu i manggombarhon Kristus.* 5 Alai godang do sian nasida na so dihalomohon Debata, gabe marmatean ma nasida di padang pasir* i.

6 Gabe sipasingot ma i tu hita, asa unang lomo rohanta tu angka hajahaton songon na dihalomohon ni nasida. 7 Asing ni i, unang ma tasomba gana-ganaan songon na niulahon ni deba sian nasida. Ai adong do tarsurat, “Mangan minum do nasida jala marsonang-sonang.” 8 Unang ma taulahon seks na so patut,* songon na niulahon ni nasida. Ai gabe mate do 23.000 halak di bagasan sadari alani i. 9 Unang ma taunjuni* Jahowa songon na niulahon ni deba sian nasida. Ai gabe mate do nasida diturbing ulok. 10 Unang ma hita marungut-ungut songon na niulahon ni deba sian nasida. Ai ujungna, gabe dibunu suru-suruan do nasida. 11 Sude na masa i gabe sipasingot do i tu hita. Jala disurat do i gabe parsiajaran tu hita angka na mangolu di panutup ni jaman on.*

12 Manang ise na mandok, “Hot do ahu jongjong,” manat ma ibana asa unang madabu. 13 Sude ela-ela* na masa tu hamu, angka ela-ela na somal do i. Alai haposan do Debata. Ndang pasombuonna hamu diela-ela lobi sian na tolapmuna. Jala molo adong ela-ela, patuduonna do tu hamu dalan asa boi sabar hamu manaon i.

14 Alani i ale angka dongan na hinaholongan, pasiding hamu ma* ulaon manomba gana-ganaan. 15 Huhatahon do i tu hamu songon tu halak na marbisuk. Hamu sandiri ma na manontuhon tutu manang na ndang na hudok i. 16 Nda manggombarhon mudar ni Kristus do mangkuk pasu-pasu i, na tapangke tingki hita mandok mauliate tu Debata? Nda manggombarhon daging ni Kristus do roti na tabagi-bagi i? 17 Holan sada do roti na taallang. Alani i, nang pe godang hita, sada daging do hita sude.

18 Parrohahon hamu ma halak Israel:* Nda songon na mangan rap dohot Debata do halak na mangallang pelean di langgatan i? 19 Aha do na hudok disi? Na ringkot do sipanganon na pinelehon tu gana-ganaan i? Manang, na ringkot do gana-ganaan i? 20 Ndang. Alai, na hudok, tu angka suru-suruan na jahat do dipelehon angka bangso peleanna i, ndang tu Debata. Jala ndang lomo rohangku rap mangan hamu dohot angka suru-suruan na jahat. 21 Ndang boi hamu minum sian mangkuk ni Jahowa jala laos minum sian mangkuk ni suru-suruan na jahat. Ndang boi hamu rap mangan di “meja ni Jahowa” jala laos rap mangan di meja ni suru-suruan na jahat. 22 Manang na naeng bahenonta do Jahowa muruk? Ai gumogo hita sian Ibana?

23 Boi* do sude taulahon, alai ndang sude i marlaba. Sude do boi taulahon, alai ndang sude patoguhon roha. 24 Ingkon pingkirhonon ni ganup halak do na ringkot tu halak na asing, unang ma holan na ringkot di dirina sandiri.

25 Boi do allangon sude jagal na digadis di pasar, jala ndang pola porlu sungkun-sungkun hamu alani panggora ni rohamuna. 26 Ai “Jahowa do nampuna portibi on dohot sude na di bagasanna.” 27 Molo ditogihon halak na so porsea hamu mangan jala nunga dioloi hamu i, allang hamu ma sipanganon na pinaradena i. Ndang pola porlu sungkun-sungkun hamu alani panggora ni rohamuna. 28 Alai molo adong halak na mandok tu hamu, “Nunga dipelehon sipanganon i tu gana-ganaan”, unang ma allang sipanganon i alani halak na paboahon i dohot alani panggora ni rohamuna. 29 Na hudok disi, ndang panggora ni rohamuna, alai panggora ni roha ni halak na paboahon i do. Ai nang pe marhak ahu mangulahon manang aha pe, alai ndang olo ahu diuhumi alani panggora ni roha ni halak na asing. 30 Molo diinsahi halak do ahu mangallang sipanganon naung hudok mauliate tu Debata, sintong dope allangonku i?

31 Alani i, manang aha pe na dipangan hamu, diinum hamu, manang diulahon hamu, ulahon hamu ma i saluhutna laho pasangaphon Debata. 32 Unang ma gabe tartuktuk halak Jahudi, halak Junani, dohot huria ni Debata alani hamu. 33 Alani i ulahon hamu ma songon na hubahen i. Marsitutu do ahu mambahen las roha ni halak di sude na huulahon. Ndang holan na ringkot di ahu na hupingkiri alai dohot do na ringkot di halak na asing asa boi nasida malua.