5 Musa
3 “Dung i, marbalik ma hita jala mardalan sian Dalan Basan. Ro ma si Og raja ni Basan rap dohot sude tentarana marporang mangalo hita di Edrei.+ 2 Didok Jahowa ma tu au, ‘Unang pola mabiar ho tu ibana. Ai pasahatonku do ibana, sude tentarana, dohot luatna i tu tanganmu. Bahenonmu do tu ibana dos songon na dibahen ho tu si Sihon raja ni halak Amori na tinggal di Hesbon i.’ 3 Jadi dipasahat Jahowa Debatanta i ma muse si Og raja ni Basan dohot sude tentarana tu tanganta. Tapamate ma nasida jala dang adong nanggo sahalak pe na tapasombu mangolu. 4 Tataluhon ma muse sude kotana. Adong 60 kota di sude luat ni Argob na nirajaan ni si Og di Basan.+ Dang adong na tinggal nanggo sada pe sian kotana i. 5 Martembok do sude akka kota i jala timbo do tembokna. Adong do muse gerbangna, palangna jala godang do akka huta di kota i. 6 Alai tahancurhon do sudena i,+ dos songon na tabahen tu si Sihon raja ni Hesbon. Tahancurhon do ganup kota. Tapamate do akka bawa, borua, dohot akka dakdanak.+ 7 Tabuat do sude akka binatang na dipiaro nasida jala taboan do akka barang na sian kota ni nasida.
8 “Tikki i, tabuat do luat ni raja ni halak Amori+ na dua i, i ma luat na di Sunge Jordan. Mulai sian Rura* Arnon sahat tu Dolok Hermon,+ 9 (halak Sidon mandok Dolok Hermon i Sirion, jala halak Amori mandok i Senir,) 10 sude kota na di atas ni dolok, sude na di Gilead, dohot sude kota na di Basan sahat tu Salka dohot Edrei,+ i ma akka kota na dirajai si Og di Basan. 11 Si Og raja ni Basan ma halak Repaim na parpudi mangolu. Sian bosi do dibahen potina* jala adong dope i di Rabba, di kota ni halak Ammon. Sia asta* ma ganjangna jala opat asta ma bidangna, mangihutton asta na somal dipakke. 12 Tikki i, tabuat ma akka luat on gabe appunatta: mulai sian Aroer+ na adong di topi ni Rura Arnon, dohot satonga sian luat na mardolok-dolok di Gilead. Hulehon ma akka kota na di luat i tu marga Ruben dohot marga Gad.+ 13 Jala luat na di Gilead na satonga nai dohot sude luat na di Basan, na dirajai si Og, hulehon do tu satonga marga Manasse.+ Najolo, sude luat na di Argob, i ma na di Basan didok halak do luat ni halak Repaim.
14 “Dibuat si Jair+ anak ni si Manasse ma sude luat na di Argob+ sahat tu parbatasan ni huta ni halak Gesur dohot halak Maakat.+ Dibahen ibana ma goar ni akka huta Basan i songon goarna sandiri, i ma Hawot-jair*+ sahat tu sadari on. 15 Hulehon ma huta na di Gilead tu si Mahir.+ 16 Jala tu marga Ruben dohot tu marga Gad,+ hulehon do luat na adong mulai sian Gilead sahat tu luat na di Rura* Arnon na marbatasan tu tonga-tonga ni rura i, jala sian i muse sahat tu Jabok, i ma rura na gabe parbatasan tu huta ni halak Ammon. 17 Hulehon do muse tu nasida Araba, