Surat tu si Titus
1 Sian si Paulus, naposo ni Debata jala apostel ni Jesus Kristus. Dos do haporseaokku dohot haporseaon ni akka halak na pinillit ni Debata, na mangihutton ajaran na sittong lao manomba Debata. 2 Janji ni Debata taringot tu hangoluan saleleng ni lelengna+ do na gabe fondasi ni haporseaokku, i ma naung dijanjihon Debata na so margabus i+ sian najolo. 3 Jala di tikki naung ditottuhon, dipapatar do hatana i marhite ulaon marbarita na dipasahat tu au+ songon paretta ni Debata Sipalua hita. 4 Mandapotton si Titus, donganku sahaporseaon jala naung songon anakku sandiri.
Anggiat ma dilehon tu ho asi ni roha na massai balga i, dohot hadameon na sian Debata Ama i dohot sian Kristus Jesus Sipalua hita.
5 Hutadikkon do ho di Pulo Kreta asa boi padengganonmu akka na hurang disi.* Jala pillit ma akka bawa na gabe sintua di ganup kota mangihutton tudu-tudu on: 6 Unang ma adong siissakan di bawa na lao dipillit i, ikkon sada istrina, ikkon akka na porsea do ianakkonna jala dang ditudu mangulahon na so suman* manang pangalo.+ 7 Ai pangurus na pinillit ni Debata do sahalak sintua.* Alani i, unang ma adong siissakan di ibana, dang lomo-lomona,+ dang parmuruk,+ dang parmabuk, dang kasar,* jala dang holongan di hepeng manang holan mangalului uttung tu dirina sandiri. 8 Alai ikkon las do rohana manjalo tamu,+ lomo rohana tu na denggan, marbisuk,+ mangulahon na sittong, setia,+ boi mangarajai dirina,+ 9 jala mangihutton ajaran na sittong tikki mangajari.+ Dung i boi ma ibana mamodai* marhite ajaran na sittong i+ jala mamissang+ halak na so mangoloi ajaran i.
10 Ai nungnga godang akka na mangalo, na makkatahon na so marguna, panipu, tarlumobi sian nasida do akka na mampartahatton sunat.+ 11 Ikkon pasoon do hata ni halak sisongon i. Ai disegai nasida do haporseaon ni akka keluarga marhite mangajarhon na so tama lao mangalului uttung tu dirina sandiri. 12 Adong do sahalak sian nasida, i ma panurirang ni nasida sandiri na mandok, “Pargabus do halak Kreta, songon binatang buas, na hisap jala na malas.”
13 Sittong do na nidokna i. Alani i, ikkon takkas do pissangonmu nasida asa togu* haporseaon ni nasida, 14 unang pola tangihon cerita na so tutu na dibahen halak Jahudi manang paretta ni halak na lilu sian hasittongan. 15 Sude do badia di halak na badia,+ alai dang adong na badia di halak na ramun* dohot di halak na so porsea. Ai nungnga ramun pikkiran dohot panggora ni roha ni nasida.+ 16 Di jolo ni akka halak diakkui nasida do ditanda nasida Debata, alai disoadahon nasida do Ibana marhite parniulaon ni nasida.+ Ai kejam do nasida, pangalo, jala dang tama mangulahon manang aha pe na denggan.