Ulaon ni Apostel

27 Dung dibahen keputusan na ikkon markapal hami tu Italia,+ dipasahat ma si Paulus dohot piga-piga tahanan na asing tu si Julius, sahalak perwira sian pasukan Agustus. 2 Nakkok ma hami tu kapal na sian Adramitium na lao marlayar tu sude pelabuhan di Provinsi Asia. Dohot do si Aristarkus+ halak Makedonia na sian Tessalonik mandongani hami. 3 Marsogotna i, so ma hami di pelabuhan na di Sidon. Burju do si Julius tu si Paulus, diloas do ibana mandapotton akka donganna. Alani i boi ma diurupi nasida si Paulus.

4 Borhat ma hami muse sian i. Alai maralo do parro ni alogo tu pardalan ni kapalnami. Gabe marlayar ma hami sian topi ni Pulo Siprus, asa tarondingi sian alogo i. 5 Dibolus hami ma laut na bidang na di jolo ni Kilikia dohot Pampilia. Dung i so ma hami di pelabuhan na di Mirra di Likia. 6 Dapot ni perwira i ma disi kapal na ro sian Aleksanderia na lao marlayar tu Italia. Disuru ma hami nakkok tu kapal i. 7 Saleleng piga-piga ari lambat do pardalan ni kapalnami i. Alai nang pe maol, sahat do hami di Knidus. Ala maralo do parro ni alogo tu pardalan ni kapalnami i, marlayar ma hami sian topi ni Pulo Kreta mangalewati Salmone asa terlindung kapalnami. 8 Maol do hami marlayar paihut-ihut topi ni pulo i. Alai nang pe songon i, sahat ma hami tu sada inganan na margoar Pelabuhan na Uli, na jonok tu kota Lasea.

9 Nungnga godang habis tikkinami na marlayar i jala nungnga salpu tikki marpuasa di Ari Pardamean.*+ Ala godang do bahaya na ro molo markapal tikki i, gabe didok si Paulus ma 10 tu nasida, “Hamu akka dongan, huhilala parohon hasusaan dohot harugian na balga do molo torus hita marlayar. Boi do gabe lonong kapal dohot akka barang na dison jala boi do gabe mate hita.” 11 Nang pe songon i dang dioloi perwira i hata ni si Paulus, hata ni na mamboan dohot nappuna kapal i do ditangihon ibana. 12 Tutu, hurang denggan do molo di pelabuhan i nasida saleleng musim dingin. Alani i godang do sian nasida na mandok asa torus marlayar sahat tu Penike, i ma sada pelabuhan di Pulo Kreta na menghadap tu timur laut dohot tenggara. Molo boi, naeng disi do nasida sappe lewat musim dingin.

13 Ala nanget do alogo mangullus sian selatan, dirippu nasida ma boi sahat nasida tu Penike. Ditarik nasida ma jangkar, dung i marlayar ma nasida paihut-ihut topi ni Pulo Kreta. 14 Alai dang sadia leleng, ro ma alogo na massai gogo manombom kapal i. Digoari do i alogo Timur Laut.* 15 Disarat alogo i ma kapal i, jala dang boi be marlayar kapal i mangalo alogo i alani gogona. Gabe hupasombu hami ma kapal i diboan alogo i. 16 Alai tarondingi ma hami saotik tikki diboan alogo i hami tu topi ni sada pulo na gelleng, na digoari Pulo Kauda. Nang pe songon i, loja do hami mampartahatton sekoci* na adong di pudi ni kapal i. 17 Dung dipanakkok sekoci i, dililit nasida ma tali tu bagian partoru ni kapal i asa togu kapal i. Dung i, dipaturun nasida ma layar ala mabiar nasida kandas di Sirtis.* Dipasombu nasida ma kapal i mumbang-umbang mangihutton pamboan ni alogo. 18 Ala torus do diboan alogo na massai gogo i hami, gabe dipambolokkon nasida ma marsogotna i deba muatan ni kapal i asa neang kapal i. 19 Dung i di ari patoluhon, dibolokkon nasida ma muse parkakas ni kapal i tu laut.

