Ulaon ni Apostel
26 Didok si Agrippa ma tu si Paulus, “Boi ma lehononmu alusmu.” Dibahen si Paulus ma tanda marhite tanganna, dung i dilehon ibana ma alusna, ninna ma,
2 “Ale Raja Agrippa, las do rohangku ala boi hulehon alushu sadari on di jolom taringot tu sude na nialuhon ni halak Jahudi. 3 Tarlumobi ala tangkas do diboto damang sude adat dohot parsoalan ni halak Jahudi. Alani i mangido ma jolo ahu, asa sabar damang manangihon ahu.
4 “Sude do halak Jahudi mamboto songon dia parngoluonku di tonga-tonga ni bangsongku dohot di Jerusalem sian mulai poso ahu. 5 Nunga leleng ditanda nasida ahu. Molo olo, boi do paboaon ni nasida na sian sekte Parise hian do ahu. Jala diboto damang do, gumodang do aturan ni sekte on sian sekte ni halak Jahudi na asing. 6 Alai diadili do ahu saonari, ala mangkirim ahu tu janji na binahen ni Debata tu angka ompunami. 7 Laos janji on do na hinirim ni 12 marganami, alani i ma nasida marsitutu manomba Debata arian dohot borngin. Jala pangkirimon on do na mambahen ahu dialuhon halak Jahudi, ale rajanami.
8 “Boasa ma didok rohamuna ndang boi paheheon ni Debata halak na mate? 9 Najolo, hupingkir hian do ingkon bahenonku nasa gogongku laho mangalo siihuthon Jesus* halak Nasaret i. 10 I do na huulahon di Jerusalem. Marhite huaso na hujalo sian angka malim kepala,* hupenjarahon do angka na badia i. Setuju do ahu tingki dibahen uhum mate tu nasida. 11 Jotjot do hubahen na hansit tu nasida di angka sinagoga* jala hupaksa do nasida manadingkon haporseaonna i. Alani sogo ni rohangku, laho do ahu tu angka kota na asing mangalelei nasida.
12 “Laho mangulahon songon i, borhat ma ahu tu Damaskus dung dapothu surat huaso sian malim kepala.* 13 Di tonga ari, tingki di pardalanan ahu ale rajanami, huida ma sinondang na mansai tiur, na umtiur sian mata ni ari. Marsinondang ma i sian langit tu humaliangku dohot tu humaliang ni angka na mandongani ahu. 14 Dabu ma hami sude tu tano, dung i hubege ma soara di bahasa Heber na mandok, ‘Saulus, Saulus, boasa dibahen ho na hansit tu ahu? Ho sandiri do na susa molo sai dialo* ho ahu.’ 15 Alai husungkun ma, ‘Ise do ho Tuan?’ Dialusi Tuan i ma, ‘Jesus do ahu, na pinaporsuk-porsukmi. 16 Jongjong ma ho. Hupatuduhon do diringku tu ho laho mamillit ho gabe naposongku dohot saksiku, laho paboahon na niidam dohot na laho patuduhononku dope tu ho taringot tu ahu. 17 Paluaonku ma ho sian bangso on dohot sian angka bangso na asing. Ai suruonku ma ho tu angka bangso i 18 asa bungkaonmu mata ni nasida, asa boanonmu nasida kaluar sian haholomon tu hatiuron dohot sian huaso ni Sibolis tu huaso ni Debata. Marhite haporseaon ni nasida tu ahu, disesa ma dosa ni nasida jala jaloon ni nasida ma upa rap dohot angka na badia i.’
19 “Alani i ma huoloi parnidaan na sian banua ginjang i, ale Raja Agrippa. 20 Parjolo ma i tu halak na di Damaskus, dung i tu halak na di Jerusalem, tu sude luat Judea dohot tu angka bangso na asing. Hubaritahon do asa muba nasida, asa mulak nasida tu Debata jala diulahon angka ulaon na patuduhon hamubaon ni roha. 21 Alani i do ditangkup halak Jahudi ahu di bagas joro jala naeng bunuon ni nasida ahu. 22 Alai marhite pangurupion ni Debata, gabe boi ma ahu marbarita tu halak na sangap dohot na so sangap sahat tu sadari on. Jala na hubaritahon tu nasida, i ma angka na laho masa songon na Sinurat ni Angka Panurirang dohot na sinurat ni si Musa. Ai dipaboa do di angka surat i, 23 na ingkon marsitaonon Kristus i, jala ibana ma na parjolo dipahehe sian angka na mate. Baritahononna ma hatiuron tu bangso on dohot tu bangso na asing.”
24 Tingki na mangkatai i si Paulus mangalehon alusna, didok si Festus ma gogo, “Nunga rintik ho Paulus! Parbinotoanmu na godang i do mambahen ho rintik!” 25 Alai didok si Paulus ma, “Ndang na rintik ahu, ale Festus na pinarsangapan. Sintong do na hudok on jala waras do ahu. 26 Tangkas do diboto ho taringot tusi ale Raja Agrippa, alani i do ahu barani paboahon i tu ho. Pos do rohangku, ndang adong na so diboto raja i taringot tusi. Ai ndang di inganan na buni i diulahon. 27 Ale raja Agrippa, dihaporseai ho do na Sinurat ni Angka Panurirang? Ninna rohangku dihaporseai damang do i.” 28 Alai didok si Agrippa ma tu si Paulus, “Tongkin nai bahenonmu nama ahu gabe halak Kristen.” 29 Alai didok si Paulus ma, “Hupangido do tu Debata, hatop manang leleng ndang holan raja i nian, alai dohot ma sude na manangihon ahu sadari on gabe halak Kristen. Alai unang ma tarrante nasida songon ahu.”
30 Dung i jongjong ma raja i, gubernur i, si Bernike dohot angka halak na hundul rap dohot nasida. 31 Tingki laho kaluar nasida, didok nasida ma sama nasida, “Ndang adong diulahon ibana manang aha na mambahen ibana patut diuhum mate manang dipenjarahon.” 32 Didok si Agrippa ma tu si Festus, “Molo so dipangido ibana hian naik banding tu Kesar, sasintongna nunga boi ibana paluaon.”