1 Samuel

25 Di pudian ni ari mate ma si Samuel.+ Marpungu ma sude halak Israel mangandungi ibana. Dung i, dikuburhon nasida ma ibana di jonok ni jabuna na di Rama.+ Dukkon i, lao ma si Daud tu Gurun Elaparan.

2 Adong ma sahalak bawa na mora parhuta Maon+ na karejo di Karmel.*+ Adong 3.000 biru-biruna jala 1.000 hambingna. Di tikki i, manggusting ibbulu ni biru-biruna do ibana di Karmel. 3 Goar ni bawa i si Nabal,+ pinoppar ni si Kaleb.+ Goar ni istrina si Abigail.+ Bagak do istrina jala marbisuk, alai jahat do suamina i jala kasar makkatai.+ 4 Tikki na di gurun i si Daud, dibege ibana ma na manggusting ibbulu ni biru-biruna si Nabal. 5 Disuru si Daud ma sappulu tentarana manjuppangi si Nabal. Didok si Daud ma tu akka tentarana i, “Lao ma hamu tu Karmel. Dung pajuppang hamu dohot si Nabal, sukkun hamu ma kabarna jala pasahat hamu ma tabekku. 6 Dung i dokkon hamu ma, ‘Sai ganjang ma umurmu, sai sehat-sehat ma* ho dohot keluargam, jala sai denggan ma sude na adong di ho. 7 Hubege, manggusting ibbulu ni biru-biru do ho saonari. Tikki rap hami dohot akka parmahanmu, dang dihahua hami nasida.+ Jala saleleng di Karmel nasida, dang adong nanggo sada biru-birum na mago. 8 Sukkun ma tu akka parkarejomi asa dipaboa tu ho. Anggiat ma las roham di haroro ni akka tentarakki, ai di tikki na denggan do nasida ro.* Lehon ma na boi lehononmu tu akka naposomon dohot tu anakmu si Daud.’”+

9 Lao ma akka tentara ni si Daud i jala dipaboa nasida ma sude na nidok ni si Daud i tu si Nabal. Dung i, 10 dialusi si Nabal ma akka tentara ni si Daud, “Ise huroa si Daud i? Ise huroa anak ni si Isai i? Saonari on, na godangan parkarejo na lari maninggalhon tuanna.+ 11 Dang olo au mangalean rotikku, aekku, dohot jagal tu halak na so huboto manang na sian dia ibana ro! Ai tu halak na manggusting ibbulu ni biru-birukku do i huparade.”

12 Dung i, mulak ma akka tentara ni si Daud jala dipaboa nasida ma sude na nidok ni si Nabal tu si Daud. 13 Pittor didok si Daud ma tu akka tentarana i, “Diikkat be ma podangna tu gottingna!”+ Sude ma nasida mangikkat podangna jala dohot do si Daud mangikkat podangna. Dung i, borhat ma si Daud dohot hira-hira 400 tentarana, alai tinggal do 200 tentarana na asing manjaga akka barang ni nasida.

14 Alai ro ma sahalak parkarejo ni si Nabal manjuppangi si Abigail, istri ni si Nabal. Didok ibana ma, “Disuru si Daud do akka tentarana sian gurun lao manukkun kabar ni tuanta. Alai disonggaki tuan do nasida jala dileai.+ 15 Hape massai burju do nasida jala dang hea dibahen nasida na jahat tu hami. Dang agoan manang aha hami saleleng rap hami dohot nasida di inganan parmahanan.+ 16 Saleleng marmahan hami disi, songon tembok do nasida di hami na manjaga hami arian nang borngin. 17 Alani i, parohon jea do i tu tuanta dohot tu sude keluargana.+ Jadi, pikkiri ma inang aha na lao sibahenonmu. Anggo tuan i, dang hasea i+ jala dang olo ibana manangihon manang ise pe.”

18 Dung i hatop ma dibuat si Abigail+ 200 roti, dua gucci na balga na marisi anggur, lima biru-biru naung rade lao diloppa, hira-hira 35 liter* gandum na disaok,* 100 kue kismis, dohot 200 kue ara. Dibahen ma i sude tu ginjang ni akka halode.+ 19 Didok si Abigail ma tu akka parkarejona, “Parjolo ma hamu lao. Ro pe au.” Alai dang dipaboa ibana i tu suamina si Nabal.

