Hesekiel

16 Dung i didok Jahowa ma muse tu au, 2 “Ale anak ni jolma, paboa ma tu Jerusalem sude pangalahona na huhagigihon i.+ 3 Dok ma, ‘Songon on do hata ni Jahowa Tuan Natumimbul i tu Jerusalem, “Sian luat ni halak Kanaan do ho jala disi do ho tubu. Halak Amori+ do bapakmu jala halak Het+ do omakmu. 4 Di tikki tubu ho, dang diseat pusotmu, jala dang diparidi ho asa ias. Dang digosok ho pakke sira jala dang dibukkus ho pakke kain. 5 Dang adong na mambahen i sude tu ho. Ai dang adong na marasi ni roha jala na marholong ni roha tu ho. Gariada, dibolokkon do ho tu ladang. Ai sogo do roha ni nasida tikki tubu ho.

6 “‘“Tikki lewat Au, huida ma ho margulasai jala margulu-gulu mudar. Hudok ma, ‘Sai mangolu ma ho!’ Tutu, tikki margulu-gulu mudar ho, hudok ma, ‘Sai mangolu ma ho!’ 7 Hubahen do ho gabe massai godang dos songon suan-suanan na martunas di ladang. Lam magodang ma ho jala matoras. Dipakke ho ma perhiasan na dumenggan sian saluhut. Lam balga ma susum jala lam ganjang ma obukmu. Alai dang marpakkean jala salang-salang dope ho.”’

8 “‘Tikki lewat Au jala huida ho, huparrohahon ma nungnga cukkup be umurmu lao jatuh cinta. Gabe hupaherbang ma bajukku lao manutupi ho+ asa unang salang-salang be ho. Dung i marsumpa ma Au jala hubahen ma parjanjian dohot ho,’ ninna Jahowa Tuan Natumimbul i, ‘dung i gabe appunakku ma ho. 9 Huparidi do ho muse jala hupaias do akka mudar na di dagingmi. Jala hudaisson ma miak tu dagingmi.+ 10 Hupakkehon ma muse tu ho baju naung disulam. Jala hulehon ma solopmu na dumenggan na dibahen sian kulit.* Hulilitton ma kain linen na halus tu ulum. Jala hupakkehon ma tu ho baju na arga. 11 Hupakkehon do tu ho akka perhiasan. Hubahen do akka golang di tanganmu dohot kalung di lehermu. 12 Hupakkehon do anting di igungmu dohot di pinggolmu. Jala hupakkehon do mahkota na uli di ulum. 13 Torus do dipabagak ho dirim mamakke mas dohot perak. Akka pakkeanmu pe sian linen na halus, sian kain na arga, dohot baju na disulam. Sipanganonmu sian topung na halus, madu, dohot miak. Gabe borua na massai bagak ma ho+ jala nungnga boi be ho gabe ratu.’”*

14 “‘Alani haulionmi, tarbarita do ho* di tonga-tonga ni akka bangso.+ Massai bagak situtu do ho. Ai hulehon do hamuliaokki tu ho,’+ ninna Jahowa Tuan Natumimbul i.”

15 “‘Alai mulai ma dipangasahon ho haulionmi.+ Gabe boru-boru na so hasea ma ho ala nungnga tarbarita ho.+ Disodorhon ho do dirim tu ganup halak na lewat.+ Jala gabe appunana ma haulionmi. 16 Dibuat ho ma piga-piga bajum jala dibahen ho ma i gabe hiasan na marwarna-warni di akka inganan panombaon.* Disi ma ho mangalehon dirim tu sude halak gabe boru-boru na so hasea.+ Sasittongna dang boi bahenonmu songon i, jala dang boi masa sisongon i. 17 Dipakke ho do akka perhiasanmu na bagak i lao mambahen akka patung na songon bawa.* Dibahen ho do i sian mas dohot perak na hulehon i tu ho. Dung i mangulahon seks na so patut ma ho dohot akka patung i.+ 18 Dibuat ho do bajum na hona sulam i jala dipakke ho do i lao manutupi patung i. Dipelehon ho do miak dohot dupa appunakki tu nasida.+ 19 Dilehon ho do tu nasida roti na hulehon i tu ho lao allangonmu. Dilehon ho do tu nasida roti na dibahen sian topung na halus, sian miak, dohot sian madu i. Dipelehon ho do i lao gabe uap na palashon roha ni nasida.+ Songon i ma na masa,’ ninna Jahowa Tuan Natumimbul i.”

