5 Musa
18 “Dang adong parbagianan manang warisan ni akka malim halak Lepi i, dohot sude marga Lepi songon halak Israel na asing. Sian bagian ni Jahowa i do na diallang nasida, i ma pelean na ditutung dohot api tu Debata.+ 2 Alani i, dang adong warisan ni nasida di tonga-tonga ni donganna sabangso. Jahowa do na manjaga jala na mangalehon na porlu di nasida.* Ai songon i do didok Debata tu nasida.
3 “Sian akka pelean ni bangso i, akka on ma na gabe hak ni akka malim: Manang ise na mangalehon lombu manang biru-biru gabe peleanna, ikkon dilehon do hae-hae na sian pat bagian jolo ni binatang i, osang-osangna, dohot butuha ni binatang i tu malim. 4 Ikkon dilehon hamu do hasil panen na parjolo sian gandum, anggur na baru, dohot miak tu ibana.+ Jala ikkon dilehon hamu do muse hasil na parjolo sian ibbulu ni biru-birumuna na digusting hamu tu ibana. 5 Ai nungnga dipillit Jahowa Debatamuna i ibana dohot akka pinopparna sian sude margamuna lao marhobas di bagasan goar ni Jahowa saleleng ni lelengna.+
6 “Alai molo adong sian halak Lepi na lao sian sada kota na di Israel, i ma kota ingananna tinggal hian,+ jala naeng lao ibana tu inganan na pinillit* ni Jahowa,+ 7 boi do ibana marhobas disi, di bagasan goar ni Jahowa Debatana, songon na binahen ni donganna samarga, i ma halak Lepi na marhobas di jolo ni Jahowa di inganan i.+ 8 Tamba ni arta ni ompuna naung digadis ibana, dapot ni ibana do sipanganonna dos songon bagian na dijalo halak na asing.+
9 “Molo dung masuk hamu tu luat na lao lehonon ni Jahowa Debatamuna i tu hamu, unang ma dicoba hamu lao maniru akka ulaon ni bangso na disi.+ Ai magigi do Debata tu ulaon i. 10 Unang ma adong sian hamu na manutung anakkonna,*+ na mangaramal,+ na mamakke ilmu gaib,+ na mangido tanda sian datu,+ na mamakke ilmu sihir,+ 11 parula-ula,* na mangido tudu-tudu tu halak na boi makkatai tu na mate+ dohot tu peramal,+ manang na makkatai tu na mate.+ 12 Magigi do Jahowa tu manang ise pe na mangulahon akka ulaon i. Jala magigi do Jahowa Debatamuna tu akka ulaon i. Jala alani ulaon i do umbahen na diusir Debata akka bangso i sian jolomuna. 13 Ikkon ias situtu do hamu di jolo ni Jahowa Debatamuna.+
14 “Somal do akka bangso di luat na lao buatonmuna i manangihon poda sian halak na mamakke ilmu gaib+ dohot sian peramal.+ Alai diorai Jahowa Debatamuna i do hamu mangulahon sisongon i. 15 Na lao pilliton ni Jahowa Debatamuna i do di hamu sahalak panurirang* na songon au sian tonga-tongamuna. Ikkon ditangihon hamu do ibana.+ 16 Songon i ma alus ni Jahowa Debatamuna tu pangidoanmuna i. Ai marpungu do hamu tikki i di Horeb+ jala didok hamu do, ‘Unang be dibege hami soara ni Jahowa Debatanta i, jala unang be huida hami api na massai balga i asa unang mate hami.’+ 17 Dung i, didok Jahowa do tu au, ‘Denggan do na nidok ni nasida i. 18 Pillitokku ma sahalak panurirang na songon ho sian tonga-tonga ni nasida.+ Paboaokku ma hatakku tu ibana+ jala ibana ma na pasahatton sude hatakki tu nasida.+ 19 Jala pangidookku do pertanggung jawaban sian halak na so manangihon hatakku, i ma hata na dipaboa ibana di bagasan goarhu.+
20 “Alai molo adong panurirang na barani makkatai di bagasan goarhu, hape dang adong husuru ibana, manang makkatai ibana di bagasan goar ni akka debata na asing, ikkon dipamate do ibana.+ 21 Molo disukkun hamu songon on di bagasan rohamuna, “Alai songon dia ma taboto na so sian Jahowa hata na pinaboana i?” 22 Molo makkatai panurirang i di bagasan goar ni Jahowa, hape dang tutu masa hatana i, on patuduhon dang sian Jahowa hatana i. Na pabaranihu do panurirang i. Unang pola mabiar hamu tu ibana.’