Na disurat si Mateus

21 Tikki lam jonok nasida tu Jerusalem, jala dung sahat nasida di Betpage na di Dolok Jetun, disuru Jesus ma dua siseanna lao.+ 2 Didok ibana ma tu nasida, “Lao ma hamu tu huta na di jolo an. Juppangmuna do annon disi sada halode na tartabbat rap dohot anakna. Bukka ma talina i jala boan ma duassa tuson. 3 Molo adong na manukkun boasa diboan hamu halode i, dokkon hamu ma, ‘Porlu halode on pakkeon ni Tuan.’ Dung i, pittor loasonna do hamu mamboan i.”

4 Dung i, masa ma songon i jala gabe saut ma hata ni panurirang* na mandok, 5 “Paboa ma tu boru Sion, ‘Nungnga ro be rajam mandapotton ho.+ Lambok do ibana.+ Hundul do ibana di atas ni sada halode. Tutu, hundul do ibana di atas ni halode na poso, anak ni halode boban.’”+

6 Dung i, lao ma akka sisean i jala diulahon nasida ma songon na nidok ni Jesus.+ 7 Diboan nasida ma halode dohot anakna i. Dibahen nasida ma pakkean ni nasida tu halode i jala hundul ma Jesus di atasna.+ 8 Godang ma halak na pahembangkon pakkean ni nasida di dalan.+ Adong ma muse na asing na mamonggoli ratting ni hau, jala dipappeakkon ma i di dalan. 9 Sude ma halak na mardalan di jolona dohot di pudina mandok, “Sai lehon ma haluaon tu Anak ni si Daud!+ Dipasu-pasu ma na ro di bagasan goar ni Jahowa!*+ Sai anggiat ma dilehon Debata na di banua ginjang i haluaon tu ibana!”+

10 Dung masuk ibana tu Jerusalem gabe gaor ma kota i. Ninna akka jolma na disi ma, “Ai ise do i?” 11 Didok akka na mangihutton Jesus i ma, “Jesus do i, panurirang do ibana,+ sian Nasaret do ibana na di Galilea!”

12 Masuk ma Jesus tu bagas joro. Dipalao ibana ma sude akka partiga-tiga dohot panuhor na adong disi. Dibalikkon ibana ma meja ni akka situkkar hepeng dohot bangku ni partiga-tiga darapati.+ 13 Didok ibana ma tu nasida, “Adong do tarsurat, ‘Didok nama jabukki gabe jabu partangiangan,’+ alai gabe inganan* ni akka pangarampok+ do dibahen hamu.” 14 Marroan ma muse akka na mapitung dohot na pakpang mandapotton ibana di bagas joro. Dung i, dipamalum ibana ma nasida.

15 Gabe muruk ma akka malim kepala* dohot siboto surat* dung diida nasida akka tanda halongangan* na binahen ni Jesus. Muruk do muse nasida+ alani akka dakdanak bawa na di bagas joro i. Ai sai didok dakdanak i do, “Sai lehon ma haluaon tu Anak ni si Daud!”+ 16 Didok nasida ma tu Jesus, “Dibege ho do na nidok ni nasida i?” Dialusi ibana ma, “Hubege. Na so hea do dijaha hamu na tarsurat i? Didok do, ‘Dibahen ho do pamangan ni akka dakdanak dohot akka poso-poso pasahatton puji-pujian.’”+ 17 Dung i, ditadikkon Jesus ma nasida. Lao ma ibana tu kota Betania jala marborngin disi.+

18 Di manogotna i, di tikki mulak tu Jerusalem, male ma ibana.+ 19 Diida ibana ma hau ara di pinggir dalan jala lao ma ibana tusi. Alai holan bulungna do na godang, dang adong dapotna nanggo sada pe parbuena.+ Gabe didok ma tu hau i, “Mulai sian saonari, dang marparbue be ho.”+ Di tikki i, pittor malos ma hau ara i. 20 Diida akka siseanna ma na masa i, longang ma nasida jala ninna ma, “Boasa boi pittor malos hau ara i?”+ 21 Dialusi Jesus ma nasida, “Tutu do na hudok on tu hamu, molo porsea do hamu jala dang ganggu rohamuna, boi do bahenonmuna songon na hubahen tu hau ara i. Gariada, lobi sian i pe boi do bahenonmuna. Molo didok hamu tu dolok on, ‘Pinda ma ho sian on jala dabu ma ho tu laut,’ sai na saut do i.+ 22 Molo porsea hamu, manang aha pe na dipangido hamu di bagasan tangiang, pasti jaloonmuna do i.”+

