Ulaon ni Apostel

5 Adong ma sahalak bawa na margoar si Ananias. Lao ma ibana rap dohot istrina, si Sapira manjual tanona. 2 Ditabunihon ibana ma deba tuhor ni tanona i jala diboto istrina do i. Alai na deba nai diboan jala dilehon tu akka apostel.+ 3 Didok si Petrus ma tu ibana, “Ananias, boasa diloas ho Sibolis* mangarajai pikkiranmu, gabe barani ho manggabusi+ tondi parbadia+ jala ditabunihon ho deba tuhor ni tanomi? 4 Ai ho do kan nappunasa ladang i? Alani i, molo dung dijual ho ladang i, lomom do mamakke hepengna i. Alai boasa tubu di roham mambahen na jahat sisongon i? Dang jolma digabusi ho, alai Debata do.” 5 Dung dibege si Ananias hata i, dabu ma ibana laos mate. Gabe mabiar situtu ma sude na mambege na masa i. 6 Dung i jongjong ma akka doli-doli na disi, dibukkus nasida ma bakkena i dohot abit, diboan ma tu luar, jala dikubur ma ibana.

7 Hira-hira tolu jom dukkon i, ro ma istrina alai dang diboto dope na masa i. 8 Disukkun si Petrus ma ibana, “Paboa ma tu au, nasa on do digadis hamu tanomuna i?” Dialusi ibana ma, “Ido, nasa i do.” 9 Alani i, ninna si Petrus ma tu ibana, “Boasa sahata ho dohot suamim lao manguji tondi parbadia ni Jahowa?* Ida ma! Nungnga di pintu i akka halak na mangubur suamim jala boanon ni nasida ma dohot ho.” 10 Satokkin i, dabu ma ibana tu pat ni si Petrus laos mate. Tikki masuk akka doli-doli i, diida nasida ma nungnga mate ibana. Diboan ma ibana tu luar, jala dikuburhon di labbung ni suamina i. 11 Gabe mabiar situtu ma sude halak na di huria i dohot sude halak na mambege na masa i.

12 Torus do dibahen akka apostel tanda halongangan* di tonga-tonga ni akka jolma.+ Jala sai marpungu do nasida sude di Terras ni si Salomo.+ 13 Nang pe dang adong halak na asing na barani mangihutton akka apostel i, alai sai dipuji akka jolma i do nasida. 14 Lam tamba do godang ni akka bawa dohot akka borua na porsea tu Tuan i.+ 15 Gariada, diboan akka halak do na marsahit tu sirpang ni dalan. Dipeakkon do nasida di ginjang ni podoman jala dipaima nasida do lewat si Petrus. Porsea do nasida, holan bayanganna i pe hona tu nasida, boi do nasida malum.+ 16 Godang do halak na ro sian akka kota na di sakaliling ni Jerusalem. Diboan nasida do tusi akka na marsahit dohot akka na disonggopi suru-suruan na jahat. Jala dipamalum do nasida sude.

17 Alai cemburu ma sintua ni malim dohot sude na mangihutton ibana sian sekte Saduse. Jongjong ma nasida sude. 18 Ditakkup nasida ma akka apostel i jala dipamasuk tu penjara na di kota.+ 19 Alai di bornginna i, ro ma suru-suruan ni Jahowa* mambukka akka pintu ni penjara i.+ Diboan ma nasida tu luar jala ninna ma, 20 “Lao ma hamu tu bagas joro, jala jongjong ma hamu disi. Toktong ma paboa hamu tu akka jolma barita na uli taringot tu hangoluan.” 21 Dung dibege nasida i, masuk ma nasida tu bagas joro manogotna i jala mangajari ma nasida.

