Ulaon ni Apostel

7 Alai disukkun sintua ni malim ma, “Ate, tutu do i sude?” 2 Dialusi si Stepanus ma, “Hamu akka haha anggi dohot akka amanami, tangihon hamu ma hatakkon. Andorang so maringanan dope omputta si Abraham di Haran,+ nungnga dipataridahon Debata na sangap i dirina tu ibana di Mesopotamia. 3 Jala didok Debata ma tu ibana, ‘Lao ma ho sian hutami. Tadikkon ma keluargam. Jala lao ma ho tu luat na lao hupatudu tu ho.’+ 4 Dung i, lao ma ibana sian luat ni halak Kasdim jala maringanan di Haran. Dung mate bapakna,+ disuru Debata ma asa pinda ibana sian luat i tu ingananmuna saonari.+ 5 Nang pe songon i, dang adong dilehon Debata tano parbagiananna disi. Nanggo sajokkal pe dang adong dilehon tu ibana. Alai marjanji do Debata mangalehon luat i gabe appunana dohot appuna ni pinopparna,+ nang pe di tikki i dang adong dope anakkonna. 6 Asing ni i, didok Debata do tu ibana na lao tinggal akka pinopparna i di luat ni halak na asing. Dibahen halak na disi ma nasida gabe hatoban. Jala dibahen ma nasida susa saleleng 400 taon.+ 7 Alai ninna Debata ma, ‘Hukumokku ma bangso na mambahen nasida gabe hatoban.+ Dung i kaluar ma nasida manomba Au di inganan on.’+

8 “Dibahen Debata ma parjanjian sunat+ dohot ibana. Disunat si Abraham ma si Isak anakna+ di ari paualuhon.+ Dung i adong ma anak ni si Isak, goarna si Jakkob.* Jala adong ma 12 anak ni si Jakkob, nasida ma na gabe omputta i. 9 Cemburu do akka omputta i tu si Josep+ jala dijual ma ibana tu Mesir.+ Alai didongani Debata do ibana.+ 10 Dipalua do ibana sian sude hasusaanna. Dibahen Debata do ibana gabe halak na palasson roha. Dibahen Debata do ibana marbisuk di jolo ni si Firaun, raja ni Mesir. Dung i dipillit si Firaun do ibana mamaretta tu sude halak di Mesir jala mangurus sude na di istanana.+ 11 Alai susa ma halak mangalului sipanganon di sude luat na di Mesir dohot Kanaan. Massai susa do tikki i, jala dang adong be dapot ni akka omputta i sipanganon.+ 12 Alai dibege si Jakkob ma na adong sipanganon* di Mesir, gabe disuru ma akka omputta i tusi parjolo sahali.+ 13 Tikki lao muse nasida paduahalihon, dipatandahon si Josep ma dirina tu haha anggina. Gabe ditanda si Firaun+ ma keluarga ni si Josep. 14 Dung i ditonahon si Josep ma asa ro bapakna rap dohot sude keluargana,+ 75 halak ma sude.+ 15 Alani i borhat ma si Jakkob tu Mesir+ laos disi ma ibana mate,+ songon i nang akka omputta.+ 16 Dung i, ditaruhon ma nasida tu Sikem.+ Dipeakkon ma nasida tu kuburan naung dituhor si Abraham sian akka anak ni si Hemor marhite hepeng perak.

17 “Dung lam jonok tikki ni Debata lao pasautton janjina tu si Abraham, lam tamba godang ma bangso i di Mesir. 18 Sappe adong do raja na mamaretta di Mesir na so mananda si Josep.+ 19 Akkal do raja on tu bangsotta jala jahat do ibana. Dipaksa ibana do akka omputta mambolokkon poso-poso ni nasida asa mate akka poso-poso i.+ 20 Di tikki i ma tubu si Musa, jala massai ganteng do ibana.* Tolu bulan ma ibana diparorot di jabu ni bapakna.+ 21 Tarpaksa do natua-tuana ikkon mambolokkon ibana.+ Alai dibuat boru ni si Firaun ma ibana jala dipagodang-godang songon anakna sandiri.+ 22 Alani i, diajarhon do tu si Musa sude ilmu* ni halak Mesir. Gabe malo do ibana makkatai jala malo mula-ulaon.+

