Hesekiel

1 Di ari na palimahon, di bulan na paopatton, di taon na patolupuluhon, tinggal ma au rap dohot halak na ditawan+ di jonok ni Sunge Hebar.+ Di tikki i, bukka ma langit, jala mandapot parnidaan ma au sian Debata. 2 Di ari na palimahon di bulan i, i ma di taon na palimahon dung ditakkup jala diboan Raja Jehoyakin,+ 3 makkatai ma Jahowa tu si Hesekiel* anak ni Malim Busi di labbung ni Sunge Hebar, di luat ni halak Kasdim.+ Di inganan i, dihilala ibana ma huaso* ni Jahowa.+

4 Huida ma badai na mangullus+ sian utara. Adong ma ombun na balga mardongan kilat* na songon api.+ Di sakalilingna adong cahaya na tiur. Adong na marhillong di tonga-tonga ni api i, warnana songon mas na dicampur dohot perak.+ 5 Di tonga-tonga ni api i, adong opat na songon suru-suruan.+ Songon jolma do nasida idaon. 6 Ganup sian suru-suruan i adong opat bohina jala opat habongna.+ 7 Tigor do pat ni nasida jala talapak pat ni nasida songon talapak pat ni anak ni lombu. Marhillong do pat ni nasida songon tombaga naung digosok.+ 8 Adong do tangan ni nasida dos songon tangan ni jolma. Ganup tangan ni nasida i adong di toru ni habongna na opat i. Adong do bohi ni suru-suruan na opat i dohot habong ni nasida. 9 Masidaisan do habong ni nasida. Molo mardalan nasida dang diida nasida tu pudi. Tigor do nasida mardalan tu jolo.+

10 Songon on ma bohi ni nasida: Ganup sian nasida adong do bohina songon bohi ni jolma. Bohi ni nasida di sabola kanan songon bohi ni singa.+ Bohi ni nasida di sabola kiri songon bohi ni lombu jantan.+ Jala ganup sian nasida adong do bohina+ songon bohi ni lali.+ 11 Songon i ma bohi ni nasida. Herbang do habong ni nasida tu ginjang. Dua habong ni nasida na herbang i masidaisan jala habongna na dua nai manutupi dagingna.+

12 Tigor do nasida mardalan tu jolo. Jala tudia pe nasida diarahon tondi parbadia, tusi do nasida lao.+ Molo mardalan nasida dang diida nasida tu pudi. 13 Songon gara ni api na galak do suru-suruan i idaon. Di holang-kolang ni nasida adong do na songon obor na galak, mardalani tusan tuson. Kaluar do sian api i cahaya na songon kilat.+ 14 Tikki habang suru-suruan i tusan tuson, songon sillam do nasida idaon.

15 Tikki huparrohahon nasida, huida ma adong sada roda di sapping ni ganup suru-suruan na opat bohina i.+ Roda i adong di atas ni tano on. 16 Roda na opat i sarupa do bentukna. Jala marhillong songon batu krisolit. Bentukna idaon songon dua roda na dipasang marsilang.* 17 Molo mardalan akka roda i boi do nasida mardalan manang tu arah na dia pe, dang pola porlu diubah arahna. 18 Massai timbo do akka roda i. Gabe longang roha mangida. Gok do akka mata di pinggir ni roda na opat i.+ 19 Molo mardalan akka suru-suruan i, mangihut do mardalan akka roda i. Jala molo tarangkat akka suru-suruan i sian tano on, dohot do tarangkat akka roda i.+ 20 Manang tudia pe diarahon tondi parbadia i suru-suruan i lao, tusi do akka roda i mardalan. Molo tarangkat akka suru-suruan i, mangihut do akka roda i tarangkat. Ai tondi parbadia na mangarahon akka suru-suruan i pe, adong do di bagasan ni akka roda i. 21 Molo bergerak akka suru-suruan i, dohot do bergerak akka roda i. Molo so nasida, so do akka roda i. Molo tarangkat nasida sian tano on, dohot do akka roda i tarangkat. Ai tondi parbadia na mangarahon akka suru-suruan i pe, adong do di bagasan ni akka roda i.

22 Adong do di atas ni ulu ni akka suru-suruan i na songon lante na sian es. Marhillong do i, jala herbang do i di atas ni ulu ni nasida.+ 23 Herbang do habong ni akka suru-suruan i di toru ni lante i. Lurus do i herbang jala masidaisan. Ganup sian suru-suruan i adong dua habongna na manutupi sambola sian dagingna. Jala habongna na dua nai manutupi dagingna na sambola nai. 24 Hubege ma soara ni habong ni nasida, soarana songon aek na doras, songon soara ni Pargogo na So Hatudosan.+ Tikki mardalan nasida soarana songon pasukan tentara. Molo jongjong nasida di sada inganan, dipaturun nasida do habong ni nasida.

25 Dung i tarbege ma soara sian atas ni lante i na adong di atas ni ulu ni nasida. (Molo jongjong nasida di sada inganan dipaturun nasida ma habong ni nasida.) 26 Di atas ni lante na adong di atas ni ulu ni nasida i, adong ma na songon batu safir,+ bentukna songon tahta.+ Adong do sasahalak na songon jolma hundul di atas ni tahta i.+ 27 Huida ma sian pinggang sahat tu ginjang, songon mas na marcampur dohot perak do i idaon.+ Marhillong jala dikalilingi api. Sian pinggangna tu toru, idaon do ibana songon api.+ Jala di sakalilingna massai tiur, 28 songon pelangi+ di atas ni ombun di tikki ro udan. Songon i ma cahaya na massai tiur na adong di sakalilingna. Songon hamuliaon ni Jahowa do idaon.+ Tikki huida i, marsomba ma au. Dung i hubege ma adong soara ni sasahalak na makkatai.