5 Musa
21 “Molo adong halak na mate tarbunu di luat na dilehon Jahowa Debatamuna i tu hamu, alai dang diboto hamu ise na mambunu, 2 ikkon lao do akka pangituai* dohot hakim+ mangukkur jarak ni bakke i tu akka kota di sakalilingna. 3 Dung i, ikkon buaton ni pangituai na sian kota na unjonok tu bakke i ma sada anak ni lombu na so hea dope dipakke karejo, jala na so hea dope manarik boban. 4 Ikkon boanon ni pangituai ni kota i ma anak ni lombu i tu rura.* Ikkon adong do aek na mardalan di rura i, tanona dang hea dope diula, jala dang hea disuan boni. Ikkon diponggol nasida do rukkung ni anak ni lombu i di rura i.+
5 “Ikkon ro ma malim, i ma halak Lepi tusi. Ai nungnga dipillit Jahowa Debatamuna nasida lao marhobas tu Ibana+ jala mangido pasu-pasu di bagasan goar ni Jahowa.+ Nasida ma na paboahon songon dia cara pasaehon parsoalan+ molo adong na mambunu. 6 Dung i, ikkon disussi akka pangituai na sian kota na unjonok tu inganan ni bakke i ma tangan ni nasida.+ Disussi nasida ma i di atas ni anak ni lombu naung diponggol rukkungna di rura i. 7 Ikkon dohonon ni nasida ma songon on, ‘Dang tangannami na mambunu ibana,* jala dang diida hami ibana dibunu.* 8 Ale Jahowa, unang ma pangido martanggung jawab bangso Israel, bangso naung ditobusmi+ alani na masa on. Palua ma bangsomon, palua ma halak Israel i sian hasalaan, ala nungnga mate halak na so marsala.’+ Molo dung dibahen songon i, dang nasida be na dipangido martanggung jawab tu halak na mate i. 9 Songon i ma hamu pasidikkon hasalaan sian tonga-tongamuna, ala nungnga mate halak na so marsala. Ai nungnga diulahon hamu na sittong di jolo ni Jahowa.
10 “Molo lao hamu marporang mangalo musu, jala alani hamu ditaluhon Jahowa Debatamuna i do nasida, dung i ditakkup hamu nasida,+ 11 jala diida hamu adong sahalak borua na bagak sian tonga-tonga ni halak na binoanmuna i, lomo rohamuna tu ibana, jala naeng bahenonmuna ibana gabe istrimuna, 12 boi do boanonmuna ibana tu jabumuna. Ikkon dicukkur do obuk ni borua i, diurus sisilonna, 13 ikkon bukkaonna do baju na dipakke ibana tikki ditakkup, jala tinggal ma ibana di jabumuna. Ikkon marlungun ni roha ma ibana saleleng sabulan+ alani omakna dohot bapakna. Dung i pe asa boi hamu rap modom. Gabe suamina ma hamu jala gabe istrimuna ma ibana. 14 Alai molo dang lomo be rohamuna tu ibana, pasombu ma ibana lao+ manang na tudia pe lomo ni rohana. Dang boi jualonmuna ibana manang kasar hamu tu ibana. Ai nungnga maila ibana dibahen hamu.
15 “Molo adong dua istri ni sahalak bawa, jala umholong rohana tu istri na sada sian tu na sada nai,* hape ditubuhon istrina na dua i do anak di ibana, jala na siakkangan tubu sian istri na so dihaholongi ibana,+ 16 tikki dibagi ibana warisan tu akka anakna, dang boi bahenonna anak na sian istri na dihaholongi i gabe anak siakkanganna. Molo dibahen ibana songon i, gabe rugi do anak na sian istri na so dihaholongi i, ai ibana do anak siakkangan. 17 Ikkon diakkui ibana do molo anak siakkanganna, i ma anak na sian istri na so dihaholongi i. Ikkon lehononna do dua bagian sian sude artana tu anakna i. Ai ibana do pinopparna na parjolo tubu.* Alani i, appunana do hak ni anak siakkangan.+
18 “Molo adong anak ni sahalak bawa na takkang, pangalo jala dang mangoloi omakna manang bapakna,+ hape nungnga dipasingot natua-tuana ibana alai dang olo ibana manangihon,+ 19 ikkon boanon ni omakna dohot bapakna do ibana tu jolo ni akka pangituai na di gerbang ni kota. 20 Jala dohononna ma tu pangituai ni kota i, ‘Na takkangan anakkon, pangalo, jala dang olo mangoloi hami. Mokkus+ do ibana jala parmabuk.’+ 21 Ikkon didangguri sude halak na di kota i do ibana pakke batu sappe mate. Ikkon pasidingonmuna do hajahaton sian tonga-tongamuna. Begeon ni sude halak Israel ma i jala gabe mabiar ma nasida.+
22 “Molo adong halak na mangulahon dosa na mambahen ibana patut dihukum mate,+ jala nungnga dipamate ibana, dung i digattung di sada hau,+ 23 dang boi pasombuonmuna bakkena i gattung di hau saborngin i.+ Ikkon dikuburhon hamu do ibana di ari i. Ai magigi situtu do Debata tu halak na digattung di hau.*+ Dang boi bahenonmuna ramun* luat na dilehon Jahowa Debatamuna tu hamu gabe appunamuna.+