Ulaon ni Apostel
9 Di tikki i, sai diancam si Saulus dope akka sisean ni Tuan jala naeng dibunu ibana do nasida.+ Alani i lao ma ibana tu sintua ni malim. 2 Dipangido ibana ma sian nasida surat lao boanonna tu akka sinagoga* di Damaskus. Alani i, molo adong juppangna akka na mangihutton Dalan ni Tuan i+ bawa manang borua, boi ma takkuponna jala boanonna nasida tu Jerusalem.
3 Tikki di pardalanan dope ibana, jala nungnga jonok tu Damaskus, toppu ma ro cahaya sian langit tu sakalilingna.+ 4 Dabu ma ibana tu tano jala dibege ma soara na mandok, “Saulus, Saulus, boasa dibahen ho na haccit tu au?” 5 Didok si Saulus ma, “Ise do ho Tuan?” Dialusi ibana ma, “Jesus do au,+ na disiksami.+ 6 Saonari jongjong ma ho jala lao ma ho tu kota. Disi pe dipaboa tu ho aha na ikkon ulahononmu.” 7 Gabe tarhatotong ma dongan sapardalanan ni si Saulus i. Ai dibege nasida do soara i, alai dang adong diida nasida manang ise.+ 8 Dung i jongjong ma si Saulus, tikki dibukka ibana matana dang boi be diida manang aha. Ditogu-togu akka donganna i ma ibana jala diboan tu Damaskus. 9 Tolu ari ma ibana dang boi marnida.+ Saleleng tolu ari i, dang mangan jala dang minum ibana.
10 Adong do di Damaskus sahalak sisean na margoar si Ananias.+ Marhite parnidaan, didok Tuan i ma tu ibana, “Ananias!” Dialusi ibana ma, “Dison do au Tuan.” 11 Ninna Tuan i ma tu ibana, “Lao ma ho tu jabu ni si Judas na di Dalan Lurus i. Lului ma disi na margoar si Saulus na sian Tarsus,+ ai martangiang do ibana saonari. 12 Jala marhite parnidaan, diida ibana do ro sasahalak na margoar si Ananias lao manjama ibana asa boi marnida muse.”+ 13 Alai dialusi si Ananias ma, “Tuan, nungnga godang na hubege taringot tu ibana. Godang do dibahen ibana na jahat tu akka halak na badiami di Jerusalem. 14 Jala dipaloas malim kepala* do ibana manakkup* sude na manjou goarmu di inganan on.”+ 15 Alai didok Tuan i ma tu ibana, “Lao ma ho! Ai nungnga hupillit ibana+ lao marbarita na uli taringot tu au tu akka bangso,+ tu akka raja,+ dohot tu halak Israel. 16 Ai takkas ma patuduhonokku tu ibana akka hasusaan na ikkon taononna alani goarhu.”+
17 Lao ma si Ananias jala masuk ma ibana tu jabu i. Dibahen ibana ma tanganna tu atas ulu ni si Saulus, ninna ma, “Saulus, dongan, Tuan Jesus do na manuru au ro tuson. Ibana do na diida ho tikki di pardalanan i. Disuru ibana do au ro tuson asa boi ho marnida muse jala asa digohi tondi parbadia ho.”+ 18 Laos satokkin i, madabu ma na songon sisik ni dekke sian matana, gabe boi ma ibana marnida muse. Jongjong ma ibana dung i tardidi. 19 Mangan ma ibana jala margogo ma ibana muse.
Saleleng piga-piga ari, tinggal ma ibana rap dohot akka sisean na adong di Damaskus.+ 20 Dung i pittor dibaritahon ibana ma di akka sinagoga, na Anak ni Debata do Jesus i. 21 Alai gabe tarsonggot ma roha ni sude halak na manangihon ibana. Didok nasida ma, “Ai dang ibana na mambahen marsitaonon halak na manjou goar ni Jesus di Jerusalem?+ Ai na lao manakkup nasida do ibana kan umbahen na ro tuson, asa boi boanonna tu malim kepala?”+ 22 Alai lam malo ma si Saulus mangajari. Boi do takkas dipatuduhon ibana, Jesus i do Kristus.+ Alani i, dang taralo ni halak Jahudi na di Damaskus be hatoranganna i.
