1 Raja-Raja

11 Godang do borua sian bangso na asing+ na dihaholongi si Salomo, asing ni boru ni si Firaun.+ Dihaholongi ibana do akka boru ni halak Moab,+ halak Ammon,+ halak Edom, halak Sidon,+ dohot halak Het.+ 2 Hape taringot tu bangso i, nungnga didok Jahowa hian tu halak Israel, “Unang ma mardongan* hamu tu nasida. Ai boi do bahenon ni nasida hamu mangihutton akka debata ni nasida.”+ Alai massai holong do roha ni si Salomo tu akka borua i. 3 Jadi 700 ma istri ni si Salomo na sian keluarga ni raja. Jala adong do muse 300 gundikna. Gabe mandao ma si Salomo sian Debata alani akka istrina i.* 4 Dung matua si Salomo,+ disomba ibana ma akka debata na asing alani akka istrina i.+ Dang sian nasa rohana be ibana manomba Jahowa Debatana songon na binahen ni si Daud bapakna i. 5 Gabe disomba si Salomo ma Astarot+ debata ni halak Sidon. Jala disomba ibana ma Milkom+ debata ni halak Ammon na dihagigihon Debata na sittong. 6 Diulahon si Salomo ma akka na jahat di jolo ni Jahowa, jala dang dioloi ibana be Jahowa sian nasa rohana songon na binahen ni bapakna si Daud.+

7 Dibahen si Salomo ma inganan panombaon*+ di dolok na di jolo ni Jerusalem. Dibahen do i lao manomba Kamos debata ni halak Moab, dohot Molok+ debata ni halak Ammon,+ i ma akka debata na dihagigihon Debata na sittong. 8 Dipajongjong si Salomo do i tu akka istrina na sian bangso na asing. Disi ma akka istrina i manutung pelean asa nakkok timusna tu debata ni nasida.

9 Nungnga mandao roha ni si Salomo sian Jahowa Debata ni Israel,+ naung dua hali patuduhon dirina tu si Salomo.+ Alani i, muruk situtu ma Jahowa tu ibana. 10 Hape nungnga dipasingot Debata ibana asa unang manomba debata na asing.+ Alai dang dioloi ibana paretta ni Jahowa. 11 Didok Jahowa ma tu si Salomo, “Ala diulahon ho songon i jala dang setia ho tu parjanjian dohot aturan naung hudok hian tu ho, buatokku ma harajaon i sian ho jala lehonokku ma i tu sahalak sian parkarejom.+ 12 Alai alani janjiku tu si Daud, dang bahenokku i tikki mangolu dope ho. Sian tangan ni anakmu pe buatokku harajaon i.+ 13 Alai dang sude harajaon i buatokku.+ Hulehon pe sada marga tu anakmu+ alani si Daud naposokku dohot alani Jerusalem kota na hupillit i.”+

14 Dibahen Jahowa ma si Hadad na sian keluarga ni raja ni halak Edom+ ro mangalo si Salomo.+ 15 Tikki ditaluhon si Daud halak Edom,+ si Joab pamimpin ni tentara i do na mangubur akka halak na mate i. Dung i, ro do muse si Joab tusi, ai naeng pamateonna do sude bawa na di Edom. 16 Maringanan ma si Joab dohot tentara ni halak Israel disi saleleng onom bulan lao pamatehon sude bawa na di Edom. 17 Tikki i, dakdanak dope si Hadad. Lari ma ibana dohot akka parkarejo ni bapakna halak Edom i tu Mesir. 18 Lao ma nasida sian Midian tu Elaparan. Sian i, borhat ma nasida muse tu Mesir rap dohot akka bawa na ditogihon nasida sian Elaparan.+ Dijuppangi nasida ma si Firaun raja ni Mesir. Dung i dilehon si Firaun ma tu si Hadad jabu dohot tano, jala diparettahon do asa toktong dilehon sipanganonna. 19 Holong do roha ni si Firaun tu si Hadad. Alani i, dilehon ibana ma anggi ni Ratu* Tahpenes istrina i, gabe istri ni si Hadad. 20 Tubu ma anak ni si Hadad, dibahen ma goarna si Genubat. Diboan* si Tahpenes ma anakna i tu jabu ni si Firaun. Gabe magodang disi ma si Genubat rap dohot akka anak ni si Firaun.

21 Di Mesir, dibege si Hadad ma naung mate+ si Daud dohot si Joab pamimpin ni tentara i.+ Alani i, didok si Hadad ma tu si Firaun, “Paloas ma jolo au mulak tu hutakku.” 22 Didok si Firaun ma, “Boasa naeng mulak ho? Adong haroa na hurang dison umbahen naeng mulak ho tu hutam?” Dialusi si Hadad ma, “Dang adong nian. Alai paloas ma jo au mulak.”

