Ulaon ni Apostel
6 Di bagasan piga-piga ari, tamba ma godang ni akka sisean ni Jesus. Alai tubu ma parsoalan di halak Jahudi na marbahasa Junani. Marungut-ungut ma nasida tu halak Jahudi na marbahasa Heber, ala adong sian akka ina na mabalu na marbahasa Junani na so disarihon tikki dibagi sipanganon siganup ari.+ 2 Alani i, dijou apostel na 12 i ma marpungu sude sisean i jala ninna ma, “Dang denggan* gabe dipaso hami mangajarhon hata ni Debata holan ala naeng mambagi-bagihon sipanganon.+ 3 Onpe hamu akka dongan, pillit hamu ma pitu bawa sian tonga-tongamuna na denggan pangalahona,+ na digohi tondi parbadia, jala na marbisuk.+ Bahenonnami ma nasida mangaradoti ulaon na rikkot on.+ 4 Alai anggo hami, lehononnami ma sude tikki dohot gogonami lao martangiang jala mangajarhon hata ni Debata.” 5 Las ma roha ni sude na pungu i mambege hata ni apostel i. Dipillit nasida ma si Stepanus. Bawa na marhaporseaon na togu do ibana jala digohi tondi parbadia. Dipillit ma muse si Pilippus,+ si Prokorus, si Nikanor, si Timon, si Parmenas, dohot si Nikolaus na sian Antiokia na mangihutton agama Jahudi.* 6 Diboan ma nasida tu akka apostel i. Dung martangiang, diappehon akka apostel i ma tangan ni nasida tu akka na tarpillit i.+
7 Gabe lam rarat ma hata ni Debata+ jala lam tamba godang+ ma akka sisean di Jerusalem. Jala godang do akka malim na mangihutton haporseaon i.+
8 Dibahen si Stepanus do godang tanda halongangan* di tonga-tonga ni jolma, ai gok do huaso dohot asi ni roha ni Debata di ibana. 9 Alai, ro ma deba halak Jahudi na sian Sinagoga* ni Halak na Merdeka* rap dohot deba halak Kirene, halak Aleksanderia, halak na sian Kilikia, dohot na sian Asia lao marsoal tu si Stepanus. 10 Alai dang taralo ni nasida ibana, ai marbisuk jala diurupi tondi parbadia do ibana makkatai.+ 11 Jadi sipsip ma nasida manggaji piga-piga halak lao mandok, “Hubege hami do ibana mangaleai si Musa dohot Debata.” 12 Dihasut nasida ma akka halak, akka pangituai,* dohot akka siboto surat* asa marsogo ni roha tu si Stepanus. Dung i, toppu ma ditakkup nasida ibana jala diboan tu jolo ni Sanhedrin.* 13 Dung i diboan nasida ma akka saksi palsu, ninna ma, “Torus do dileai ibana Patik i dohot inganan na badia on. 14 Uppamana, hubege hami do didok ibana, na lao diruppakkon Jesus halak Nasaret i nama inganan on jala paubaonna ma aturan na tajalo sian si Musa.”
15 Sude ma na hundul di Sanhedrin* i mangida si Stepanus, jala songon bohi ni suru-suruan do bohina diida nasida.