1 Samuel

17 Dung i, dipapungu halak Palistim+ ma akka tentarana* lao marporang. Marpungu ma nasida di Soko+ di huta ni marga Juda. Jala markemah ma nasida di Efes-damim+ na di holang-kolang ni Soko dohot Azeka.+ 2 Marpungu ma si Saul dohot tentarana jala markemah ma nasida di Rura Elah.+ Marbaris ma nasida lao marporang mangalo halak Palistim. 3 Jongjong ma halak Palistim di sada dolok, alai jongjong do halak Israel di dolok na di bariba ni halak Palistim. Jala rura ma di tonga-tonga ni nasida.

4 Dung i, kaluar ma sahalak tentara ni halak Palistim na unjago sian perkemahan ni nasida. Si Goliat+ do goarna jala sian kota Gat+ do ibana. Timbona hira-hira tolu meter.* 5 Takkulukna sian tombaga. Dipakke ibana do baju partahanan na sian tombaga jala na marsisik. Hira-hira 57 kilogram* ma borat ni baju partahananna i.+ 6 Adong do panutup ni patna* sian tombaga jala adong do sada tombak+ na sian tombaga dibahen di tanggurungna. 7 Balga ni hau ni tombakna* songon balga ni hau ni partonun.+ Sian bosi do mata ni tombakna jala hira-hira pitu kilogram* ma boratna. Adong do halak na mardalan di jolona mamboan perisaina. 8 Dung i, jongjong ma si Goliat jala marsurak ma ibana tu akka tentara ni Israel na marbaris i,+ “Ai na marhua do hamu marbaris disi? Au do tentara ni halak Palistim na unjago. Anggo hamu, holan hatoban ni si Saul do. Pillit ma sahalak sian hamu lao mangalo au. 9 Molo monang ibana mangalo au jala dipamate au, gabe hatobanmuna ma hami. Alai molo au do na monang jala hupamate ibana, hamu ma na gabe hatobannami.” 10 Didok si Goliat* ma muse, “Sadari on, hutantang ma hamu tentara ni Israel.+ Ise sian hamu na barani mangalo au, suru ma!”

11 Gabe mabiar situtu ma si Saul dohot sude halak Israel mambege hata ni si Goliat* i.

12 Adong ma sahalak bawa na margoar si Daud. Anak ni si Isai+ do ibana, halak Eprata+ na sian Betlehem+ na di Juda. Adong do ualu anak+ ni si Isai, jala nungnga matua ibana tikki si Saul gabe raja. 13 Anak ni si Isai siakkangan, i ma si Eliab,+ anakna paduahon si Abinadab,+ jala na patoluhon si Samma.+ Nungnga dohot nasida na tolu marporang rap dohot si Saul.+ 14 Si Daud do anakna siappudan,+ jala abangna na tolu i nungnga dohot marporang rap dohot si Saul.

15 Tikki i nungnga gabe parkarejo ni si Saul be si Daud. Nang pe songon i, jotjot do ibana mulak lao marmahan biru-biru+ ni bapakna di Betlehem. 16 Tikki di parporangan i, sai ro do si Goliat* mangasangi halak Israel saleleng 40 ari. Sai mangasangi do ibana ganup manogot dohot ganup botari.

17 Di sada tikki, didok si Isai ma tu si Daud anakna i, “Buat ma sappulu roti on dohot gandum na disaok* on hira-hira 22 liter.* Hatop ma taruhon i tu akka abangmu di perkemahan ni nasida. 18 Boan ma sappulu potong keju* on jala lehon ma tu pamimpin ni na sasaribu. Sukkun ma kabar ni akka abangmu jala boan ma tanda sian nasida.” 19 Tikki i, di Rura Elah+ do akka abang ni si Daud rap dohot si Saul dohot akka tentara ni Israel. Naeng marporang do nasida mangalo halak Palistim.+

20 Manogotna i, tibu do si Daud dungo, jala disuru ibana ma sasahalak manjaga biru-biruna. Diparade ibana ma siboanonna jala lao ma ibana songon na nidok ni si Isai. Dung sahat si Daud di perkemahan, naeng borhat ma akka tentara tu parporangan. Mardalan do nasida huhut marsurak. 21 Marbaris ma tentara ni halak Israel jala marbaris ma tentara ni halak Palistim di jolo ni nasida. 22 Pittor dipasahat si Daud ma na binoanna i tu panjaga barang asa dijaga. Marlojong ma ibana tu parporangan. Dung sahat ibana, disukkun ibana ma kabar ni akka abangna.+