23 Dibahen Debata do muse si Reson anak ni si Eliada ro mangalo+ si Salomo. Na lari do si Reson on sian tuanna, i ma si Hadadeser,+ raja ni Zoba. 24 Dung ditaluhon* si Daud halak Zoba, dipapungu si Reson do akka bawa lao gabe pangarampok. Ibana ma na gabe pamimpin ni nasida.+ Dung i, lao ma nasida tu Damaskus,+ tinggal ma nasida disi, jala mulai ma ibana mamaretta di Damaskus. 25 Dung i mamaretta ma ibana di saluhut Siria. Sogo hian do rohana tu halak Israel. Alani i, saleleng mangolu si Salomo sai disusai ibana do halak Israel, songon na binahen ni si Hadad.

26 Adong dope muse na gabe alo ni si Salomo,+ i ma si Jerobeam+ parkarejona.+ Anak ni si Nebat do ibana, halak Epraim na sian Zereda. Tubu ni ina na mabalu do ibana na margoar si Zerua. 27 On ma na mambahen gabe mangalo si Jerobeam tu si Salomo: Dibangun si Salomo ma benteng na sian tano*+ jala ditutup ibana ma lombang na di Kota ni si Daud bapakna i.+ 28 Doli-doli na malo jala na ringgas do si Jerobeam. Alani i ma dibahen si Salomo ibana gabe kepala+ ni akka parkarejo na sian pinoppar ni si Josep. 29 Sada tikki, lao ma si Jerobeam sian Jerusalem. Pajuppang ma ibana di dalan dohot Panurirang* Ahia+ halak Silo i. Holan halak i na dua do di luar ni kota i. Tikki i, mamakke baju na baru do si Ahia. 30 Dibukka si Ahia ma bajuna na baru i jala diribak ibana ma abitna i gabe 12 bagian. 31 Didok si Ahia ma tu si Jerobeam,

“Buat ma di ho sappulu bagian abit on. Ai nungnga didok Jahowa Debata ni Israel, ‘Buatokku nama harajaon i sian tangan ni si Salomo, jala lehonokku ma tu ho sappulu marga.+ 32 Alai toktong do adong samarga nai di si Salomo+ ala huingot do si Daud+ naposokki. Jala huingot do kota Jerusalem na hupillit i sian sude kota ni marga ni Israel.+ 33 Hubahen pe songon i, ala nungnga ditadikkon bangsokki do Au.+ Disomba nasida do Astarot debata ni halak Sidon, Kamos debata ni halak Moab, dohot Milkom debata ni halak Ammon. Dang diihutton nasida akka dalanku. Dang diulahon nasida na sittong, jala dang dioloi nasida aturan dohot patikku songon na binahen ni si Daud bapakna i. 34 Alai huingot do si Daud naposokku na hupillit i,+ na toktong mangoloi parettakku dohot aturanku. Alani i, dang buatokku sude harajaon i sian si Salomo. Toktong do bahenokku ibana gabe pamimpin saleleng ni ngoluna. 35 Sian anakna do haduan buatokku harajaon i, jala lehonokku ma tu ho sappulu marga.+ 36 Ai molo hulehon sada marga tu anakna, toktong ma pinoppar* ni si Daud na mamaretta di jolokku di Jerusalem,+ i ma kota na hupillit na gabe inganan ni goarhi. 37 Bahenokku ma ho gabe raja ni Israel, jala ho ma na mamaretta di sude inganan na dihalomohon roham. 38 Molo dioloi ho sude parettakku jala diihutton ho akka dalanku, jala molo diulahon ho na sittong, dioloi ho sude aturan dohot parettakku, songon na binahen ni si Daud naposokki,+ sai na donganakku do ho. Bahenokku ma toktong pinopparmu mamaretta songon naung hubahen tu si Daud.+ Jala ho ma na mamaretta Israel. 39 Pailaokku ma pinoppar ni si Daud alani hajahaton ni nasida.+ Alai dang saleleng ni lelengna+ bahenokku songon i.’”

40 Alani i, naeng dipamate si Salomo ma si Jerobeam. Gabe lari ma si Jerobeam tu Mesir mandapotton si Sisak+ raja ni Mesir.+ Jala disi ma ibana tinggal sahat tu na mate si Salomo.

41 Sude na niulahon ni si Salomo dohot ma i akka na binahenna dohot habisuhonna, tarsurat do i di bukku sejarah ni si Salomo.+ 42 Jadi, saleleng 40 taon ma si Salomo mamaretta halak Israel di Jerusalem. 43 Mate ma si Salomo jala dikuburhon ma ibana rap dohot akka ompuna di Kota ni si Daud bapakna i. Dung i, si Rehabeam+ anakna i ma na manggattihon ibana gabe raja.