5 Musa

6 “Akka on ma paretta, patik, dohot aturan naung ditottuhon na dilehon Jahowa Debatamuna na lao diajarhon tu hamu. Ikkon oloanmuna do sudena i di luat na lao buatonmuna i gabe appunamuna molo dung menyeberang hamu. 2 Ikkon habiaranmuna do Jahowa Debatamuna jala ikkon diulahon hamu do sude aturan dohot sude paretta ni Debata na hupaboa tu hamu, tu anakmuna, dohot tu pahoppumuna.+ Ikkon ulahononmuna do i saleleng mangolu hamu, asa ganjang umurmuna.+ 3 Tangihon ma ale Israel, ikkon ulahononmuna do sudena i asa denggan ngolumuna, jala asa marlipat ganda hamu di luat na godang susu dohot madu i, songon naung dijanjihon Jahowa Debata ni akka ompumuna i tu hamu.

4 “Ale Israel, tangihon ma: anggo Debatanta, Jahowa do. Holan sada do Jahowa.*+ 5 Ikkon haholonganmuna do Jahowa Debatamuna sian nasa rohamuna, sian nasa ngolumuna,*+ dohot sian nasa gogomuna.+ 6 Ikkon disippan hamu do di bagasan rohamuna akka hata na huparettahon tu hamu sadari on. 7 Ikkon disuanton hamu do i tu bagasan roha ni anakkonmuna.*+ Ajarhon ma i tikki rap hundul hamu di jabu, tikki di pardalanan, tikki naeng modom, jala tikki dungo.+ 8 Ikkatton ma sudena i di tanganmuna gabe parningotan, jala bahen ma sudena i songon tali na diikkatton di dahimuna.*+ 9 Suratton ma sudena i di kusen ni pintumuna dohot di gerbangmuna.

10 “Marjanji do Jahowa Debatamuna i tu akka ompumuna, i ma si Abraham, si Isak, dohot si Jakkob,+ lao mamboan hamu tu luat na lao lehononna tu hamu. Godang do di luat i akka kota na balga jala na uli na so dipajongjong hamu.+ 11 Godang do akka jabu disi jala gok do akka barang na arga di jabu i, na so sian hasil ni ulaonmuna. Adong do disi inganan panampungan ni aek jala dang hamu na manggali i. Adong do akka ladang anggur dohot akka hau jetun disi jala dang hamu na manuan i. Molo dung sahat hamu di luat i jala diallang hamu hasilna sappe butong,+ 12 manat ma hamu, sotung lupa hamu tu Jahowa.+ Ibana do na mamboan hamu kaluar sian Mesir ingananmuna gabe hatoban. 13 Ikkon tu Jahowa Debatamuna i do hamu mabiar+ jala ikkon Ibana do disomba hamu.+ Molo marsumpa hamu, marsumpa ma hamu di bagasan goarna.+ 14 Unang ihutton akka debata na asing, debata na dia pe taho na disomba akka bangso na di sakalilingmuna.+ 15 Ai Jahowa Debatamuna, na adong di tonga-tongamuna i, Ibana do Debata na mangido asa holan Ibana na ikkon disomba.*+ Molo disomba hamu debata na asing, muruk ma Jahowa Debatamuna i tu hamu+ jala pamateonna ma hamu sude, asa unang adong be hamu na mangolu di tano on.+

16 “Unang uji hamu Jahowa Debatamuna,+ songon na binahenmuna najolo di Massa.+ 17 Ikkon marsitutu do hamu mangulahon sude paretta ni Jahowa Debatamuna dohot sipasingotna nang aturan na nilehonna tu hamu. 18 Ikkon ulahononmuna do akka na sittong dohot na denggan di jolo ni Jahowa, asa denggan ngolumuna. Molo diulahon hamu i, boi ma hamu masuk jala mambuat luat na denggan i gabe appunamuna, i ma luat na dijanjihon Jahowa tu akka ompumuna.+ 19 Boi ma usironmuna akka musumuna sian jolomuna, songon na dijanjihon Jahowa.+

20 “Di tikki na naeng ro, molo disukkun akka anakkonmuna hamu songon on, ‘Ai boasa dilehon Jahowa Debatanta i tu hita sipasingot, patik, dohot aturan on?’ 21 Alusi hamu ma songon on, ‘Najolo, hatoban ni si Firaun do hita di Mesir. Alai diboan Jahowa do hita kaluar sian Mesir marhite tanganna na gogo i. 22 Dibahen Jahowa do torus di jolotta akka tanda halongangan* na hebat lao pamatehon halak Mesir,+ si Firaun, dohot sude na di rumah tanggana.+ 23 Ditogihon Debata do hita kaluar sian i, asa diboan hita tuson jala mangalehon luat naung dijanjihon Ibana tu akka omputta.+ 24 Dung i, diparettahon Jahowa ma asa taulahon sude akka aturan on jala asa mabiar hita tu Jahowa Debatanta i. Ai molo taulahon i, denggan ma ngolutta salelengna+ jala toktong ma hita mangolu+ songon sadari on. 25 Jala molo marsitutu hita mangulahon sude parettana i, didok ma hita halak na mangulahon na sittong.* Ai taoloi do Jahowa Debatanta i songon na diparettahon Ibana tu hita.’+