Na disurat si Mateus
18 Di tikki i, ro ma akka sisean mandapotton Jesus, ninna ma, “Ise do na umbalga di Harajaon banua ginjang i?”+ 2 Jadi dijou Jesus ma sahalak dakdanak laos dipajongjong di jolo ni nasida, 3 ninna ma, “Tutu do na hudok on tu hamu, molo dang muba hamu jala gabe songon dakdanak on,+ dang masuk hamu tu Harajaon banua ginjang i.+ 4 Alani i, manang ise na patutoru dirina songon dakdanak on, ibana ma na umbalga di Harajaon banua ginjang i.+ 5 Jala manang ise na manjalo* sahalak dakdanak na songon on alani goarhu, na manjalo au do i. 6 Alai manang ise na mambahen sahalak sian na metmet on gabe dang porsea be tu au,* tumagon ma digattukkon batu gilingan na balga* tu rukkungna jala dilonokkon tu laut.+
7 “Marjea ma portibi on ala dibahen do sega haporseaon ni jolma!* Tutu, sai adong do na mambahen sega haporseaon ni jolma, alai marjea ma halak na mambahen songon i! 8 Alani i, molo tartuktuk ho alani tanganmu manang patmu, ponggol jala bolokkon ma i.+ Ai tumagon do ponggol sada tanganmu manang patmu alai dapotmu hangoluan, sian apala disi duassa tanganmi manang patmi alai gabe dibolokkon ho tu api sisaleleng ni lelengna.*+ 9 Molo mardosa ho alani matami, pulsikkon ma i jala bolokkon. Ai tumagon do holan sada matam alai dapotmu hangoluan, sian apala disi duassa matami alai gabe dibolokkon ho tu Gehena*+ na marsigorgor. 10 Unang ma leas rohamuna tu sahalak sian na metmet on. Hudok ma tu hamu, adong do akka suru-suruan ni nasida na sai rap dohot Damang na di banua ginjang i.+ 11* ——
12 “Songon dia do pandapotmuna? Molo adong 100 biru-biru ni sasahalak hape mago+ ma sada biru-biruna i, tottu ditadikkon ibana do na 99 i kan? Dung i lao ma ibana mangalului na sadana i.+ 13 Hudok ma tu hamu, molo dung dapotna i, umbalga do las ni rohana mangida biru-biru na sada i sian apala mangida na 99 na so lilu i. 14 Dos songon i ma, dang lomo roha ni Damang* na di banua ginjang i mago apala sada pe sian na metmet on.+
15 “Molo mardosa donganmu, dapotton ma ibana jala paboa ma aha salana,* holan hamu padua.+ Molo ditangihon ibana do ho, dapotmu ma muse donganmi.+ 16 Alai molo dang ditangihon ho, togihon ma sahalak manang dua halak donganmu manjuppangi ibana. Ai molo adong hatorangan sian dua manang tolu saksi, boi do didok na tutu hatorangan i.*+ 17 Jala molo so ditangihon ibana dope nasida, paboa ma tu huria. Molo tong dope dang olo ibana manangihon huria, etong ma ibana songon sahalak sian bangso na asing+ manang songon sijalo pajak.+
18 “Situtu do na hudok on tu hamu, manang aha naung diikkat hamu di tano on, naung diikkat do i di banua ginjang. Jala manang aha naung dipalua hamu di tano on, naung dipalua do i di banua ginjang. 19 Hudok ma muse tu hamu, molo adong dua halak sian hamu di tano on na mardos ni roha mangido na rikkot, lehonon ni Damang na di banua ginjang i do i.+ 20 Ai molo adong dua manang tolu halak marpungu di bagasan goarhu,+ di tonga-tonga ni nasida do au.”
21 Dung i, ro ma si Petrus jala disukkun ma Jesus, “Tuan, molo adong donganku na marsala tu au, ikkon piga hali do sesaokku salana? Sampe pitu hali do?” 22 Didok Jesus ma tu ibana, “Hudok ma tu ho, dang pitu hali alai sappe 77 hali do.*+
23 “Alani i do dipatudos Harajaon banua ginjang i tu sahalak raja na mambahen paretongan tu akka hatobanna. 24 Tikki na maretong i ibana dohot akka hatobanna, diboan ma sahalak hatoban na marutang 10.000 talenta* tu ibana. 25 Dang targarar ni hatoban i utangna i. Alani i, diparettahon raja i ma asa digadis ibana, istrina, anakkonna, dohot saluhut na adong di ibana lao manggarar utangna i.+ 26 Alai marsinggang ma hatobanna i tu ibana, ninna ma, ‘Sabar ma jo ho tuan, hugarar pe sude utangki.’ 27 Gabe asi ma roha ni raja i, dipalua ma hatobanna i jala disesa ma utangna.+ 28 Alai tikki kaluar hatoban i, pajuppang ma ibana dohot donganna hatoban na marutang 100 dinar* tu ibana. Ditakkup ma donganna i jala disokkik, ninna ma, ‘Garar sude utangmi.’ 29 Dung i, marsinggang ma donganna i mangelek-elek. Didok donganna i ma, ‘Sabar ma jo ho, hugarar pe sude utangki.’ 30 Alai dang olo ibana, gariada dipenjarahon do donganna i sahat tu na digarar sude utangna i. 31 Tikki diida akka hatoban na asing na masa i, marsak situtu ma nasida. Lao ma nasida tu raja i, dipaboa ma sude na masa i. 32 Gabe dijou raja i ma ibana, ninna ma, ‘Hatoban na jahat do ho, husesa do sude utangmu ala mangelek-elek ho tu au. 33 Alani i, ikkon asi do nian roham tu donganmu hatoban songon au na marasi ni roha tu ho.’+ 34 Gabe tarrimas ma raja i, dipenjarahon* ma ibana sahat tu na digarar sude utangna i. 35 Songon i ma bahenon ni Damang na di banua ginjang i tu hamu,+ molo dang disesa hamu hasalaan ni donganmuna sian rohamuna.”+