23 Tikki na makkatai i si Daud, ro ma si Goliat+ halak Palistim na sian kota Gat. Kaluar ma ibana sian barisan ni tentara ni halak Palistim. Mangasangi ma muse ibana songon na parjolo i.+ Jala dibege si Daud do na nidokna i. 24 Tikki diida tentara ni halak Israel si Goliat, gabe mabiar ma nasida jala lari.+ 25 Dung i didok tentara ni halak Israel i ma, “Ida hamu ma, nungnga ro ibana. Ibana do na mangasangi halak Israel.+ Manang ise na boi manaluhon ibana, lehonon ni raja do godang arta tu ibana. Lehonon ni raja ma nang boruna.+ Jala didok raja do, dang lehonon ni pinoppar ni bapakna be pajak tu raja dohot akka na asing na ikkon lehonon ni halak Israel.”

26 Disukkun si Daud ma tu tentara na jongjong di labbungna, “Molo adong halak na boi pamatehon halak Palistim i jala na mambahen halak Israel dang dileai be, aha do hadiah na lao jaloonna? Ai ise do haroa halak Palistim na so marsunat on? Boasa barani ibana mangasangi tentara ni Debata na mangolu i?”+ 27 Dung i, didok nasida ma muse songon i tu si Daud. Didok ma, “On do hadiah na lao jaloon ni halak na boi pamatehon ibana.” 28 Dibege si Eliab+ abang ni si Daud do tikki makkatai ibana tu akka tentara i. Gabe muruk ma ibana tu si Daud jala didok ma, “Marhua ho tuson? Ise disuru ho manjaga biru-biru na otik i na di parmahanan i?+ Huboto do, na pajago-jagohon do ho jala naeng mangulahon na jahat do ho. Holan naeng mangida parporangan i do ho.” 29 Didok si Daud ma, “Ai aha haroa hubahen? Dang boi iba manukkun?” 30 Ditadikkon si Daud ma abangna i jala didapotton ibana ma tentara na asing. Disukkun ibana ma muse sukkun-sukkun na sarupa+ jala dos do alus ni nasida songon na parjolo i.+

31 Adong do halak na mambege na nidok ni si Daud i jala dipaboa ma i tu si Saul. Dung i disuru si Saul ma asa dialap si Daud. 32 Didok si Daud ma tu si Saul, “Unang pola adong na mabiar alani ibana. Lao pe naposomon mangalo halak Palistim i.”+ 33 Alai didok si Saul ma tu si Daud, “Dang tolap ho mangalo halak Palistim i, ai poso dope ho.+ Hape ibana, nungnga gabe tentara* mulai sian na poso.” 34 Didok si Daud ma tu si Saul, “Ale tuan, au do na marmahan akka biru-biru ni bapakku. Hea do ro singa+ mambuat sada biru-biru i. Jala hea do ro beruang mambuat sada biru-biru i. 35 Pittor hulele ma i, hupamate, jala hupalua ma biru-biru i sian babana. Tikki diroro au, hutarik ma ibbuluna,* huattuk, jala hupamate ma i. 36 Nungnga dipamate naposomon singa dohot beruang. Alani i, bahenokku ma songon i tu halak Palistim na so marsunat i. Ai ro do ibana mangasangi tentara ni Debata na mangolu i.”+ 37 Didok si Daud ma muse, “Nungnga dipalua Jahowa au sian singa dohot beruang. Alani i, paluaonna do au sian tangan ni halak Palistim i.”+ Didok si Saul ma tu si Daud, “Lao ma ho. Sai anggiat ma didongani Jahowa ho.”