20 “‘Dibuat ho do akka anak dohot boru naung ditubuhon ho lao di Au.+ Dilehon ho do i lao gabe pelean tu akka patung i.+ Hape nungnga dilehon ho dirim tu nasida. Na so sae dope i di ho umbahen na dipelehon ho nasida? 21 Diseat ho do akka anakku jala ditutung ho do nasida gabe pelean.+ 22 Di tikki diulahon ho sude ulaon na huhagigihon i, jala di tikki mangulahon seks na so patut ho, dang diingot ho be na masa di tikki poso ho. Dang diingot ho be na so marpakkean i ho, jala na salang-salang i ho. Dang diingot ho be na margulasai ho huhut margulu-gulu mudar. 23 Marjea ma ho, tung marjea situtu ma ho!+ Ai nungnga diulahon ho na jahat,’ ninna Jahowa Tuan Natumimbul i. 24 Dibangun ho do di ho langgatan lao manomba debata na so sittong. Jala dibangun ho do di ganup lapangan inganan panombaon.* 25 Dipajongjong ho do akka inganan panombaon di ganup dalan, di inganan na mura idaon ni halak. Ditawarhon ho do dirim* tu ganup halak na lewat.+ Lam jotjot ma ho mangulahon seks na so patut.+ Gabe magigi do Au mangida haulionmi. 26 Mangulahon seks na so patut do ho dohot akka anak ni Mesir,+ i ma tetanggam na sai mangihutton hisap-hisap ni dagingna. Dibahen ho do haccit rohakku ala dang taretong be sadia jotjot ho mangulahon seks na so patut. 27 Angkatokku ma tanganku lao mangalo ho jala bahenokku ma hancur inganan panimpanan ni sipanganonmu.+ Pasahatonku ma ho tu akka boru ni halak Palistim na marsogo ni roha tu ho,+ jala na magigi tu pangalahom na so umboto ila i. Lomo-lomo ni nasida ma tu ho.+

28 “‘Alai dang marna puas dope ho mangulahon seks na so patut tu nasida. Alani i, mangulahon seks na so patut ma ho dohot akka anak ni Asiria.+ Alai dung diulahon ho i, dang marna puas dope ho. 29 Alani i lam jotjot ma ho mangulahon seks na so patut dohot halak Kasdim.+ Jala mangulahon seks di luat ni halak Kanaan.* Alai tung pe nga diulahon ho i, tong dope dang marna puas pakkilalaanmu. 30 Nungnga marsahit be roham,’* ninna Jahowa Tuan Natumimbul i, ‘Ai tikki diulahon ho sudena i dos songon boru-boru na so hasea na so umboto ila do pangalahom!+ 31 Alai tikki dipajongjong ho langgatan lao manomba debata na so sittong di ganup dalan, di inganan na hatop idaon ni halak, jala tikki dipajongjong ho inganan panombaon* di ganup lapangan ni kota, dang songon boru-boru na so hasea ho idaon. Ai so dijalo ho upam songon na niulahon ni boru-boru na so hasea. 32 Istri na mangalakkup do ho. Ai umholong do roham tu bawa na asing sian apala tu suamim sandiri!+ 33 Somalna boru-boru na so hasea do na manjalo hadiah.+ Alai anggo ho asing do, ho do na mangalehon hadiah tu sude bawa halletmi.+ Disogok ho do akka halak asa ro sian sude inganan lao mangulahon seks dohot ho.+ 34 Tung asing situtu do ho sian akka boru-boru na so hasea na asing. Dang adong boru-boru na so hasea na songon ho! Ai gabe ho do na manggarar, dang na gabe digarar halak ho. Tung asing situtu do pangalahom.’

35 “Alani i, ho boru-boru na so hasea,+ tangihon ma hata ni Jahowa. 36 Songon on ma hata ni Jahowa Tuan Natumimbul i, ‘Nungnga diulahon ho be sude hisap-hisap ni dagingmu. Dibukka ho do sude abitmu sappe salang-salang lao mangulahon seks na so patut tu sude halletmu dohot tu sude akka patungmu na huhagigihon*+ jala na ramun* i. Dipelehon ho do muse mudar ni akka anakmu tu sude patung i.+ 37 Alani i, papunguokku ma sude halletmu naung dipasonang ho, sude halak na dihaholongi ho, dohot sude na dihasogohon ho. Papunguokku ma i sude sian sakakalilingmu lao mangalo ho. Bahenokku ma ho salang-salang di jolo ni nasida. Jala idaon ni nasida ma ho salang-salang.+

38 “‘Hona hukuman ma ho bahenokku. Bahenokku ma tu ho hukuman na patut jaloon ni boru-boru na mangalakkup+ dohot hukuman na patut jaloon ni boru-boru na mambunu.+ Usehonokku ma mudarmu ala nungnga dibahen ho Au muruk jala cemburu.+ 39 Pasahatonku ma ho tu tangan ni nasida. Ruppak ma bahenon ni nasida akka langgatanmu dohot ingananmu manomba debata na so sittong.+ Ribakkonon ni nasida ma abitmu+ jala rampason ni nasida ma perhiasanmu na bagak i.+ Pasombuonna ma ho dang marpakkean jala salang-salang. 40 Boanon ni nasida ma godang halak+ lao mandangguri ho mamakke batu.+ Jala pamateon ni nasida ma ho pakke podang.+ 41 Ditutung nasida ma akka jabum,+ jala dihukum nasida ma ho di jolo ni godang borua. Pasookku ma ulaonmu na so hasea i+ jala dang lehononmu be upa tu akka halak lao mangulahon seks na so patut dohot ho. 42 Ikkon usehonokku do murukku tu ho,+ asa sombu rimashi mangida ho.+ Dung i sonang ma rohakku jala dang haccit be rohakku.’

