Ulaon ni Apostel

17 Ditorusson si Paulus dohot si Silas ma pardalanan ni nasida. Dilewati nasida ma Ampipolis dohot Apolonia jala sahat ma nasida di Tessalonik.+ Adong do disi sinagoga* ni halak Jahudi. 2 Songon na somal,+ didapotton si Paulus ma nasida. Makkata-hatai ma ibana dohot nasida ganup ari Sabat saleleng tolu minggu. Dipatorang ibana do tu nasida isi ni Surat na Badia i.+ 3 Dipatorang jala dipatuduhon ibana ma marhite akka ayat, na ikkon marsitaonon Kristus i+ jala dipahehe sian na mate.+ Ninna ma, “Jesus na hubaritahon i tu hamu, ibana do Kristus i.” 4 Gabe porsea ma piga-piga sian nasida jala diihutton nasida ma si Paulus dohot si Silas.+ Jala godang do halak Junani naung manomba Debata dohot akka borua na sangap i gabe porsea.

5 Gabe muruk ma halak Jahudi.+ Dipapungu nasida ma akka pareman na sian pasar na so adong karejona. Marpungu ma nasida lao mambahen guttur kota i. Lao ma nasida tu jabu ni si Jason mangalului si Paulus dohot si Silas asa boanonna tu jolo ni na manggutturi i. 6 Alai dang dapot ni nasida si Paulus dohot si Silas disi, gabe disarat nasida ma si Jason dohot piga-piga akka dongan tu jolo ni akka pamaretta di kota i. Gogo ma didok nasida, “Nungnga dison be akka halak na manggutturi liat portibi on.+ 7 Jala si Jason on do na manjalo nasida di jabuna. Dialo nasida do akka paretta ni Kesar. Ai didok nasida do adong raja na asing, i ma Jesus.”+ 8 Dung dibege akka jolma i hata i, gabe gaor ma nasida dohot akka pamaretta i. 9 Alai dung dijalo nasida hepeng jaminan sian si Jason dohot sian dongan na asing i, diloas ma nasida lao.

10 Di borngin i, pittor dipaborhat akka dongan i ma si Paulus dohot si Silas tu Berea. Dung sahat nasida disi, masuk ma nasida tu sinagoga ni halak Jahudi. 11 Urringgas do halak na di Berea marsiajar sian halak na di Tessalonik. Ai dijalo nasida do hata ni Debata sian nasa rohana. Ganup ari do dipareso nasida Surat na Badia i lao mangida sittong manang dang na dibege nasida. 12 Alani i, godang ma sian nasida na gabe porsea. Godang do bawa dohot borua na sangap sian halak Junani na gabe porsea. 13 Dibege halak Jahudi na di Tessalonik ma naung dibaritahon si Paulus hata ni Debata di Berea. Gabe ro ma nasida tusi jala dihasut ma akka jolma na disi lao mangalo nasida.+ 14 Pittor disuru akka dongan na disi ma asa ditaruhon si Paulus tu huta na di topi ni laut.+ Anggo si Silas dohot si Timoteus, tinggal dope disi. 15 Alai ditaruhon do si Paulus sahat tu Atena. Didok si Paulus ma tu nasida asa disuru hatop ro si Silas dohot si Timoteus+ mandapotton ibana. Dung i mulak ma nasida.

16 Tikki di Atena si Paulus paimahon si Silas dohot si Timoteus, marsak ma rohana mangida godang ni akka patung sisombaon di kota i. 17 Dung i, lao ma ibana tu sinagoga. Diajari ibana ma akka halak Jahudi dohot halak na sian bangso na asing naung manomba Debata. Diurupi ibana do nasida asa mangattusi isi ni Surat na Badia i. Jala ganup ari do ibana lao tu pasar mangajari ganup halak na adong disi. 18 Dung i marsoal ma si Paulus dohot deba sian na mangihutton ajaran Epikurus* dohot ajaran Stoa.* Adong ma na mandok, “Aha do naeng dohonon ni sigodang hata on?” Na asing muse mandok, “Debata na asing do ra na dipaboa ibana.” Didok nasida pe songon i, ala dibaritahon si Paulus do barita na uli taringot tu Jesus dohot taringot haheheonna.+ 19 Dung i diboan nasida ma si Paulus tu Areopagus.* Disukkun nasida ma, “Boi do paboaonmu tu hami ajaran baru na pinaboami? 20 Ai dang hea dope hubege hami taringot i, paboa ma jolo tu hami aha lapatanna.” 21 Lomo do roha ni sude halak Atena dohot akka halak panoppang na disi* mamakke tikkina lao makkata-hatai jala manangihon barita na baru. 22 Jongjong ma si Paulus di tonga-tonga ni Areopagus i,+ ninna ma,

“Hamu akka halak Atena, huida di sude ulaonmuna, dihabiari hamu do akka debatamuna lobi sian na dibahen halak na asing.+ 23 Tikki mardalan-dalan au di kotamuna on, huparrohahon ma akka na disomba hamu. Adong do huida sada langgatan jala tarsurat do disi, ‘Tu Debata na So Tatanda.’ Alani i, Debata na disomba hamu jala na so ditanda hamuna i do na lao paboaokku tu hamu. 24 Debata na manoppa portibi on dohot nasa isina, Ibana do Tuan ni langit dohot tano on.+ Dang di inganan na dibangun jolma Ibana tinggal.+ 25 Dang hurangan manang aha Ibana jala dang porlu urupan ni jolma Ibana.+ Ai Ibana do na mangalehon hangoluan, hosa,+ ro di saluhutna tu sude jolma. 26 Sian sada jolma+ do dibahen Ibana sude bangso na mangingani saluhut portibi on.+ Ibana do na manottuhon akka tikki jala Ibana do na manottuhon batas inganan ni nasida.+ 27 Ai lomo do roha ni Debata dilului akka jolma Ibana. Molo marsitutu nasida mangalului, juppang ni nasida ma Ibana.+ Ai sasittongna, dang dao Ibana sian ganup hita on. 28 Alani Ibana do hita gabe adong, marhosa, jala mangolu. Songon na didok di akka uppasa, ‘Ai sude do hita anakkonna.’

29 “Attong, ala anak ni Debata do hita,+ unang ma tapikkir na songon patung na dipature tangan ni jolma Debata i, na dibahen sian mas, perak, manang batu.+ 30 Tutu, hea do dipasombu Debata jolma dang mananda Ibana.+ Alai saonari, dipangido Debata do tu sude jolma asa muba nasida, manang didia pe nasida maringanan. 31 Ai nungnga ditottuhon Debata andigan arina lao manguhumi portibi on.+ Adil do cara ni Ibana manguhumi jala nungnga dipillit Ibana halak na lao mangulahon i. Dipahehe Debata do halak na dipillit i sian na mate,+ asa porsea sude jolma na tutu ro ari panguhuman i.”

32 Tikki dibege nasida dipaboa ibana na mulak mangolu halak naung mate, adong ma deba sian nasida mangarehei si Paulus,+ na deba nai muse mandok, “Sahali nai ma patorang taringot tusi.” 33 Dung i ditinggalhon si Paulus ma nasida. 34 Alai adong do deba na mangihutton ibana jala gabe porsea. Uppamana si Dionisius sahalak hakim sian pengadilan Areopagus, dohot sahalak borua na margoar si Damaris jala godang dope na asing.