20 Saleleng piga-piga ari, dang adong tarida mataniari dohot bintang jala torus dope ditombom alogo na gogo i kapalnami. Didok rohanami mate nama hami sude. 21 Nungnga leleng nasida dang mangan, gabe jongjong ma si Paulus di tonga-tonga ni nasida, ninna ma, “Hamu akka dongan, autsura ditangihon hamu hian hatakku, jala molo dang marlayar hian hita sian Kreta, dang pola taonotta hasusaan dohot harugian on.+ 22 Alai saonari hupangido ma tu hamu, pos ma rohamuna. Ai dang adong manang na ise sian hita na mate, holan kapal on do na lao hancur. 23 Na bodari, jongjong do di labbungku suru-suruan+ ni Debata, i ma Debata nappuna au jala na husomba. 24 Jala ninna ma, ‘Unang mabiar ho Paulus. Ikkon jongjong do ho di jolo ni Kesar.+ Jala alani ho, patuduon ni Debata ma asi ni rohana, selamat do bahenonna sude donganmu na sakapal i.’ 25 Alani i pos ma rohamuna akka dongan, unang pola mabiar hamu. Ai porsea do au bahenon ni Debata do songon na nidokna i. 26 Nang pe songon i, ikkon kandas do kapal on di sada pulo.”+

27 Nungnga 14 ari 14 borngin hami di laut. Mumbang-umbang dope kapalnami di Laut Adria. Di tonga borngin, dihilala akka anak buah ni kapal i ma naung jonok kapal i tu darat. 28 Diukkur nasida ma sadia bagas aek i, gabe diboto nasida ma hira-hira 36 meter* ma bagasna. Dung maju nasida saotik, diukur nasida ma muse, jala diboto nasida ma nungnga hira-hira 27 meter* bagasna. 29 Ala mabiar nasida kandas kapal i tu batu karang, didabuhon nasida ma opat jangkar sian pudi ni kapal i. Jala didok rohanami, tibu ma nian torang ari. 30 Alai naeng lari ma akka anak buah ni kapal i, dipaturun nasida ma sekoci tu laut. Dibahen ma hira naeng paturunhon jangkar i nasida sian jolo ni kapal i. 31 Gabe didok si Paulus ma tu perwira dohot akka tentara i, “Molo dang torus di bagasan ni kapal on akka anak buah ni kapal i, dang mangolu hamu.”+ 32 Dung i diputusson akka tentara i ma tali ni sekoci i, jala dipasombu ma i maup.

33 Mandapotton manogot, dijujui si Paulus ma asa mangan nasida sude. Ninna ma, “Nungnga 14 ari hamu paima-imahon jala dang adong dope manang aha diallang hamu. 34 Alani i, mangan ma jo hamu. Porlu do hamu mangan asa mangolu hamu. Ai dang adong nanggo sada pe obukmuna na lao mago.” 35 Dung didok ibana songon i, dibuat ma roti jala didok ma mauliate tu Debata di jolo ni nasida sude. Diponggoli ma roti i, dung i diallang nasida ma. 36 Dang mabiar be nasida jala mangan ma nasida. 37 Adong ma 276 halak hami na di kapal i. 38 Dung butong nasida na mangan i, dibolokkon nasida ma gandum na adong di kapal i asa neang kapal i.+

39 Dung torang ari, adong ma diida nasida darat, alai dang ditanda nasida inganan i.+ Diida nasida ma sada teluk na adong topi ni lautna. Jadi dipikkiri nasida ma asa tusi marlabu kapal i molo boi. 40 Dung i diputusson nasida ma tali ni akka jangkar i jala dipasombu ma i lonong tu laut. Dipalua nasida ma akka tali ni kemudi. Dipanakkok nasida ma layar na di jolo ni kapal i asa diboan alogo kapal i tu darat. 41 Alai ditombom kapal i ma pasir na purguk na adong di toru ni laut i. Kandas ma kapal i disi, sakkot ma jolona jala dang boi be meret. Gabe puttar ma pudi ni kapal i ditombom galumbang.+ 42 Naeng dibunu akka tentara i ma sude tahanan i asa unang adong na marlange jala lari. 43 Alai diorai perwira i ma dibahen nasida songon i asa boi selamat si Paulus. Disuru ibana ma akka na malo marlange asa parjolo lao marlange tu darat. 44 Dung i ro ma muse akka na asing sian pudi mamakke akka papan dohot ponggol-ponggol ni kapal i. Ujungna selamat ma nasida sude jala sahat tu darat.+