Hesekiel

4 “Jala ho anak ni jolma, buat ma sada batu bata, peakkon ma i di jolom. Jala ukir ma kota Jerusalem di batu i. 2 Songon na hona kepung ma bahen kota i.+ Di sakalilingna adong tembok,+ benteng,+ perkemahan ni akka tentara, dohot akka masin na boi manghancurhon gerbang dohot tembok.+ 3 Buat ma sada tuangan na datar, jala bahen ma i songon tembok bosi di holang-kolangmu dohot kota i. Doppak kota i ma bahen bohim. Ikkon bahenonmu do songon i lao patuduhon songon dia kota i lao dikepung. Ai on ma na gabe sada tanda di halak Israel.+

4 “Ikkon modom do ho jala manapping tu sabola kiri. Ho sandiri ma na mananggung hasalaan ni halak Israel.+ Appe tu ho ma hasalaan ni nasida saleleng na manapping i ho modom. 5 Ikkon ulahononmu do i saleleng 390 ari. Dos ma i tu piga taon nasida mangulahon na sala.+ Alani i, appe tu ho ma hasalaan ni halak Israel. 6 Ikkon ulahononmu do i sahat tu na sae.

“Dung i modom ma ho muse. Alai manapping ma ho tu sabola kanan. Tu ho ma appe hasalaan ni halak Juda+ saleleng 40 ari. Sadari ma i tu sataon, sadari ma i tu sataon, songon i ma naung hutottuhon tu ho. 7 Dung i bahen ma bohim doppak kota Jerusalem naung dikepung i.+ Gulung ma tangan ni bajum, jala ikkon paboaonmu do aha na lao masa* taringot tu kota i.

8 “Ikkatokku ma ho mamakke tali asa unang marbalik dagingmu saleleng diulahon ho ari-ari lao mangepung kota i. Ikkatokku ma ho asa unang marbalik dagingmu sian sabola kiri tu sabola kanan, jala sian sabola kanan tu sabola kiri.

9 “Dung i buat ma gandum, barli,* dua macam kacang, sekoi, dohot gandum na asing.* Bahen ma i tu sada inganan, dung i bahen ma i gabe roti. Allang ma i saleleng 390 ari. Ikkon allongonmu do i saleleng na manapping i ho modom.+ 10 Timbang ma i jala allang ma 20 sekel* ganup ari. Allang ma i di tikki naung ditottuhon.

11 “Ikkon jolo ditakkar do aek na lao inumonmu. Saparonom hin* ma godangna. Ikkon inumonmu do i di tikki naung ditottuhon.

12 “Allang ma roti i songon di tikki ho mangallang roti barli na bulat. Panggang ma i di jolo ni nasida. Ikkon panggangonmu do i di ginjang ni kotoran ni jolma naung koring.” 13 Didok Jahowa ma muse, “Songon i ma halak Israel mangallang roti na ramun* di tonga-tonga ni akka bangso, di tikki hubahen nasida marserak tu akka luat i.”+

14 Dung i hudok ma, “Unang ma ale Jahowa Tuan Natumimbul. Ai sian na poso sahat tu saonari, dang hea dope hubahen ramun babakku. Dang hea dope huallang jagal ni binatang naung mate tikki didapot, manang jagal ni binatang naung mate dibahen binatang buas.+ Dang hea dope hupamasuk tu babakku jagal na ramun.”*+

15 Jadi didok Ibana ma, “Olo. Hupaloas pe ho mamakke pupuk kandang gatti ni kotoran ni jolma i. Ikkon panggangonmu do roti i di atas ni pupuk kandang i.” 16 Dung i didok Ibana ma, “Ale anak ni jolma, bahenokku ma habis sipanganon na disippan na lao allangon* ni halak di Jerusalem.+ Tikki mangallang roti nasida, marsak situtu ma nasida jala ikkon ditimbang do i.+ Di tikki minum nasida, mabiar do nasida. Ai ikkon ditimbang do i.+ 17 Ikkon masa do songon i, asa gabe tarhatotong nasida ala hurangan roti dohot aek. Jala gabe mate ma nasida alani hasalaan ni nasida.