Dung sahat sintua ni malim dohot akka halak na rap dohot ibana, dijou nasida ma asa marpungu sude anggota ni Sanhedrin* dohot sude pangituai ni halak Israel. Disuru nasida ma akka petugas lao tu penjara, asa diboan akka apostel i tu jolo ni nasida. 22 Alai dung sahat akka petugas i di penjara, dang disi be didapot nasida akka apostel i. Gabe mulak ma nasida paboahon na masa i. 23 Didok nasida ma, “Tarkucci do pintu ni penjara i jala jongjong do disi akka panjaga. Alai tikki dibukka hami pintu i, dang adong be manang ise di bagasan.” 24 Dung dibege kepala panjaga ni bagas joro dohot akka malim kepala* hatorangan i, gabe sukkun-sukkun ma roha ni nasida aha do na lao masa muse. 25 Alai ro ma sasahalak mandapotton nasida. Ninna ma, “Di bagas joro do halak na dipamasuk hamu tu penjara i. Jongjong do nasida disi mangajari akka halak.” 26 Dung i, lao ma kepala ni panjaga i rap dohot akka petugas manakkup nasida. Alai dang dihahua nasida akka apostel i, ai mabiar do nasida didangguri akka jolma.+

27 Dung i diboan ma nasida jala disuru jongjong di jolo ni Sanhedrin. Disukkuni sintua ni malim ma nasida. 28 Ninna ma, “Nungnga takkas diorai hami hamu asa unang diajari hamu akka halak marhite goar i.+ Alai ida ma, nungnga rarat ajaranmuna i tu sude huta na di Jerusalem. Jala hami do disalahon hamu tu parmate ni bawa i.”*+ 29 Alai didok si Petrus dohot akka apostel i ma, “Debata do parhuasonami. Urrikkot do di hami mangoloi Ibana sian jolma.+ 30 Dipahehe Debata ni akka omputta i do Jesus, na dibunu hamu jala na digattung hamu tu hau.+ 31 Nungnga lam sangap ibana dibahen Debata di sabola kananna.+ Dibahen do ibana gabe Pamimpin+ dohot Sipalua.+ Dibahen do songon i, asa muba halak Israel jala asa disesa dosa ni nasida.+ 32 Hami ma saksi na mangida sudena i.+ Jala tondi parbadia+ na dilehon Debata tu akka na mangoloi Ibana mangurupi hami lao paboahon tu akka halak na tutu do sudena i masa.”

33 Dung dibege nasida i, muruk situtu ma nasida, gabe naeng dibunu nasida ma akka apostel i. 34 Alai jongjong ma di tonga-tonga ni Sanhedrin i sahalak Parise na margoar si Gamaliel.+ Sahalak guru na mangajarhon Patik do ibana jala dipasangap sude jolma do ibana. Disuru ibana ma asa diboan satokkin akka apostel i tu luar. 35 Dung i ninna ibana ma tu nasida, “Hamu halak Israel, manat ma pikkirhon hamu andorang so dibahen hamu manang aha tu nasida. 36 Najolo mangalo do si Teudas. Dibahen do dirina gabe pamimpin na sangap jala adong do hira-hira 400 bawa mangihutton ibana. Alai dung dibunu ibana, gabe marserak do sude na mangihutton ibana jala dang adong be saonari. 37 Dukkon ibana, ro do muse si Judas halak Galilea. Mangalo do ibana tu pamaretta tikki masa sensus penduduk. Godang do halak na mangihutton ibana. Alai ibana pe, tong do dibunu. Gabe marserak ma sude halak na mangihutton ibana. 38 Alani i marningot na masa saonari, on do sidohonokku tu hamu, unang ma pola gugai hamu nasida. Pasombu hamu ma songon i. Ai molo sian jolma do ulaon ni nasida i, dang marhasil i. 39 Alai molo sian Debata do i, dang tolap hamu mangorai nasida.+ Ra, boi do gabe Debata na dialo hamu.”+ 40 Dioloi nasida ma hata ni si Gamaliel i. Dung i dijou ma akka apostel i, dilissingi,*+ diorai ma nasida mangajari akka halak marhite goar ni Jesus, jala dipalua ma nasida.

41 Dung i lao ma akka apostel i sian jolo ni Sanhedrin.* Alai marlas ni roha+ do nasida. Ai didok roha ni nasida, na patut do nasida manaon na haccit alani goar ni Jesus i. 42 Ganup ari do nasida di bagas joro, toktong do nasida lao sian jabu tu jabu+ mangajari akka halak jala paboahon barita na uli taringot tu Kristus Jesus.+