38 Dilehon si Saul ma tu si Daud perlengkapanna na dipakke tu parporangan. Dibahen ma takkuluk tombaga tu ulu ni si Daud jala dipakkehon ma baju partahanan. 39 Diikkat si Daud ma podangna tu baju partahananna i. Alai, gabe maol do ibana mardalan, ai dang hea dipakke ibana songon i. Didok si Daud ma tu si Saul, “Dang boi au mardalan molo hupakke perlengkapan on. Ai so hea hupakke na songon on.” Dung i dibukkai si Daud ma sude perlengkapan i. 40 Dibuat ibana ma tukkotna, dipillit ibana ma lima batu na landit sian sunge* jala dipamasuk ibana ma i tu tasna na dipakke marmahan. Didapotton ibana ma halak Palistim i huhut ditiop ibana ambalangna.*+

41 Ro ma si Goliat* mandapotton si Daud jala mardalan do di jolo ni si Goliat halak na mamboan perisaina. 42 Tikki diida si Goliat* si Daud, diparekkeli ma si Daud jala direhei. Ai poso dope diida ibana si Daud jala ganteng rupana.+ 43 Didok si Goliat* ma tu si Daud, “Na dirippu ho do biang au,+ umbahen na mamboan tukkot ho mangalo au?” Dung i diburai si Goliat ma si Daud di bagasan goar ni akka debatana. 44 Didok si Goliat ma muse, “Ro ma ho tuson, asa hulehon ho allangon ni akka pidong dohot akka binatang buas.”

45 Didok si Daud ma tu si Goliat, “Podang dohot dua tombak+ do dipakke ho lao mangalo au, alai anggo au, di bagasan goar ni Jahowa Pamimpin ni Akka Tentara*+ do au mangalo ho. Ibana do Debata ni akka tentara ni Israel na nireheanmi.+ 46 Sadari on, pasahaton ni Jahowa ma ho tu tanganku.+ Pamateonku ma ho jala ponggolokku ma ulum. Sadari on, lehonokku ma bakke ni akka tentara ni halak Palistim tu akka pidong na martonga-tonga langit dohot tu binatang buas. Alani i, botoon ni sude halak na di tano on ma na adong do Debata ni halak Israel.+ 47 Jala botoon ni sude halak na pungu dison ma, dang porlu di Jahowa podang manang tombak lao paluahon hami.+ Jahowa do na manottuhon ise na monang di* parporangan on.+ Jala pasahatonna do hamu sude tu tangannami.”+

48 Maju ma si Goliat* mangalo si Daud jala hatop ma marlojong si Daud mandapotton si Goliat tu parporangan i. 49 Didadap si Daud ma tasna, dibuat ibana ma sada batu sian i, jala diambalang* ma si Goliat.* Hona ma batu i tu pardoppahan ni si Goliat. Masuk do batu i tu pardoppahanna, gabe tukkap ma ibana tu tano.+ 50 Songon i ma si Daud monang mangalo si Goliat.* Holan sada batu dohot ambalang* do dipakke ibana. Boi do ibana manaluhon jala pamatehon si Goliat, nang pe dang adong podangna.+ 51 Dung i, marlojong ma si Daud jala so ma ibana di labbung ni si Goliat.* Dibuat ibana ma podang ni si Goliat i+ sian ingananna, jala diponggol ma ulu ni si Goliat i paboa naung mate ibana. Tikki diida akka tentara ni halak Palistim naung mate tentara ni nasida na unjago i, gabe lari ma nasida.+

52 Marlojong ma akka tentara ni halak Israel dohot tentara ni Juda. Marsurak ma nasida jala dilele nasida ma halak Palistim i, mulai sian rura i+ sahat tu gerbang ni Ekron.+ Godang do tentara ni halak Palistim na dipamate nasida, jala marpeakan ma bakke ni nasida mulai sian dalan na sian Saraim+ sahat tu Gat dohot Ekron. 53 Dung sae dilele nasida halak Palistim i, lao ma nasida tu perkemahan ni halak Palistim mambuat akka arta ni halak Palistim.

54 Dung i dibuat si Daud ma ulu ni si Goliat* jala diboan ma i tu Jerusalem. Alai disippan ibana do akka sinjata ni si Goliat di kemahna.+

55 Tikki diida si Saul lao si Daud mangalo si Goliat,* disukkun ibana ma tu si Abner+ pamimpin ni tentarana i, “Anak ni ise+ do ibana Abner?” Dialusi si Abner ma, “Ale rajanami songon pastina ho mangolu,* dang huboto anak ni ise ibana!” 56 Didok raja ma, “Sukkun jo tu halak, anak ni ise do doli-doli i?” 57 Disi mulak si Daud pamatehon si Goliat,* diboan si Abner ma ibana tu si Saul. Jala ditiop ibana dope ulu ni si Goliat i.+ 58 Disukkun si Saul ma tu si Daud, “Anak ni ise do ho amang?” Dialusi si Daud ma, “Anak ni si Isai+ do au, naposom na sian Betlehem i.”+