Psalmen
Taringot tu si Salomo.
72 Ale Debata, bahen ma asa diihutton raja i hatigoranmu tikki mangadili,
2 Sai anggiat ma dibahen ibana na sittong lao mambela bangsom,
Jala sai anggiat ma dibahen ibana na tigor tu akka na pogos.+
3 Sai anggiat ma dihilala bangsom hadameon alani akka dolok,
Jala sai anggiat ma diparo dolok-dolok akka na sittong tu nasida.
4 Sai anggiat ma dibela ibana* akka na dangol na adong di tonga-tonga ni bangso i.
Sai anggiat ma dipalua ibana akka na pogos,
Jala sai anggiat ma dibahen ibana hancur akka panipu.+
5 Pasangapon ni nasida ma Ho saleleng adong dope mataniari,
Saleleng adong dope bulan,
Sahat tu saleleng ni lelengna.+
6 Dos ma ibana songon udan na use tu akka rumput.
Dos songon udan na mambahen maraek tano on.+
7 Saleleng mamaretta ibana, gabe lam denggan ma ngolu ni* halak na tigor marroha,+
Dos ma nasida songon suan-suanan na lomak.
Jala gok ma hadameon+ sahat tu na so adong be bulan.
8 Na lao mamaretta ma ibana mulai sian laut na di timur sahat tu laut na di barat.
Jala na lao mamaretta ma ibana mulai sian Sunge Euprat sahat tu ujung ni tano on.+
9 Marsinggang ma tu ibana akka halak na tinggal di gurun.
Jala taluhonon ni raja i ma akka musuna.+
10 Lehonon ni akka raja na sian Tarsis dohot na sian akka pulo ma pajak* tu ibana.+
Boanon ni akka raja na sian Syeba dohot na sian Seba ma silehon-lehon tu ibana.+
11 Marsinggang ma sude raja tu ibana,
Jala sude ma bangso mangoloi ibana.
12 Ai paluaonna do akka halak na pogos na jou-jou mangido asa diurupi,
Jala paluaonna do akka na dangol dohot na so adong pangalu-aluanna.
13 Asi do rohana tu halak na dangol dohot tu halak na pogos,
Jala dijaga ibana do ngolu ni halak na pogos.
14 Paluaonna do nasida sian akka halak na manusai nasida dohot sian halak na kejam,
Ai arga do ngolu* ni nasida di ibana.
15 Sai anggiat ma ganjang umur ni raja i jala dilehon tu ibana mas na sian Syeba.+
Sai anggiat ma ditangiakkon akka halak ibana,
Jala toktong ma ibana dipasu-pasu.
16 Godang ma tubu sipanganon di ladang,+
Haru di pussu ni dolok pe godang do tubu suan-suanan.
Ramos do parbuena songon na di Tombak Libanon.+
Jala lam godang ma akka halak na di kota dos songon suan-suanan na di tano on.+
17 Sai anggiat ma martahan goarna saleleng ni lelengna,+
Sai anggiat ma lam tarbarita goarna saleleng adong dope mataniari.
Sai anggiat ma dapotan pasu-pasu akka halak alani ibana.+
Jala sai anggiat ma saluhut bangso mandok ibana marlas ni roha.
18 Sai dipuji ma Debata Jahowa, Debata ni Israel,+
Holan Ibana do na mambahen akka ulaon na palongang roha.+
19 Sai anggiat ma dipuji goarna na sangap i saleleng ni lelengna,+
Sai anggiat ma digohi hasangaponna tano on,+
Amen, Amen.
20 On ma tangiang ni si Daud anak ni si Isai.+