Johannes
20 Di ari parjolo di minggu i, tingki manogot dope, ro ma si Maria Magdalena tu kuburan i. Diida ibana ma nunga guling batu na manutup kuburan i. 2 Dung i marlojong ma ibana mandapothon si Simon Petrus dohot sisean na asing na hinaholongan ni Jesus. Ninna ma tu nasida, “Nunga dibuat halak Tuan sian kuburan i jala ndang huboto hami didia dipeakkon nasida ibana.”
3 Dung i, laho ma si Petrus dohot sisean na asing i tu kuburan. 4 Rap marlojong do nasida na dua, alai humatop do sisean na asing i sian si Petrus, gabe parjolo ma ibana sahat tu kuburan. 5 Unduk ma ibana laho mangida tu bagasan kuburan i. Diida ibana ma peak abit linen i disi, alai ndang masuk ibana tu bagasan. 6 Di pudina, ro ma si Simon Petrus jala masuk ma ibana tu kuburan i. Diida ibana ma peak abit linen disi. 7 Abit na mangalilit ulu ni Jesus ndang peak be rap dohot abit na mambungkus daging ni Jesus, alai nunga gulung i jala peak di inganan na asing. 8 Masuk ma muse sisean na asing na parjolo sahat tu kuburan i. Dung diida ibana, gabe porsea ma ibana. 9 Ai ndang diantusi nasida dope ayat na mandok na ingkon hehe Jesus sian na mate. 10 Dung i, mulak ma angka sisean i tu jabu ni nasida.
11 Alai sai jongjong do si Maria tumatangis di lambung ni kuburan. Huhut tumatangis, unduk ma ibana mangida tu bagasan ni kuburan i. 12 Gabe diida ibana ma disi dua suru-suruan marabit na bontar, hundul di hapeahan ni bangke ni Jesus hian, sada di inganan ni uluna jala sada nai di inganan ni patna. 13 Didok suru-suruan i ma tu si Maria, “Boasa tumatangis ho inang?” Dialusi ibana ma, “Nunga dibuat halak Tuanki, jala ndang huboto didia dipeakkon nasida ibana.” 14 Dung didok songon i, dibereng ibana ma tu pudi jala diida ma Jesus jongjong disi. Alai, ndang diboto ibana na Jesus do i. 15 Didok Jesus ma tu ibana, “Boasa sai tangis ho inang? Ise do na niluluanmu?” Dirimpu si Maria do ibana pangula ni porlak i, gabe ninna ma, “Amang, molo ho do na mambuat ibana, paboa ma tu ahu didia dipeakhon ho ibana asa hubuat ibana sian i.” 16 Didok Jesus ma tu ibana, “Maria!” Dibereng si Maria ma tu pudi, jala didok ibana ma di bahasa Heber, “Rabboni!” (lapatanna “Guru!”) 17 Didok Jesus ma tu ibana, “Unang ma sai tiop ahu, ai ndang laho dope ahu tu Ama i. Alai laho ma ho tu angka haha anggingku jala paboa ma tu nasida, ‘Na laho ma ahu tu Damang i dohot Amamuna jala tu Debatangku dohot Debatamuna.’” 18 Dung i laho ma si Maria Magdalena, dipaboa ma i tu angka sisean. Ninna ma, “Nunga huida Tuan!” Dipaboa ibana ma tu nasida na nidok ni Jesus tu ibana.
19 Di ari parjolo di minggu i, marpungu ma angka sisean tingki borngin. Dikunsi nasida do pintu ala mabiar nasida tu halak Jahudi. Dung i ro ma Jesus jala jongjong di tonga-tonga ni nasida ninna ma, “Dame ma di hamu.” 20 Dung didok Jesus songon i, dipatuduhon ma tanganna dohot rusukna tu nasida. Las ma roha ni angka sisean i mangida Tuan. 21 Didok Jesus ma muse tu nasida, “Dame ma di hamu. Songon Ama na marsuru ahu, suruonku ma hamu.” 22 Dung didok ibana songon i, diombus ibana ma hosana dompak nasida jala didok ma, “Jalo hamu ma tondi parbadia. 23 Molo disesa hamu dosa ni sasahalak, naung sesa ma dosana i. Alai molo ndang disesa hamu dosana, ndang disesa dosana i.”
24 Sahalak sian apostel na 12 i na margoar si Tomas na laos digoari si Kembar, ndang rap dohot nasida disi tingki ro Jesus. 25 Tingki didok angka sisean na asing tu ibana, “Nunga huida hami Tuan!” Didok ibana ma tu nasida, “Saleleng so huida tanganna na hona paku i jala hupamasuk jari-jaringku tusi dohot tu rusukna, ndang porsea ahu.”
26 Dung salpu ualu ari, marpungu ma muse angka sisean i di sada jabu jala dohot do si Tomas disi. Dikunsi nasida do pintu, alai ro ma Jesus jala jongjong di tonga-tonga ni nasida. Didok Jesus ma, “Dame ma di hamu.” 27 Dung i didok Jesus ma tu si Tomas, “Ida ma tangankon, pamasuk ma jari-jarim tusi dohot tu rusukkon. Unang be ganggu roham alai porsea ma ho.” 28 Didok si Tomas ma tu ibana, “Tuanku jala Debatangku!”* 29 Didok Jesus ma tu ibana, “Ala naung diida ho do ahu umbahen na porsea ho? Marlas ni roha ma angka na porsea nang pe ndang diida ahu.”
30 Godang dope angka tanda halongangan* na binahen ni Jesus di jolo ni angka siseanna na so disurat di gulungan on. 31 Alai disurat do angka on asa porsea hamu Jesus i do Kristus, Anak ni Debata. Jala molo porsea hamu, dapotmuna ma hangoluan marhite goarna.