43 “‘Ala dang diingot ho be na masa tikki poso ho,+ jala dibahen ho do Au muruk marhite mangulahon sudena i, bahenokku ma ho makkilala akibat ni sude pangalahom,’ ninna Jahowa Tuan Natumimbul i, ‘dang ulahononmu be pangalaho na so umboto ila i dohot na huhagigihon i.

44 “‘Tikki makkatai taringot tu ho, dohonon ni halak ma uppasa on, “Songon dia omakna, songon i do boruna!”+ 45 Tutu ma ho boru ni omakmu na magigi tu suamina dohot tu anakkonna. Jala songon kakakmu dohot adekmu do ho, na magigi tu suami dohot tu akka gellengna. Halak Het do omakmu jala halak Amori do bapakmu.’”+

46 “‘Samaria do kakakmu+ na tinggal di utara* rap dohot akka boruna.*+ Jala Sodom+ do adekmu na tinggal di selatan* rap dohot akka boruna.+ 47 Dang holan akka pangalaho ni nasida na huhagigihon i na diihutton ho. Alai di bagasan satokkin, unjorbut do pangalahom sian nasida.+ 48 Songon pastina Au Debata na mangolu,’* ninna Jahowa Tuan Natumimbul i, ‘taringot tu Sodom adekmi dohot boruna, dang hea dope diulahon nasida songon na diulahon ho dohot na diulahon akka borum. 49 Alai on do hasalaan ni Sodom adekmi: ginjang do rohana+ dohot akka boruna.+ Godang do sipanganon ni nasida.+ Sonang do ngolu ni nasida jala dame.+ Alai dang olo nasida mangurupi halak na susa dohot na pogos.+ 50 Ginjang do roha ni nasida+ jala torus do diulahon nasida di jolokku ulaon na huhagigihon.+ Alani i, ikkon hupamate do nasida.+

51 “‘Haru dosa ni halak Samaria,+ dang adong dope satonga ni dosami. Ai torus do diulahon ho ulaon na huhagigihon i. Dao do ho unjahat sian nasida. Alani sude ulaonmu na huhagigihon i, boi dope dohonon uttigor pangalaho ni kakakmu dohot adekmi.+ 52 Saonari maila ma ho. Ai nungnga dibahen ho pangalaho ni kakakmu dohot adekmu sittong idaon. Ai taringot tu dosa na diulahon ho, lobi magigi do Au mangida pangalahom sian nasida. Gabe unsittong do nasida idaon sian apala ho. Saonari ikkon maila ma ho jala gabe marlea, ai nungnga dibahen ho pangalaho ni kakakmu dohot adekmu sittong idaon.’

53 “‘Papunguokku ma akka halak na tartakkup sian Sodom dohot boruna, rap dohot halak na tartakkup sian Samaria dohot akka boruna. Jala papunguokku ma akka halak na tartakkup sian tonga-tongam asa rap dohot nasida,+ 54 asa maila ho. Maila sandiri ma ho ala nungnga dibahen ho dumenggan pangalaho ni nasida sian ho. 55 Mulak do muse songon najolo i+ kakakmu dohot adekmu, i ma Sodom dohot boruna, rap dohot Samaria dohot boruna. Jala songon i ma nang ho dohot akka borum. 56 Leas do roham mangida Sodom adekmi tikki ginjang roham, 57 i ma tikki so tarida dope hajahatonmi.+ Saonari dileai boru ni Siria dohot sude tetangga ni nasida ma ho. Jala dipalea-lea boru ni halak Palistim+ na adong di sakalilingmi ma ho. 58 Ikkon hilalaonmu do akibat ni pangalahom na so umboto ila i dohot na huhagigihon i,’ ninna Jahowa.”

59 “Ai songon on do hata ni Jahowa Tuan Natumimbul i, ‘Hukumokku ma ho hombar tu pangalahom.+ Ai leas do roham tu sumpami jala dilanggar ho do parjanjian na hubahen.+ 60 Alai anggo Au, huingot do parjanjian na hubahen tu ho di tikki poso ho. Jala na lao bahenokku ma parjanjian dohot ho na marlakku saleleng ni lelengna.+ 61 Ingotonmu ma pangalahomi jala maila ma ho+ tikki manjalo akka kakakmu dohot akka adekmu. Ai lehonokku ma nasida tu ho gabe songon borum. Alai dang alani parjanjian na hubahen dohot ho.’

62 “‘Bahenokku nama parjanjian dohot ho, jala sian i botoonmu ma na Au do Jahowa. 63 Tung manang aha pe naung diulahon ho,+ sesaokku nama dosam. Alani i, ingotonmu ma sudena i, jala gabe maila ma ho sappe dang tardok ho be manang aha alani ilana,’+ ninna Jahowa Tuan Natumimbul i.”