23 Dung salpu piga-piga ari, marpungu ma halak Jahudi lao mangalului cara mambunu si Saulus.+ 24 Arian dohot borngin dijaga nasida ma akka gerbang ni kota, asa boi dibunu nasida ibana. Alai tarboto do rencana ni nasida i tu si Saulus. 25 Tikki borngin, diboan akka sisean i ma ibana tu sada lubang na di tembok kota jala dipaturun ma ibana sian i mamakke karanjang.+
26 Dung sahat di Jerusalem,+ lomo do roha ni si Saulus naeng pajuppang dohot akka sisean na disi. Alai mabiar do sude sisean i tu ibana, ai dang porsea nasida naung gabe sisean ni Jesus si Saulus. 27 Dung i, ro ma si Barnabas+ mangurupi si Saulus jala diboan ma ibana tu akka apostel. Dipatorang si Barnabas ma tu nasida naung diida si Saulus do Tuan i di pardalanan+ jala naung makkatai Tuan i tu ibana. Laos dipatorang do muse taringot tu habaranion ni si Saulus makkatai di bagasan goar ni Jesus di Damaskus.+ 28 Dung i gabe sai rap ma si Saulus dohot nasida. Diihutton ibana ma akka apostel i tikki didalani nasida Jerusalem jala dang mabiar ibana makkatai di bagasan goar ni Tuan i. 29 Makkatai jala marsoal ma ibana dohot akka halak Jahudi na marbahasa Junani. Alai gabe naeng dibunu nasida ma ibana.+ 30 Dung diboto akka dongan sahaporseaon taringot tu na masa i, diboan nasida ma ibana tu Kaesarea jala dipaborhat ma ibana tu Tarsus.+
31 Manang na piga-piga leleng, lam dame jala lam togu ma sude huria di Judea, di Galilea, dohot di Samaria.+ Lam tamba ma godang ni sisean i, ai dihabiari nasida do Jahowa* di parngoluon ni nasida jala diihutton nasida do tudu-tudu ni tondi parbadia.+
32 Tikki didalani si Petrus sude luat i, didapotton ibana do muse akka na badia na maringanan di Lidda.+ 33 Pajuppang ma ibana disi dohot sahalak bawa na lumpu na margoar si Eneas. Nungnga ualu taon ibana peak di podoman. 34 Didok si Petrus ma tu ibana, “Ale Eneas, malum ma ho bahenon ni Jesus Kristus.+ Jongjong ma ho, padenggan ma podomanmi.”+ Dung i pittor jongjong ma ibana. 35 Sude do na maringanan di Lidda dohot di Saron mangida ibana, alani i gabe porsea ma nasida tu Tuan i.
36 Di Joppe, adong ma sahalak sisean na margoar si Tabita, molo diterjemahon lapatanna “Dorkas”.* Godang do akka na denggan diulahon ibana jala diurupi do akka na pogos. 37 Alai di tikki i, marsahit ma ibana laos mate. Diparidi nasida ma bakkena jala dipeakkon ma di kamar parginjang. 38 Jonok do Lidda tu Joppe. Alani i tikki dibege akka sisean na di Joppe na di Lidda do si Petrus, disuru nasida ma dua halak sisean mandapotton ibana. Didok nasida ma tu si Petrus, “Hatop ma jo ho ro tuson.” 39 Satokkin i, borhat ma si Petrus rap dohot nasida. Dung sahat, ditogihon nasida ma ibana tu kamar parginjang i. Sude ma akka ina na mabalu na disi mandapotton ibana huhut tumatangis. Dipatuduhon nasida ma sude abit na dibahen si Dorkas di nasida tikki mangolu dope ibana. 40 Disuru si Petrus ma kaluar nasida sude.+ Dung i marsinggang ma ibana huhut martangiang. Diida ibana ma doppak bakke i jala ninna ma, “O Tabita, hehe ma ho!” Dung i bukka ma matana, diida ma si Petrus, jala hundul ma ibana.+ 41 Ditiop si Petrus ma tanganna, ditogu ma ibana asa jongjong. Dung i dijou si Petrus ma akka na badia dohot akka ina na mabalu i, laos dipatudu ma tu nasida naung mulak mangolu si Dorkas.+ 42 Rarat ma barita i tu sude luat na di Joppe, gabe godang ma halak na porsea tu Tuan i.+ 43 Saleleng piga-piga ari, tinggal ma si Petrus di Joppe, di jabu ni sahalak tukkang kulit na margoar si Simon.+