Hesekiel

34 Didok Jahowa ma muse tu au, 2 “Ale anak ni jolma, paboa ma aha na lao masa tu akka parmahan ni halak Israel. Paboa ma tu nasida jala dok ma tu akka parmahan i, ‘Songon on do hata ni Jahowa Tuan Natumimbul i, “Marjea ma akka parmahan ni halak Israel,+ na manarihon dirina sandiri! Ai sasittongna, ikkon dilehon sahalak parmahan do biru-biruna mangan.+ 3 Mangallang tabo-tabo ni binatang do hamu. Dipakke hamu do baju na sian wol, jala diseat hamu do binatang na ummokmok.+ Alai laos so dilehon hamu do mangan akka biru-biru i.+ 4 Dang dipatogu hamu na gale, jala dang diubati hamu na marsahit. Dang dibalut hamu na lukka, jala dang diboan hamu mulak na lilu, jala dang dilului hamu na mago.+ Alai kejam do hamu mamaretta nasida jala kasar.+ 5 Alani i gabe marserak ma nasida. Ala dang adong be parmahan ni nasida,+ gabe siallangon ni binatang buas na di ladang ma nasida. 6 Nungnga lilu be akka biru-birukki di sude dolok, di ganup dolok na timbo. Nungnga marserak be biru-birukki di liat ni portibi on. Dang adong na mangalului nasida manang na marsitutu asa mandapot nasida.

7 “‘“Alani i, hamu akka parmahan, tangihon ma hata ni Jahowa, 8 ‘“Songon pastina Au Debata na mangolu,”* ninna Jahowa Tuan Natumimbul i, “nungnga gabe mangsa be biru-birukki. Gabe siallangon ni binatang buas na di ladang ma nasida. Ai dang adong parmahan na manjaga nasida jala dang dilului parmahanki akka biru-birukki. Holan diri ni nasida do na dilehon nasida mangan, dang dilehon nasida mangan biru-birukki.”’ 9 Alani i hamu akka parmahan, tangihon hamu ma hata ni Jahowa. 10 Songon on do hata ni Jahowa Tuan Natumimbul i, ‘Alookku ma akka parmahan i, pangidookku ma nasida asa martanggung jawab alani akka biru-birukki. Dang loasokku be nasida mangalehon mangan* akka biru-birukki,+ jala dang boi be dilehon nasida mangan diri ni nasida. Paluaokku ma akka biru-birukki sian pamangan ni nasida jala dang boi be allangon ni nasida akka biru-birukki.’”

11 “‘Songon on do hata ni Jahowa Tuan Natumimbul i, “Au ma, Au sandiri ma na lao mangalului akka biru-birukki. Au ma na lao manjaga nasida.+ 12 Jagaokku ma biru-birukki dos songon sahalak parmahan na papunguhon biru-biruna naung marserak, jala na mangalehon mangan akka biru-biruna.+ Di ari na holom jala na ditutupi ombun i,+ marserak do akka biru-birukki tu sude inganan. Alai, paluaokku do nasida sude. 13 Boanokku ma nasida kaluar sian tonga-tonga ni akka bangso jala papunguokku ma nasida sian marragam luat. Boanokku ma nasida tu luat ni nasida. Lehonokku ma nasida mangan di akka dolok ni Israel,+ di labbung ni akka sunge na jonok tu akka huta na di luat i. 14 Lehonokku ma nasida mangan di panjappalan na lomak. Jala manjappal ma nasida di akka dolok ni Israel na timbo.+ Modom-modom ma nasida disi, di panjappalan na lomak i.+ Diallang nasida ma duhut-duhut na lomak di akka dolok ni Israel.”

15 “‘“Au sandiri ma na manjaga akka biru-birukki.+ Jala Au sandiri ma na manuru nasida asa maradi,”+ ninna Jahowa Tuan Natumimbul i. 16 “Luluakku ma akka na mago,+ jala boanokku ma mulak akka na lilu. Hubalut ma akka na lukka, jala patoguokku ma na gale. Alai molo na mokmok jala na gogo i, pamateonku do. Hukumokku ma nasida jala lehonokku ma hukuman na patut tu nasida.”

17 “‘Alai anggo ho biru-birukku, songon on do hata ni Jahowa Tuan Natumimbul i, “Au ma na gabe hakim di tonga-tonga ni akka biru-biru, di tonga-tonga ni akka biru-biru jantan, jala di tonga-tonga ni akka hambing jantan.+ 18 Na so sae dope di hamu panjappalan na lomak i? Pola dope ikkon didege-dege hamu panjappalan na asing? Jala dung diinum hamu aek na ummias, pola dope ikkon dege-degeonmuna aek i lao makkotori i? 19 Gabe jappalan naung didege-dege hamuna i ma allangon ni biru-birukki? Jala aek naung didege-degemuna i ma inumon ni akka biru-birukki?”

20 “‘Alani i songon on do hata ni Jahowa Tuan Natumimbul i, “Au, Au sandiri ma na gabe hakim di akka biru-biru na mokmok dohot di akka biru-biru na kurus. 21 Marhite dagingmuna, dionjar hamu do nasida jala ditanduk hamu do akka na marsahit. Gabe marserak ma nasida sude. 22 Paluaokku ma biru-birukki, dang gabe mangsa be nasida.+ Au ma na gabe hakim di tonga-tonga ni akka biru-biru i. 23 Pillitokku ma sahalak parmahan lao di nasida,+ i ma naposokku si Daud.+ Ibana ma na mangalehon nasida mangan. Dilehon ibana ma nasida mangan jala gabe parmahan ni nasida ma ibana.+ 24 Au do Jahowa, Au ma na gabe Debata ni nasida.+ Jala naposokku si Daud ma na gabe pamimpin di tonga-tonga ni nasida.+ Au Jahowa, Au sandiri do naung mandok i.

25 “‘“Bahenokku ma parjanjian dame tu nasida.+ Usirokku ma akka binatang buas na ganas sian luat i,+ asa aman nasida tinggal di gurun jala modom di akka tombak.+ 26 Bahenokku ma nasida dapotan pasu-pasu* rap dohot akka luat na di sakaliling ni dolokki.+ Lehonokku ma udan tu nasida di tikki na pas. Jala usehonokku ma pasu-pasu tu nasida dos songon udan.+ 27 Marparbue ma akka hau na di ladang, jala lehonon ni tano i ma hasilna.+ Aman ma nasida tinggal di luat i. Di tikki huponggolhon auga* ni nasida+ jala hupalua nasida sian akka halak na mambahen nasida gabe hatoban, botoon ni nasida ma na Au do Jahowa. 28 Dang buaton ni akka bangso be arta ni nasida. Dang bodduton ni akka binatang buas na di tano on be nasida, jala aman ma nasida tinggal disi. Dang adong be na mambahen nasida mabiar.+

29 “‘“Bahenokku ma di nasida sada taman na mambahen nasida gabe tarbarita. Dang mate haraparon be nasida+ jala dang dileai akka bangso be nasida.+ 30 ‘Dung i botoon ni nasida ma na Au do Jahowa Debata ni nasida. Naposokku do halak Israel i jala donganakku do nasida,’+ ninna Jahowa Tuan Natumimbul i.”’

31 “‘Jala hamu biru-birukku,+ biru-biru na hujaga, jolma biasa do hamu. Alai Au ma na gabe Debatamuna,’ ninna Jahowa Tuan Natumimbul i.”