2 Musa
15 Tikki i, diendehon si Musa dohot halak Israel ma sada ende pujian tu Jahowa.+ Songon on ma endena:
“Marende ma au tu Jahowa, ai nungnga monang Ibana jala marmulia.+
Disappatton Ibana do hoda dohot akka tentarana tu laut.+
2 Jahowa* do na mambahen au togu jala gogo. Ibana do Sipalua au.+
Ibana do Debatakku, jala pujiokku ma Ibana.+ Ibana do Debata ni akka ompukku,*+ pasangapokku ma Ibana.+
3 Tentara na gogo do Jahowa.+ Jahowa do goarna.+
4 Disappatton Ibana do akka kareta porang ni si Firaun rap dohot tentarana tu laut,+
Jala dilonokkon do akka tentarana na unjago di Laut Merah.+
5 Galumbang ni laut manutupi nasida. Lonong do nasida sude tu laut na bagas i songon batu.+
6 Ale Jahowa, massai gogo do tangan kananmi,+
Ale Jahowa, marhite tangan kananmi boi do diropukkon Ho musum.
7 Massai jago do Ho, sappe boi do dipamate Ho sude na mangalo Ho,+
Songon api do murukmi, na manutung nasida sude songon durame.
8 Hosam do dibahen Ho papunguhon aek i
Jongjong do aek i songon dinding;
Aek na margalumbang i so di tonga-tonga ni laut i.
9 Didok musu i do, ‘Ikkon lumbaokku do nasida jala takkupokku!
Buatokku ma arta ni nasida, bagi-bagiokku sahat tu na puas rohakku!
Tarikokku ma podangku! Tanganku ma na pamatehon nasida!’+
10 Holan diombusson Ho hosam, ditutupi laut i ma nasida.+
Lonong ma nasida tu bagasan ni laut na bagas i songon logam na borat.
11 Ale Jahowa, ise ma debata na asing na songon Ho?+
Massai badia do Ho,+ dang adong debata na asing na songon Ho.
Tama do Ho dipuji marhite akka ende, ai dibahen Ho do akka mukjizat.+
12 Diangkat Ho ma tangan kananmi, jala diboddut tano on ma nasida.+
13 Marhite holongmi,* ditogu-togu Ho do bangso na ditobusmi.+
Marhite gogom, ditogu-togu Ho do nasida tu ingananmu na badia i.
14 Begeon ni akka bangso ma i,+ jala makkahitir ma nasida alani biarna.
Jala haccit* ma pakkilalaan ni halak Palistim.
15 Tikki i, mabiar ma akka kepala suku ni halak Edom.
Jala mandele ma sude rakyat ni Kanaan.+
16 Mabiar do sude nasida jala makkahitir.+
Alani huasom na massai balga i, so ma nasida sude songon batu,
Sahat tu na lewat akka bangsomi, ale Jahowa,
17 Boanonmu ma nasida tu dolokmu jala bahenonmu ma nasida tinggal disi.*+
I do inganan na diparade Ho lao gabe ingananmu, ale Jahowa.
Inganan na badia do i ale Jahowa, tanganmi do na pajongjokkon i.
18 Jahowa ma na gabe raja saleleng ni lelengna.+
19 Tikki ro hoda ni si Firaun dohot kareta porangna, dohot akka tentarana mangalumba sahat tu laut i,+
Dibahen Jahowa do mulak aek i mangaup nasida,+
Alai mardalan do halak Israel di tano na mahiang di tonga-tonga ni laut i.”+
20 Dung i ro ma si Miryam panurirang* borua, iboto ni si Aron i. Diboan ibana ma rebana* jala diihutton sude borua ma ibana manortor huhut mamakke rebana. 21 Dialusi si Miryam ma ende ni akka bawa i. Songon on ma endena,
“Marende ma tu Jahowa, ai nungnga monang Ibana jala marmulia.+
Disappatton Ibana do hoda dohot akka tentarana tu laut.”+
22 Dipimpin si Musa ma halak Israel i borhat sian Laut Merah tu Gurun Sur. Mardalan ma nasida di padang belantara i saleleng tolu ari, alai dang adong dapot ni nasida aek. 23 Ujungna sahat ma nasida di Mara.*+ Alai dang boi diinum nasida aek na disi ala paet. I do alana dibahen goar ni inganan i Mara. 24 Marungut-ungut ma nasida tu si Musa.+ Didok ma, “Jadi aha nama inumotta?” 25 Dipangido si Musa ma tu Jahowa asa diurupi nasida.+ Dipatudu Jahowa ma sada hau tu ibana. Disappatton si Musa ma hau i tu aek i, jala gabe manis ma aek i.
Dung i, dibahen Debata ma na masa i gabe contoh di nasida, asa diboto nasida aha na dipangido Debata sian nasida. Diuji Debata ma nasida asa diboto na tutu do nasida mangoloi Ibana manang na dang.+ 26 Didok Debata ma, “Molo sian nasa rohamuna do hamu mangoloi hata ni Jahowa Debatamuna, diulahon hamu na sittong di jolona, diparrohahon hamu akka parettana,+ jala dioloi hamu sude aturanna, dang hukumokku hamu marhite parohon sahit songon na hubahen tu halak Mesir i.+ Ai Au do Jahowa na toktong mambahen hamu sehat.”+
27 Dung i sahat ma nasida di Elim. Adong do disi 12 mata mual dohot 70 hau palem. Markemah ma nasida di jonok ni mual i.