Hesekiel

3 Dung i didok Ibana ma tu au, “Ale anak ni jolma, allang ma na di jolomi. Allang ma gulungan on. Dung i lao ma ho, makkatai ma ho tu halak Israel.”+

2 Jadi hubukka ma babakku, jala dilehon Ibana ma gulungan i allangokku. 3 Dung i didok Ibana ma, “Ale anak ni jolma, ikkon allangonmu do i, asa butong ho dibahen gulungan na hulehon i tu ho.” Dung i huallang ma i jala manis do i songon madu di babakku.+

4 Didok Ibana ma tu au, “Ale anak ni jolma, lao ma ho tu halak Israel. Jala paboa ma hatakkon tu nasida. 5 Dang husuru ho tu bangso na maol diattusi bahasana, manang tu bahasa na so hea dibege jolma. Alai tu halak Israel do ho husuru. 6 Dang husuru ho tu godang bangso na maol diattusi ho bahasana, manang na so hea dibege ho, manang na maol diattusi ho akka hatana. Ai autsugari tu nasida ho husuru, ditangihon nasida do ho.+ 7 Alai dang olo halak Israel i manangihon ho. Ai nasida pe dang olo manangihon Au.+ Sijogal rukkung do sude halak Israel i jala tangkang do roha ni nasida.+ 8 Ida ma! Nungnga hubahen ho tegas jala karas songon nasida.*+ 9 Nungnga hubahen ho* songon batu intan, ukkaras sian batu api.+ Unang pola mabiar ho tu nasida manang makkahitir mangida bohi ni nasida.+ Ai pangalo do bangso i.”

10 Dung i, didok Ibana ma, “Ale anak ni jolma, tangihon ma sude na hudok tu ho, jala sippan ma i di bagasan roham. 11 Lao ma ho tu tonga-tonga ni bangso na diboan musu i.+ Ditangihon manang dang ditangihon nasida,+ paboa ma, ‘Songon on ma hata ni Jahowa Tuan Natumimbul i.’”

12 Dung i adong ma huaso* na mangangkat au.+ Jala hubege ma soara na gogo sian pudikku na mandok, “Sai anggiat ma hamuliaon ni Jahowa dipuji di ingananna.” 13 Tarbege ma soara ni habong ni akka suru-suruan i. Soarana songon soara ni habong na masidaisan.+ Jala tarbege do soara ni akka roda na di labbung ni nasida.+ Soarana massai gogo songon soara ni roda na marputar. 14 Diangkat huaso i ma au jala diboan. Dung i lao ma au di bagasan muruk dohot jut ni roha. Huhilala ma tondi parbadia ni Jahowa na massai gogo manogu-nogu au. 15 Dung i lao ma au tu akka halak naung ditakkup i, di Tel-abib, na tinggal di labbung ni Sunge Hebar.+ Tinggal ma au di tonga-tonga ni nasida saleleng pitu ari. Sai hundul ma au hohom+ di tonga-tonga ni nasida.

16 Dung salpu na pitu ari i, makkatai ma muse Jahowa tu au,

17 “Ale anak ni jolma, nungnga hupillit ho gabe panjaga ni halak Israel.+ Molo dibege ho adong kaluar hata sian pamanganku, ikkon paboaonmu do sipasingotti tu nasida.+ 18 Molo hudok tu halak na jahat, ‘Pasti mate do ho,’ alai dang makkatai ho tu ibana lao paingotton asa muba ibana sian pangalahona na jahat i, asa toktong ibana mangolu,+ mate ma ibana alani hasalaanna. Ai jahat do ibana.+ Alai pangidookku ma ho martanggung jawab ala nungnga mate ibana.*+ 19 Alai molo dipasingot ho halak na jahat, alai dang muba ibana, jala dang ditinggalhon ibana ulaonna na jahat i, mate ma ibana alani hasalaanna. Alai anggo ho nungnga dipalua ho be hosam.+ 20 Molo adong halak na sittong manadikkon ulaonna na sittong, jala gabe diulahon ibana na sala,* bahenokku ma ibana tartuktuk jala gabe mate.+ Molo dang dipasingot ho ibana, mate ma ibana alani dosana. Dang diingot be akka ulaonna na sittong i. Alai pangidookku ma ho martanggung jawab ala nungnga mate ibana.*+ 21 Molo nungnga dipasingot ho halak na sittong i asa unang mangulahon dosa, jala dang diulahon ibana dosa, toktong ma ibana mangolu, ala nungnga dipasingot ibana.+ Alai anggo ho nungnga dipalua ho be hosam.”

22 Huhilala ma huaso ni Jahowa disi jala didok Ibana ma tu au, “Lao ma ho tu rura, asa makkatai au dohot ho disi.” 23 Dung i, lao ma au tu rura. Disi, huida ma hamuliaon ni Jahowa,+ hamuliaon songon na huida di labbung ni Sunge Hebar.+ Alani i, marsomba ma au. 24 Jala ro ma tondi parbadia ni Debata tu bagasan dirikku. Jala dibahen ma au jongjong.+ Didok Debata ma tu au,

“Mulak ma ho, jala unang kaluar ho sian jabu. 25 Ale ho anak ni jolma, ikkaton ni nasida ma ho mamakke tali, asa unang boi be ho lao tu tonga-tonga ni nasida. 26 Bahenokku ma lokkot dilam tu langit-langit ni babam. Gabe bisu ma ho jala dang boi pasingotton nasida. Ai pangalo do bangso i. 27 Alai tikki makkatai Au tu ho, bukkaokku ma pamanganmu jala ikkon dohononmu ma tu nasida,+ ‘Songon on do hata ni Jahowa Tuan Natumimbul i.’ Manang ise na manangihon, pasombu ma ibana manangihon.+ Alai manang ise na so olo manangihon, pasombu ma ibana dang manangihon. Ai pangalo do bangso i.+