Na disurat si Mateus
11 Dung dilehon Jesus tudu-tudu tu siseanna na 12 i, borhat ma Jesus sian i lao mangajari dohot marbarita tu akka kota na jonok tusi.+
2 Tikki di penjara+ si Johannes dibege ibana ma taringot tu akka ulaon ni Kristus. Dung i disuru ibana ma akka siseanna+ 3 manukkun Jesus, “Ho do na lao ro i, manang paimaonnami dope na asing?”+ 4 Dialusi Jesus ma nasida, “Lao ma hamu jala paboa ma tu si Johannes aha naung dibege hamu dohot aha naung diida hamu.+ 5 Na mapitung boi marnida,+ na pakpang boi mardalan, na marsahit kusta*+ dipamalum, na nengel marbinege, na mate dipangolu, jala barita na uli+ dibaritahon tu halak na pogos. 6 Marlas ni roha ma halak na so tartuktuk alani au.”+
7 Dung lao nasida sian i, didok Jesus ma tu akka halak na disi taringot tu si Johannes, “Aha do na diida hamu di padang gurun?+ Mangida batang ni bulu na niullus ni alogo do?+ 8 Jadi, aha do na diida hamu disi? Sahalak bawa na marpakkean na arga do? Di istana do tinggal halak na marpakkean sisongon i. 9 Sasittongna, aha do na diida hamu disi? Mangida panurirang* do? Tutu, panurirang do memang ibana. Alai hudok ma tu hamu, umbalga do ibana sian sahalak panurirang.+ 10 Ibana do na nidok ni na tarsurat i, ‘Suruokku ma utusanku lao manjoloani ho. Ibana ma na lao paradehon dalan di jolom!’+ 11 Situtu do na hudok on tu hamu, sian sude jolma na hea ditubuhon sahalak borua, dang adong na umbalga sian si Johannes Pandidi. Alai na ummetmet di Harajaon banua ginjang i, umbalga do sian ibana.+ 12 Sian tikki ni si Johannes Pandidi sahat tu saonari, marsitutu do akka halak asa boi masuk tu Harajaon banua ginjang. Jala manang ise na marsitutu mangalului i pasti dapotna do i.+ 13 Holan taringot aha na lao masa sahat tu tikki ni si Johannes+ do na dipaboa di sude na Sinurat ni Akka Panurirang dohot Patik ni si Musa. 14 Alani i, porsea manang dang porsea hamu tu si Johannes, ibana do ‘si Elia na lao ro i’.+ 15 Manang ise na marpinggol, dibege ma i.
16 “Tu ise ma patudoson sundut on?+ Tudos do sundut on songon dakdanak na hundul di onan na manjou donganna marmeam. 17 Didok nasida do, ‘Marsuling do hami, alai dang manortor hamu. Diendehon hami do ende andung-andung, alai dang lungun rohamuna.’ 18 Suang songon i ma, tikki ro si Johannes, marpuasa do ibana jala dang diinum anggur, alai didok halak do, ‘Na disonggopi suru-suruan na jahat do ibana.’ 19 Jala tikki ro Anak ni jolma i, mangan do ibana jala diinum do anggur,+ alai didok halak do, ‘Ida ma, simokkus jala sisobur anggur do ibana, dongan ni sijalo pajak dohot akka pardosa.’+ Nang pe songon i, tarida do bisuk sian parniulaonna.”+
20 Dung i, muruk ma Jesus tu penduduk ni akka kota inganan ni ibana mambahen godang tanda halongangan.* Ai dang olo nasida muba. 21 Ninna ma, “Marjea ma ho Korasin, marjea ma ho Betsaida! Autsura di Tirus dohot di Sidon masa tanda halongangan na hubahen tu hamu, nungnga sian najolo nasida muba. Nungnga sian najolo nasida marabit goni jala hundul di sirabun.+ 22 Alai hudok ma tu hamu, ubborat do hukuman na lao dibahen tu hamu sian tu Tirus dohot tu Sidon di Ari Panguhuman i.+ 23 Dohot ho Kapernaum,+ dirippu ho naeng patimboon ho sahat tu langit? Tu Kuburan* do ho bahenon.+ Autsura di Sodom masa tanda halongangan na hubahen tu hamu, adong dope kota i sahat tu saonari. 24 Alai hudok ma tu hamu, ubborat do hukuman na lao dibahen tu hamu sian tu Sodom di Ari Panguhuman i.”+
25 Di tikki i didok Jesus ma, “Ale Amang, Tuan ni langit dohot tano on, hupuji do Ho di jolo ni godang halak. Ai dipapatar Ho do on tu halak na serep marroha na songon dakdanak, jala ditabunihon Ho do i sian akka halak na bisuk dohot halak na pistar.+ 26 Jala songon i do lomo ni roham ale Amang. 27 Nungnga dipasahat Damang saluhutna tu au.+ Dang adong na takkas mananda Anak i asing ni Ama i.+ Jala dang adong na takkas mananda Ama i asing ni Anak i. Boi do akka halak takkas mananda Ama i molo rade Anak i mangajarhon taringot tu Ama i.+ 28 Ro ma hamu tu au, hamu akka na loja jala na mamboan boban na borat, asa hupargogoi hamu. 29 Tuhuk hamu ma augakku* jala marsiajar ma hamu sian au asa marlas ni roha hamu. Ai na lambok jala na serep roha+ do au. 30 Ai lambok do* augakku jala neang do bobanku.”