23 “Dung marumur 40 taon ibana, ro ma tu rohana lao manjuppangi* akka haha anggina, halak Israel.+ 24 Tikki diida ibana adong halak Mesir mambahen na jahat tu halak Israel, diurupi ibana ma dongan sabangsona i. Dibela ibana ma dongan sabangsona i jala dipamate ma halak Mesir i. 25 Dirippu si Musa do dohonon ni bangso i songon on, “Pasti paluaon ni Debata do hita marhite ibana,” alai dang songon i dipikkirhon bangso i. 26 Marsogotna i diida si Musa ma marbadai halak Israel. Dipadame ibana ma nasida, didok ma, ‘Hamu akka dongan, na marhaha maranggi do hamu. Boasa marbadai hamu?’ 27 Alai dionjarhon na mamukkul donganna i ma si Musa, ninna ma, ‘Ise na mamillit ho gabe pamimpin dohot hakim di hami? 28 Naeng pamateonmu do au songon halak Mesir na pinamatem nattoari?’ 29 Dung dibege si Musa i, lari ma ibana jala gabe panoppang di luat Midian. Tubu do dua anakna disi.+

30 “Dung salpu 40 taon, ro ma sada suru-suruan pataridahon dirina tu si Musa di padang gurun na jonok tu Dolok Sinai. Dipatudu do dirina di bagasan api na marsigorgor di ramba na marsuga.+ 31 Heran ma si Musa mangida i. Alai tikki dipajonok ibana lao patakkasson, tarbege ma soara ni Jahowa.* Ninna ma, 32 ‘Au do Debata ni akka ompum, Debata ni si Abraham, si Isak, dohot si Jakkob.’+ Gabe hitir-hitir ma si Musa jala dang barani be ibana mardalan lao mangida ramba i. 33 Ninna Jahowa* ma tu ibana, ‘Bukka ma solopmi. Ai tano na badia do ingananmu jongjong i. 34 Nungnga huida songon dia haccitna dibahen halak Mesir tu bangsokki. Nungnga hubege orong-orong ni nasida,+ jala ro nama Au paluahon nasida. Saonari, husuru ma ho tu Mesir.’ 35 Si Musa on ma na so dijalo halak Israel i. Didok nasida do, ‘Ise na mamillit ho gabe pamimpin dohot hakim di hami?’+ Alai marhite suru-suruan na ro mandapotton ibana di bagasan ramba na marsuga, disuru Debata+ ma ibana gabe pamimpin jala paluahon nasida. 36 Ibana do muse na mamboan nasida kaluar sian Mesir,+ na mambahen akka tanda halongangan* di Mesir,+ di Laut Merah,+ dohot di padang gurun saleleng 40 taon.+

37 “Laos si Musa do na mandok tu halak Israel, ‘Na lao pilliton ni Debatamuna i do di hamu sahalak panurirang* na songon au sian tonga-tongamuna.’+ 38 Ibana do na adong di tonga-tonga ni halak Israel tikki di padang gurun. Ibana do na makkatai+ tu suru-suruan+ di Dolok Sinai dohot tu akka omputta. Jala ibana do na manjalo barita hangoluan sian Debata lao dipaboa tu hita.+ 39 Alai dang dioloi akka omputta ibana. Gariada dang lomo roha ni nasida mangida ibana.+ Ai naeng mulak do nasida muse tu Mesir.+ 40 Didok nasida do tu si Aron, ‘Dang huboto hami manang na mahua si Musa, na manogihon hami kaluar sian Mesir i.+ Alani i, bahen ma di hami sada debata, asa adong na mamimpin hami.’ 41 Dibahen nasida ma patung ni anak ni lombu di ari i jala dipelehon nasida ma pelean tu patung i. Marpesta ma nasida mangarayahon na dibahen nasida i.+ 42 Alani i ditinggalhon Debata ma nasida jala dipasombu ma nasida marsomba tu mataniari, tu bulan, dohot tu akka bintang na di langit.+ Ai songon on do na tarsurat di Bukku ni Akka Panurirang, ‘Ale bangso Israel, saleleng 40 taon hamu di padang gurun, dang tu Au kan dilehon hamu pelean situtungon dohot peleanmuna na asing i? 43 Alai diboan-boan hamu do kemah ni Molok+ dohot bintang ni debata Repan. Akka i ma patung na dibahen hamu lao sombaonmuna. Alani i, bolokkonokku ma hamu tu inganan na dao, na undao sian Babel.’+

