Ulaon ni Apostel
24 Dung lima ari, ro ma sintua ni malim Ananias rap dohot manang na piga pangituai dohot sahalak pengacara na margoar si Tertullus tu Kaesarea. Dung i dialuhon nasida ma si Paulus tu gubernur i. 2 Dijou ma si Tertullus, dung i mulai ma mangkatai ibana laho manudu si Paulus, ninna ma,
“Gubernur Feliks na huparsangapi hami, dihilala hami do hadameon dohot angka hamubaon na denggan na binahenmu tu bangso on. 3 Alani sudena i, mandok mauliate ma hami manang sadihari pe jala manang didia pe hami. 4 Asa unang magodanghu habis tingki ni damang, hupangido ma jolo asa tangihon hami satongkin. 5 Tangkas do huida hami sibahen hagunturon do baoa on. Gaor do dibahen ibana sude halak Jahudi di saluhut portibi on. Jala ibana do pamimpin ni sekte ni halak Nasaret. 6 Dohot do muse bagas joro naeng ramunanna, gabe hutangkup hami ma ibana. 7 *—— 8 Molo disungkun damang ibana, botoonmu ma na sintong do sude na hudok hami on taringot tu ibana.”
9 Dohot ma angka halak Jahudi mandok songon i, patuduhon na sintong do sude na pinatorang ni si Tertullus i. 10 Dibahen gubernur i ma tanda asa mangkatai si Paulus, dung i ninna ma,
“Huboto do, nunga martaon-taon damang gabe hakim ni bangso on. Alani i las do rohangku paboahon alushu tu damang. 11 Boi do patangkasonmu, ndang salpu dope 12 ari dung laho ahu tu Jerusalem manomba Debata. 12 Jala ndang hea diida nasida ahu marsoal dohot manang ise pe di bagas joro. Manang mambahen hagunturon di angka sinagoga* dohot di inganan na asing di kota i. 13 Jala ndang tarpatudu ni nasida tu damang na sintong na nidok ni nasida taringot tu ahu. 14 Alai huakkui ma tu damang, taringot tu sekte na nidok ni nasida i, huihuthon do i laho marhobas tu Debata ni angka ompungku. Ai porsea do ahu tu sude Patik i dohot tu na Sinurat ni Angka Panurirang. 15 Dos songon nasida, mangkirim do ahu tu Debata, na adong do haheheon tu halak na burju dohot halak na jahat. 16 Alani i, sai marsitutu do ahu asa ias panggora ni rohangku di adopan ni Debata dohot di adopan ni jolma. 17 Alai dung salpu manang na piga taon, ro do ahu tu Jerusalem mamboan hepeng laho mangurupi bangsongku dohot pasahathon pelean tu Debata. 18 Tingki huulahon i, diida nasida do ahu mambahen ulaon paiashon diri di bagas joro. Jala ndang torop huboan donganku manang hubahen hagunturon. Alai, adong do disi manang na piga halak Jahudi na sian Provinsi Asia. 19 Molo adong parsoalan ni nasida tu ahu, nasida ma nian na ro tu adopanmu laho mangaluhon ahu. 20 Manang suru ma halak on paboahon hasalaanku na dapot ni nasida tingki diuhumi ahu di jolo ni Sanhedrin.* 21 Molo tung pe aluhonon ni nasida ahu holan alani hata on do, i ma tingki hudok di jolo ni nasida, ‘Na huhaporseai do haheheon ni halak na mate umbahen na diuhumi ahu!’”
22 Godang do diboto si Feliks taringot tu Dalan ni Tuan i. Dipaso ibana ma pengadilan i, ninna ma, “Jolo ro ma si Lisias komandan ni tentara i asa huputushon parsoalanmuna on.” 23 Dung i disuru ibana ma perwira na manjaga i asa tongtong ditahan si Paulus, alai ndang songon na parjolo i be dibahen tu ibana. Diloas do angka donganna mangalehon angka na porlu di ibana.
24 Dung manang na piga ari, ro ma si Feliks dohot si Drusila tunggane boruna halak Jahudi i. Disuru ibana ma asa dijou si Paulus. Dung i ditangihon ibana ma si Paulus paboahon haporseaonna taringot tu Kristus Jesus. 25 Alai tingki dipatorang si Paulus taringot tu marpangalaho na denggan, mangarajai diri dohot ari panguhuman di ari na naeng ro, gabe mabiar ma si Feliks, jala didok ma, “Antong, songon i ma jolo! Molo adong tingki na denggan, husuru pe dijou ho muse.” 26 Laos di tingki i dihirim rohana do asa lehonon ni si Paulus hepeng tu ibana. Alani i, lam jotjot ma dijou ibana si Paulus laho mangkata-hatai dohot ibana. 27 Alai dung salpu dua taon, si Perkius Festus ma na manggantihon si Feliks. Ala naeng mambuat roha ni halak Jahudi, dipasombu si Feliks do si Paulus tongtong di hurungan.