4 Musa
25 Tikki di Sitim+ halak Israel, mangulahon seks ma akka bawa ni halak Israel dohot akka boru ni halak Moab.+ 2 Ditogihon akka borua i ma akka bawa i lao mangalehon pelean tu debata ni nasida.+ Dohot ma akka bawa i mangallang pelean i, jala marsomba tu akka debata ni nasida.+ 3 Jadi dohot ma halak Israel manomba Baal Peor.+ Alani i, gabe muruk situtu ma Jahowa tu halak Israel. 4 Didok Jahowa ma tu si Musa, “Boan ma akka pamimpin* ni bangso i. Bunu ma nasida jala gattung ma di jolo ni sude jolma.* Ikkon digattung do nasida di jolo ni Jahowa, asa unang muruk be Jahowa tu bangso i.” 5 Jadi didok si Musa ma tu akka hakim ni halak Israel,+ “Ikkon pamateonmuna do manang ise pe na dohot manomba Baal Peor.”+
6 Tikki mangandungi halak Israel di pintu kemah parpunguan, ro ma sahalak bawa sian halak Israel mamboan boru ni halak Midian+ tu perkemahan. Diida si Musa dohot sude halak Israel do na binahenna i. 7 Diida si Pinehas+ anak ni si Eleasar, pahoppu ni Malim Aron do na masa i. Pittor jongjong ma ibana jala lao sian tonga-tonga ni punguan i. Dung i dibuat ibana ma sada tombak.* 8 Pittor masuk ma ibana tu kemah ni bawa i. Ditusuk ibana ma bawa halak Israel i dohot borua i. Sappe tombus do butuha* ni borua i ditusuk. Dung i, so ma sahit na posi na pamatehon halak Israel.+ 9 Jadi 24.000 halak ma na mate alani sahit i.+
10 Dung i, didok Jahowa ma tu si Musa, 11 “Nungnga dipalambok si Pinehas+ anak ni si Eleasar, pahoppu ni Malim Aron i rohakku. Alani i, dang muruk be Au tu halak Israel. Ai dang dipasombu ibana disomba nasida debata na asing, asing ni Au.+ Alani i do dang hupamate sude halak Israel i, nang pe sasittongna holan Au do na ikkon sombaon ni nasida.+ 12 Jadi paboa ma tu ibana bahenokku nama parjanjian dame dohot ibana. 13 Alani parjanjian i, gabe malim ma ibana dohot akka pinopparna saleleng ni lelengna.+ Ai dang dipasombu ibana bangso i manomba debata na asing, asing ni Au.+ Jala nungnga dipangido ibana asa disesa dosa ni bangso i.”
14 Si Zimri do goar ni halak Israel na dipamate rap dohot boru ni halak Midian i. Anak ni si Salu do ibana, pamimpin ni keluarga sian pihak ni bapakna na sian marga Simeon. 15 Jala si Kosbi do goar ni boru ni halak Midian i. Boru ni si Zur+ do ibana, pamimpin ni sada marga di Midian.+
16 Didok Jahowa ma muse tu si Musa, 17 “Marporang ma hamu mangalo halak Midian i, jala bunu ma nasida.+ 18 Ai nungnga dialo jala diakkali nasida hamu taringot tu debata Peor i,+ dohot taringot tu si Kosbi boru ni pamimpin ni halak Midian, na dipamate+ tikki ro sahit na posi alani debata Peor i.”+