44 “Adong do tabernakel* ni akka omputta i di padang gurun. Debata do na manuru si Musa mambahen i jala dibahen do i sesuai tu rancangan na dipatudu Debata tu si Musa.+ 45 Dilean do tu akka omputta tabernakel i gabe appuna ni nasida. Diboan ma i tikki masuk nasida rap dohot si Josua tu tano ni akka bangso na asing.+ Dipalao Debata do akka bangso i di jolo ni akka omputta.+ Jala toktong do disi tabernakel i sahat tu tikki ni si Daud. 46 Lomo do roha ni Debata mangida si Daud. Dipangido si Daud do asa dipaloas ibana mangulahon ulaon na sangap lao mambangun bagas ni Debata ni si Jakkob.+ 47 Alai si Salomo do na mambangun bagas i di Debata.+ 48 Nang pe songon i, dang tinggal di inganan na dibahen jolma Debata Natumimbul i.+ Ai songon on do didok sahalak panurirang, 49 ‘Surgo i do tahtakku,+ jala tano on do sidege-degean ni pattu.+ Ai jabu na songon dia ma na lao pajongjongonmuna di Au? Ninna Jahowa.* Jala dia ma inganan na boi gabe inganakku tinggal? 50 Ai tanganku sandiri do na mambahen on sude.’+

51 “Hamu akka sijogal rukkung jala naung tartutup roha dohot pinggolna,* sai dialo hamu do tondi parbadia songon akka ompumuna i.+ 52 Adong do panurirang na so manaon na haccit dibahen akka ompumuna i?+ Dipamate nasida do akka halak na paboahon haroro ni halak na mangulahon na sittong i,+ halak na dihianati hamu jala naung dipamate hamu.+ 53 Hamu do na manjalo Patik na dipasahat marhite akka suru-suruan i,+ alai dang diulahon hamu i.”

54 Dung dibege nasida hatana i, sogo situtu ma roha ni nasida.* Sappe diharat nasida ma ngingi ni nasida alani murukna mangida si Stepanus. 55 Alai ditatap si Stepanus na digohi tondi parbadia i ma doppak langit. Diida ibana ma hasangapon ni Debata jala diida ma jongjong Jesus di sabola kanan ni Debata.+ 56 Jadi ninna ibana ma, “Huida do bukka langit i jala jongjong do Anak ni jolma i+ di sabola kanan ni Debata.”+ 57 Mambege i gogo ma nasida marsurak, ditutup be ma pinggolna, jala sude ma nasida mangaroro si Stepanus. 58 Dung diboan nasida ibana tu luar ni kota, didangguri ma ibana mamakke batu.+ Dipeakkon akka saksi palsu i+ do pakkean luar ni nasida tu jolo ni sahalak doli-doli, na margoar si Saulus.+ 59 Didangguri nasida ma si Stepanus mamakke batu. Alai didok si Stepanus ma, “Tuan Jesus, tu ho ma hupasahat hosakkon.” 60 Dung i marsinggang ma ibana, gogo ma didok, “Ale Jahowa,* unang ma hukum nasida alani dosa na diulahon nasida on.”+ Dukkon didok ibana i, mate ma ibana.*