5 Musa

12 “Akka on ma patik dohot aturan naung ditottuhon na ikkon ulahononmuna. Ikkon marsitutu do hamu mangulahon sudena i saleleng mangolu hamu di luat na lao lehonon ni Jahowa Debata ni akka ompumuna tu hamu lao gabe appunamuna. 2 Molo dung dibuat hamu luat ni akka bangso i, ikkon dihancurhon hamu do sude inganan panombaon*+ ni nasida na di dolok na timbo, manang na di dolok-dolok, manang na di toru ni hau na balga. 3 Ruppakkon hamu ma langgatan ni nasida, hancurhon hamu ma tugu sisombaon* ni nasida, tutung ma tiang sisombaon* ni nasida,+ hancurhon hamu ma patung ni akka debata na disomba nasida,+ jala sesa hamu ma goar ni akka debata ni nasida sian inganan i.+

4 “Unang songon cara ni nasida manomba debata ni nasida bahen hamu manomba Jahowa Debatamuna.+ 5 Alai lao ma hamu tu inganan na pinillit ni Jahowa Debatamuna, i ma inganan na dipillit lao pasangappon goarna+ dohot na lao gabe ingananna di tonga-tonga ni sude margamuna. 6 Boan hamu ma tusi pelean situtungonmuna,+ akka peleanmuna na asing, peleanmuna na saparsappulu i,+ sumbanganmuna,+ peleanmuna ala mambahen janji, pelean sian na nionjar ni rohamuna,+ dohot akka anak ni binatang na dipiaro hamu na parjolo tubu.+ 7 Ikkon disi do hamu rap dohot keluargamuna mangallang peleanmuna i, di jolo ni Jahowa Debatamuna.+ Jala marlas ni roha ma hamu tu sude na niulamuna.+ Ai nungnga dipasu-pasu Jahowa Debatamuna i hamu.

8 “Unang be tabahen songon na taulahon sadari on. Mangihutton lomo ni rohana sandiri dope ganup halak saonari.* 9 Ai dang sahat dope hamu tu luat na lao gabe ingananmuna i,+ i ma luat na lao lehonon ni Jahowa Debatamuna i gabe appunamuna. 10 Molo dung ditaripari hamu Sunge Jordan,+ jala tinggal hamu di luat na lao lehonon ni Jahowa Debatamuna tu hamu gabe appunamuna, jagaonna do hamu sian sude musu na di sakalilingmuna. Aman ma hamu tinggal di luat i.+ 11 Boan hamu ma sude na huparettahon i tu inganan na dipillit Jahowa Debatamuna lao pasangappon goarna.+ Boan hamu ma pelean situtungonmuna, akka peleanmuna na asing, peleanmuna na saparsappulu i,+ sumbanganmuna, dohot sude peleanmuna ala mambahen janji tu Jahowa. 12 Marlas ni roha ma hamu di jolo ni Jahowa Debatamuna+ rap dohot anakmuna, borumuna, dohot akka hatobanmuna songon i nang halak Lepi na adong di kotamuna.* Ai dang adong parbagianan manang warisan ni nasida songon hamu.+ 13 Manat ma hamu, asa unang sappe dilehon hamu pelean situtungon di inganan na asing, na denggan di rohamuna.+ 14 Holan di inganan na dipillit Jahowa do boi dipelehon hamu pelean situtungonmuna. Pelehon ma i di sada sian akka inganan na adong di luat ni akka margamuna. Disi ma pelehon hamu sude na huparettahon i tu hamu.+

