Pangungkapon

20 Dung i huida ma sada suru-suruan turun sian banua ginjang. Ditiop ibana do kunci ni lombang na mansai bagas dohot sada rante na balga. 2 Ditangkup ibana ma naga i, ulok na parjolo i, i ma Sibolis dohot Setan* jala dirante saleleng 1.000 taon. 3 Dung i disampathon ibana ma naga i tu lombang na mansai bagas i. Ditutup ma i jala disegel, asa unang dililuhon angka bangso saleleng so marujung 1.000 taon i. Dung salpu i, dipalua ma ibana satongkin.

4 Dung i huida ma angka habangsa, jala dilehon do huaso tu angka halak na hundul disi laho manguhumi. Laos huida ma angka jolma na hona bunu* ala paboahon taringot tu Jesus dohot taringot tu Debata, angka halak na so manomba binatang buas i manang patungna, dohot angka halak na so manjalo tanda di pardompahan dohot di tangan ni nasida. Mulak mangolu ma nasida jala mamarenta gabe raja rap dohot Kristus saleleng 1.000 taon. 5 On ma haheheon na parjolo. (Angka na mate na asing, ndang dipahehe sahat tu na marujung 1.000 taon i.) 6 Marlas ni roha jala badia ma angka halak na dohot tu haheheon na parjolo. Ndang marhuaso be hamatean na paduahon tu nasida. Alai gabe angka malim ni Debata dohot angka malim ni Kristus ma nasida. Mamarenta ma nasida gabe raja rap dohot Kristus saleleng 1.000 taon.

7 Dung salpu 1.000 taon i, dipalua ma Sibolis* sian penjara. 8 Dung i laho ma ibana mangaliluhon angka bangso na di opat ujung ni tano on, i ma Gog dohot Magog. Dipapungu ma nasida laho marporang jala songon pasir di laut do godang ni nasida. 9 Laho ma nasida tu saluhut tano on jala dihaliangi nasida ma kemah ni angka na badia i dohot kota na hinaholongan i. Alai turun ma api sian banua ginjang manutung nasida. 10 Jala disampathon ma Sibolis na mangaliluhon nasida tu laut api na mardongan barerang. Disi do binatang buas dohot panurirang na mangkatahon na so tutu* i. Uhumonna* ma nasida disi arian nang borngin saleleng ni lelengna.

11 Dung i huida ma sada habangsa na bontar na balga dohot Ibana na hundul disi. Salpu do sian jolona langit dohot tano on jala ndang adong be angka i. 12 Huida ma angka na mate, na sangap dohot na lea jongjong di jolo ni habangsa i jala dibungka ma angka gulungan i. Alai dibungka ma gulungan na asing, i ma buku hangoluan. Mangihuthon angka na tarsurat di buku i, diuhumi ma angka na mate i hombar tu parniulaon ni nasida. 13 Dilehon laut ma angka na mate na adong di bagasanna. Dilehon hamatean dohot Kuburan* ma angka na mate na adong di bagasanna. Jala diuhumi ma nasida ganup marsada-sada hombar tu parniulaon ni nasida. 14 Disampathon ma hamatean dohot Kuburan* i tu laut api. Laut api i manggombarhon hamatean na paduahon. 15 Asing ni i, manang ise na so tarsurat goarna di buku hangoluan i, disampathon ma ibana tu laut api i.