20 Tikki marhalode si Abigail turun sian sada dolok, turun do si Daud dohot akka tentarana tu arah ni si Abigail. Alai dang diida nasida dope si Abigail ala dibalik ni dolok dope ibana. Dung i, pajuppang ma nasida. 21 Andorang so i, nungnga didok si Daud hian tu akka tentarana, “Dang adong gunana hujaga artana tikki di inganan parmahanan. Jala dang adong na mago nanggo sada pe sian artana i.+ Hape dibahen ibana do na jahat balos ni na denggan na hubahen i.+ 22 Molo dang hupamate sude bawa* na di jabu ni si Nabal sahat tu manogot, sai borat ma hukumon ni Debata akka musu ni si Daud.”*

23 Dung i diida si Abigail ma si Daud, pittor turun ma ibana sian halodena jala marsinggang ma ibana di jolo ni si Daud. 24 Dung i dipajonok si Abigail ma tu pat ni si Daud jala marsomba ma ibana. Ninna ma, “Ale tuan, tu au ma baloshon pambahenanna i. Loas ma naposomon makkatai jala tangihon ma hatakkon. 25 Unang pola pardulihon hata ni si Nabal na so hasea i.+ Ai songon goarna i do ibana. Goarna pe si Nabal,* halak na oto do ibana. Na so disi do au tikki ro akka tentara ni tuan. 26 Saonari ale tuan, songon pastina Jahowa mangolu* jala songon pastina ho mangolu,* Jahowa do na mangabbati ho+ asa unang pamatehon halak na so marsala*+ jala Ibana do na mangorai tuan asa unang mambalosson pambahenanna i. Sai masa ma tu akka musum songon na lao masa tu si Nabal. 27 Las ma roha ni tuan manjalo silehon-lehon*+ na binoan ni naposomon. Jala bagihon ma i tu akka tentarami.+ 28 Sai salpuhon ma sala ni naposomon tuan. Bahenon ni Jahowa do toktong pinopparmu gabe raja.+ Ai parporangan ni Jahowa do na diulahon ho,+ jala dang adong na jahat diulahon ho saleleng ni ngolum.+ 29 Molo adong halak na mangalele ho jala naeng pamatehon ho, jagaon ni Jahowa Debatam do ho songon halak na manjaga arta na arga na manippan i di bagasan sada tas. Alai sappattononna do akka musum songon batu na diambalangkon.* 30 Molo dung dibahen Jahowa sude na denggan tu tuan songon janjina i, jala molo dung dibahen Ibana ho gabe pamimpin ni Israel,+ 31 dang manolsoli be roham alai gabe tenang ma pikkiranmu.* Ai dang dipamate ho halak na so porlu dipamate jala dang olo ho mambalos pambahenanna i.+ Molo dung dipasu-pasu Jahowa ho tuan, sai ingot ma naposomon.”

32 Didok si Daud ma tu si Abigail, “Dipuji ma Jahowa Debata ni Israel na manuru ho manjuppangi au sadari on! 33 Sai dipasu-pasu Debata ma ho ala dipatuduhon ho do na marbisuk ho! Sai dipasu-pasu Debata ma ho, ai diabbati ho do au asa unang pamatehon halak na so marsala+ jala asa unang hubaloshon pambahenanna i. 34 Songon pastina Jahowa Debata ni Israel mangolu,* i ma na mangabbati au mambahen na jahat tu ho,+ autsugari dang tibu ho ro manjuppangi au,+ manogot nungnga mate be sude bawa* na di jabu ni si Nabal.”+ 35 Dijalo si Daud do na binoan ni si Abigail i. Jala didok si Daud ma, “Mulak ma ho tu jabum di bagasan dame. Nungnga hutangihon hatam jala huoloi pe pangidoanmi.”

36 Dung i mulak ma si Abigail tu jabuna. Di tikki i, marpesta do si Nabal songon raja di jabuna. Mabuk do ibana jala marlas ni roha. Alai dang adong didok si Abigail tu ibana sahat tu manogot. 37 Dung manogot, dang mabuk be si Nabal. Alani i, dipaboa si Abigail ma sude na masa i tu si Nabal. Alai gabe gale ma jantung ni si Nabal jala lumpu ma ibana peak songon batu. 38 Hira-hira sappulu ari dukkon i, dibahen Jahowa ma mate si Nabal.

39 Dung dibege si Daud naung mate si Nabal, didok si Daud ma, “Dipuji ma Jahowa, ai marpihak do Ibana tu au+ tikki dileai si Nabal+ au. Diabbati Ibana do naposona asa unang mangulahon na jahat,+ jala nungnga dibalos Jahowa be hajahaton ni si Nabal!”* Dung i, disuru si Daud ma tentarana mangalap si Abigail lao gabe istrina. 40 Sahat ma nasida di Karmel. Didok nasida ma tu si Abigail, “Disuru si Daud do hami mangalap ho asa bahenonna ho gabe istrina.” 41 Pittor marsomba ma si Abigail pola sahat bohina tu tano. Didok ibana ma, “Rade do naposomon manussi pat+ ni akka tentara ni tuanku.” 42 Hatop ma si Abigail+ nakkok tu halodena jala mardalan do lima parkarejona borua di pudina. Dung i, borhat ma ibana rap dohot akka tentara ni si Daud jala dibahen ma ibana gabe istri ni si Daud.

43 Nungnga dibuat si Daud hian si Ahinoam+ na sian Jisreel+ gabe istrina. Alani i, duassa ma nasida gabe istrina.+

44 Alai si Mikhal+ boru ni si Saul istri ni si Daud i, nungnga dipamuli si Saul tu si Palti+ anak ni si Lais na sian Gallim.