4 Musa
23 Didok si Bileam ma tu si Balas, “Pajongjong ma pitu langgatan di inganan on.+ Jala parade ma pitu lombu jantan dohot pitu biru-biru jantan di au.” 2 Pittor diulahon si Balas ma na nidok ni si Bileam i. Dipelehon si Balas dohot si Bileam ma sada lombu jantan dohot sada biru-biru jantan di ganup langgatan i.+ 3 Didok si Bileam ma tu si Balas, “Paima ma au tuan di labbung ni pelean situtungon on, asa lao au. Atik boha ro Jahowa manjuppangi au. Hupaboa pe tu ho manang aha na nidokna tu au.” Dung i lao ma si Bileam tu pussu ni sada dolok.
4 Dung i ro ma Debata manjuppangi si Bileam.+ Didok si Bileam ma tu Ibana, “Nungnga hupajongjong pitu langgatan. Jala nungnga hupelehon sada lombu jantan dohot sada biru-biru jantan di ganup langgatan i.” 5 Dipaboa Jahowa ma aha na ikkon dohonon ni si Bileam.*+ Jala didok Ibana ma, “Mulak ma ho tu si Balas. Jala ikkon songon i do dohononmu tu ibana.” 6 Dung i mulak ma si Bileam. Diida ibana ma si Balas rap dohot akka pejabat ni halak Moab jongjong di labbung ni pelean situtungon. 7 Didok ibana ma puisi on:+
“Diboan si Balas raja ni Moab do au sian Aram,+
Sian akka dolok na di timur.
Didok do, ‘Ro ma ho mamburai si Jakkob.
Ro ma ho mangaleai halak Israel.’+
8 Boha ma bahenokku mamburai halak na so diburai Debata?
Songon dia ma bahenokku mangaleai halak na so dileai Jahowa?+
9 Huida do nasida sian pussu ni dolok batu,
Hutatap do nasida sian atas ni dolok.
Holan bangso ni nasida do na tinggal disi,+
Didok roha ni nasida asing do nasida sian akka bangso+ na asing.
10 Ise ma na boi mangetong pinoppar ni si Jakkob na songon orbuk i godangna?+
Manang, ise ma na boi mangetong saparopat sian Israel i?
Lok ma mate au songon halak na tigor marroha,
Lok ma marujung ngolukku songon nasida.”
11 Dung i didok si Balas ma tu si Bileam, “Aha do na binahenmon? Hujou pe ho, na lao mamburai musukku do. Hape gabe dipasu-pasu ho do nasida.”+ 12 Dialusi si Bileam ma, “Holan na dipaboa Jahowa do na boi dohonokku tu ho.”+
13 Didok si Balas ma, “Beta, lao ma hita tu inganan na asing, asa idaonmu nasida sian i. Alai holan deba do sian nasida boi idaonmu, dang boi idaonmu nasida sude. Sian i ma burai nasida.”+ 14 Diboan si Balas ma si Bileam tu Zofim, tu pussu ni Pisga.+ Dipajongjong si Balas ma pitu langgatan jala dipelehon ibana ma sada lombu jantan dohot sada biru-biru jantan di ganup langgatan i.+ 15 Jadi didok si Bileam ma tu si Balas, “Paima ma au dison tuan, di labbung ni pelean situtungon on, asa lao au mandapotton Debata doppak an.” 16 Ro ma Jahowa mandapotton si Bileam. Jala dipaboa ma aha na ikkon dohononna.+ Didok ma, “Mulak ma ho tu si Balas. Jala ikkon songon i do dohononmu tu ibana.” 17 Dung i mulak ma si Bileam. Diida ibana ma si Balas paimahon di labbung ni pelean situtungon i. Rap do ibana dohot akka pejabat ni halak Moab. Disukkun si Balas ma, “Songon dia do didok Jahowa?” 18 Didok ibana ma puisi on:+
“Jongjong ma ho ale Balas jala bege ma.
Tangihon ma, ale anak ni si Zippor.
Tikki adong didok Ibana janjina, sai na pasautonna do i.
Tikki adong didok Ibana hatana, pasti ulahononna do i.+
20 Ida ma! Lao mamasu-masu do au disuru tuson,
21 Dang pasombuon ni Debata ilmu sihir manang aha pe mangalo si Jakkob,
Jala dang paloasonna hasusaan manang aha pe masa tu Israel.
Didongani Jahowa Debatana do nasida,+
Jala dipasangap do Ibana gabe rajana di tonga-tonga ni nasida.
22 Diboan Debata do nasida kaluar sian Mesir.+
Songon tanduk ni lombu jantan liar do Ibana di nasida.+
23 Dang adong ilmu ramal na boi parohon jea tu si Jakkob,+
Jala dang adong ulaon hadatuon na boi mangalo Israel.+
Saonari dohonon ni halak ma taringot tu si Jakkob dohot Israel:
‘Ida ma akka na binahen ni Debata!’
24 On ma bangso na lao jongjong songon singa,
Songon singa+ do ibana jongjong.
Dang na lao modom ibana molo so jolo diallang ibana mangsana,
Molo so jolo diinum ibana mudar ni binatang na dipamate ibana.”
25 Didok si Balas ma tu si Bileam, “Molo so boi diburai ho nasida, unang pola pasu-pasu.” 26 Dialusi si Bileam ma si Balas, “Kan nungnga hudok tu ho, ‘Na nidok ni Jahowa do ulahonokku!’”+
27 Didok si Balas ma tu si Bileam, “Attong beta ma tu inganan na asing. Atik boha molo sian i, paloason ni Debata na sittong i ho mamburai bangso i.”+ 28 Diboan si Balas ma si Bileam tu pussu ni Peor, na di jolo ni Yesyimon.*+ 29 Didok si Bileam ma tu si Balas, “Pajongjong ma pitu langgatan di inganan on. Jala parade ma pitu lombu jantan dohot pitu biru-biru jantan di au.”+ 30 Diulahon si Balas ma na nidok ni si Bileam i. Dipelehon si Balas ma sada lombu jantan dohot sada biru-biru jantan di ganup langgatan i.