23 Dung i, masuk ma Jesus tu bagas joro. Tikki mangajari ibana, didapotton akka malim kepala dohot akka pangituai* ma ibana. Didok nasida ma tu ibana, “Huaso ni ise do dipakke ho mangulahon on? Ise do na manuru ho mangulahon on?”+ 24 Didok Jesus ma tu nasida, “Alusi hamu ma jo sukkun-sukkunkon. Molo dialusi hamu au, paboaokku ma tu hamu marhite huaso ni ise au mangulahon i sude. 25 Sian ise do dijalo si Johannes huaso lao mandidi jolma? Sian banua ginjang do manang sian jolma?” Gabe didok nasida ma tu akka donganna, “Molo tadok sian banua ginjang, dohononna ma tu hita, ‘Attong boasa dang porsea hamu tu ibana?’+ 26 Alai molo tadok, ‘Sian jolma,’ sotung muruk annon akka jolma on tu hita. Ai sude do nasida mandok si Johannes sahalak panurirang.” 27 Alani i, didok nasida ma tu Jesus, “Dang huboto hami.” Dung i, didok Jesus ma tu nasida, “Au pe, dang paboaokku tu hamu marhite huaso ni ise au mangulahon i sude.

28 “Songon dia do pandapotmuna? Adong ma dua anak ni sahalak bawa. Didok ibana ma tu anakna siakkangan, ‘Lao ma jo ho amang karejo sadari on tu ladang anggurta i.’ 29 Didok anakna i ma, ‘Dang olo au.’ Alai dukkon i, gabe manolsoli do rohana jala lao ma ibana. 30 Didok bawa i ma muse songon i tu anakna na paduahon. Didok anakna i ma, ‘Olo Bapa, lao pe au.’ Alai dang lao anakna i. 31 Menurut hamu, ise ma sian anakna na dua i na mangoloi hata ni bapakna?” Dialusi nasida ma, “Na siakkangan i.” Didok Jesus ma tu nasida, “Tutu do na hudok on tu hamu, parjolo do sijalo pajak dohot boru-boru na so hasea masuk tu Harajaon ni Debata sian hamu. 32 Ai nungnga ro si Johannes patuduhon na sittong tu hamu, alai dang porsea hamu tu ibana. Hape anggo sijalo pajak dohot boru-boru na so hasea porsea do tu ibana.+ Alai nang pe naung diida hamu i, dang olo hamu paubahon rohamuna lao porsea tu ibana.

33 “Bege hamu ma tudosan na asing: Adong ma ladang ni sahalak bawa, disuan ibana ma anggur+ di ladangna i. Dihandangi ibana ma sakaliling ni ladangna i. Dibahen ma inganan pamoroan ni anggur jala dipajongjong ma sada menara+ inganan ni panjaga. Dipasewahon ma i tu akka pangula, dung i lao ma ibana tu luat na asing.+ 34 Dung dapot tikkina panen, disuru ibana ma akka hatobanna mandapotton akka pangula i. Disuru do nasida lao manjalo anggur bagianna tu akka pangula i. 35 Alai, ditakkup akka pangula i ma akka hatobanna i. Adong ma na dipukkuli, adong ma na dipamate jala na asing didangguri dohot batu.+ 36 Dung i, disuru ibana ma muse hatoban na asing. Unggodang do nasida sian na parjolo i. Alai dibahen pangula i do muse songon i tu nasida.+ 37 Ujungna, disuru bawa i ma anakna ro mandapotton akka pangula i. Ai ninna rohana, ‘Habiaran ni nasida do ra anakki.’ 38 Alai dung diida nasida anakna i, didok akka pangula i ma tu akka donganna, ‘Tu ibana do lao dilehon ladang on.+ Beta, tapamate ma ibana asa di hita parbagiananna i!’ 39 Dung i, ditakkup nasida ma ibana. Disarat ma ibana tu luar ni ladang i jala dipamate ma ibana.+ 40 Alani i, menurut hamu, tikki ro nappuna ladang anggur i, aha ma bahenonna tu akka pangula i?” 41 Dialusi nasida ma ibana, “Ala jahat do nasida, pamateonna ma nasida. Dung i disewahon ma ladang anggur i tu halak na asing, na olo mangalehon bagianna molo dung juppang musim panen.”

42 Didok Jesus ma tu nasida, “Na so hea do dijaha hamu di Surat na Badia i? Didok do, ‘Batu na dibolokkon akka tukkang nungnga gabe batu parsuhi-suhi*+ na rumikkot. Sian Jahowa* do i jala longang do rohatta mangida i.’+ 43 Alani i hudok ma tu hamu, dibuat nama Harajaon ni Debata sian hamu, jala dilehon nama i tu sada bangso na mangulahon lomo ni roha ni Debata. 44 Masarsar do manang ise na madabu tu batu i+ jala ropuk do manang ise pe na ditipa batu i.”+

45 Dung dibege akka malim kepala dohot halak Parise akka tudosan i, diboto nasida ma, taringot tu nasida do na nidokna.+ 46 Naeng ditakkup nasida do nian Jesus. Alai mabiar do nasida tu akka halak na disi, ai panurirang+ do ibana didok roha ni nasida.