1 Samuel
21 Lao ma si Daud tu Nob+ manjuppangi Malim Ahimelek. Tikki pajuppang nasida, mabiar do si Ahimelek tu si Daud. Didok ibana ma, “Boasa sahalakmu ro? Didia donganmu?”+ 2 Dialusi si Daud ma, “Adong tugas dilehon raja tu au. Alai didok raja, dang boi paboaokku tugas i manang tu ise pe. Jala dang boi paboaokku manang tu ise pe songon dia au mangulahon i. Jadi nungnga marjanji au lao pajuppang dohot akka tentarakku di sada inganan. 3 Alai boi do hupangido lima rotim? Molo adong lehon ma tu au. Molo dang adong, manang aha pe taho.” 4 Didok Malim Ahimelek ma tu si Daud, “Holan roti na badia do na adong. Dang adong roti na biasa. Alai boi do allangonmuna roti na badia i+ asal ma nungnga dipadao akka tentarami dirina sian borua.”*+ 5 Dialusi si Daud ma, “Nungnga hupadao hami dirinami sian akka borua. Haru mangulahon tugas na biasa pe songon marporang, hupadao hami do dirinami sian akka borua asa badia hami. Tarlumobi ma sadari on, ikkon badia do hami tikki mangulahon tugas na sian raja!”+ 6 Gabe dilehon malim i ma roti na badia i+ tu si Daud. Ai holan roti pelean i do na adong. Nungnga dibuat hian roti i sian jolo ni Jahowa jala nungnga digatti dohot roti na baru.
7 Tikki i, disi do sahalak parkarejo ni si Saul. Ditahan* do ibana di jolo ni Jahowa. Goarna si Doeg+ halak Edom+ jala pamimpin ni akka parmahan ni si Saul do ibana.
8 Didok si Daud ma tu si Ahimelek, “Adong do disi disippan ho podang manang tombak* na boi lehononmu tu au? Dang huboan podangku manang sinjatakku. Ai makkudus hian do au lao mangulahon tugas ni raja i.” 9 Didok malim i ma, “Holan podang ni si Goliat i+ do na adong dison, podang ni halak Palistim na pinamatemi di Rura Elah.+ Disi do i bukkus, di pudi ni baju epod.+ Molo olo ho, buat ma.” Didok si Daud ma, “Dia ma. Ai dang adong podang na songon i.”
10 Laos di ari i, ditorusson si Daud ma muse pardalananna asa lam dao+ sian si Saul. Ujungna sahat ma ibana di Gat, di kota ni Raja Akis.+ 11 Didok akka parkarejo ni Raja Akis i ma tu raja i, “Si Daud do ibana kan? Ibana do kan raja ni halak Israel i? Kan manortori do akka halak huhut marende taringot ibana? Diendehon nasida do,
‘Dipamate si Saul do marribu halak,
Jala marpulu ribu do dipamate si Daud.’”+
12 Sai dipikkiri si Daud ma hata ni nasida i. Jala gabe mabiar situtu+ ma ibana tu si Akis raja ni halak Gat i. 13 Dibahen si Daud ma ibana songon na rittik+ jala dibahen ibana ma muse songon i tikki naeng ditakkup ibana. Dicoreti ibana ma akka pintu ni gerbang ni kota i jala dipasombu ibana ma manetehi ijurna tu jenggotna. 14 Didok si Akis ma tu akka parkarejona i, “Nungnga diboto hamu na rittik ibana. Boasa diboan hamu ibana tuson? 15 Na dirippu hamu do hurangan halak na rittik au? Boasa diboan hamu na rittik on tuson? Boasa masuk jolma sisongon on tu jabukku?”