15 “Manang sadihari pe hamu naeng maneat binatang lao allangonmuna,+ seat hamu ma i di kotamuna.* Marlas ni roha ma hamu mangallang i. Ai nungnga dipasu-pasu Jahowa Debatamuna hamu. Halak na ramun* dohot na so ramun pe boi do mangallang i, dos songon tikki hamu mangallang jagal ni kijang manang rusa. 16 Alai unang allang hamu mudarna,+ ikkon diusehon hamu do i tu tano songon aek.+ 17 Di akka kotamuna,* dang boi allangonmuna peleanmuna na saparsappulu sian gandummuna,* anggurmuna na baru, dohot miakmuna. Jala dang boi allangonmuna anak ni lombu manang biru-birumuna na parjolo tubu,+ manang peleanmuna ala mambahen janji, pelean sian na nionjar ni rohamuna, manang sumbanganmuna. 18 Alai allang hamu ma i di jolo ni Jahowa, di inganan na pinillit ni Jahowa Debatamuna.+ Allang hamu ma i rap dohot anakmuna, borumuna, dohot akka hatobanmuna songon i nang halak Lepi na adong di kotamuna.* Marlas ni roha ma hamu di jolo ni Jahowa Debatamuna ala ni sude na niulamuna. 19 Saleleng mangolu hamu di luat i, manat ma hamu asa unang lupa tu halak Lepi.+

20 “Molo dibahen Jahowa lam bidang luatmuna i,+ dos songon na dijanjihon Ibana tu hamu,+ jala didok hamu, ‘Naeng mangallang jagal au,’ ala nungnga masihol hian hamu naeng mangallang jagal, boi do allangonmuna i manang sadihari pe lomo rohamuna.+ 21 Molo dao do sian ingananmuna inganan na dipillit Jahowa Debatamuna lao pasangappon goarna i,+ boi do seatonmuna piga-piga binatang na dipiaro hamu, na dilehon Jahowa tu hamu songon na huparettahon tu hamu. Ikkon allangonmuna do i di kotamuna* manang sadihari pe lomo rohamuna. 22 Boi do allangonmuna i, songon tikki hamu mangallang jagal ni kijang manang rusa.+ Halak na ramun dohot na so ramun pe boi do mangallang i. 23 Alai ikkon marsitutu do hamu asa unang mangallang mudarna.+ Ai di mudar i do hangoluan+ ni binatang i. Alani i, dang boi allangonmuna jagal na adong mudarna. 24 Unang allang hamu mudarna. Ikkon diusehon hamu do i tu tano songon aek.+ 25 Dang boi allangonmuna mudar, asa denggan ngolumuna dohot akka pinopparmuna. Ai nungnga diulahon hamu na sittong di jolo ni Jahowa. 26 Molo ro hamu tu inganan na pinillit ni Jahowa i, holan sian pelean ala mambahen janji dohot sian akka na badia appunamuna i do na boi buatonmuna. 27 Ikkon dipelehon hamu do disi pelean situtungon, jagal ni binatang i dohot mudarna.+ Pelehon ma i di langgatan ni Jahowa Debatamuna. Ikkon diusehon hamu do tu langgatan+ ni Jahowa Debatamuna i mudar ni binatang na dipelehon hamu. Alai anggo jagal ni binatang i, boi do allangonmuna.

28 “Manat ma hamu jala marsitutu hamu mangulahon sude paretta na hupaboa i tu hamu. Molo diulahon hamu i, toktong ma denggan ngolumuna dohot pinopparmuna. Ai nungnga diulahon hamu na denggan jala na sittong di jolo ni Jahowa Debatamuna.

29 “Molo dung dipamate Jahowa Debatamuna i sude halak na tinggal di luat na lao buatonmuna i,+ jala molo dung tinggal hamu di luat i, 30 manat ma hamu asa unang sappe tarjorat. Molo dung dipamate Debata sude nasida sian jolomuna, unang sukkun hamu taringot tu debata ni nasida. Jala unang didok hamu, ‘Songon dia do biasana bangso on manomba debata ni nasida? Naeng hutiru cara ni nasida i.’+ 31 Unang bahen hamu songon cara ni nasida i lao manomba Jahowa Debatamuna. Ai diulahon nasida do tu debata ni nasida akka ulaon na dihagigihon jala dihasogohon Jahowa. Ditutung nasida do akka anak dohot boru ni nasida tu api lao gabe pelean tu debata ni nasida.+ 32 Manat ma hamu asa marsitutu hamu mangulahon sude paretta na hupaboa i tu hamu.+ Unang tambai hamu jala unang orui hamu.+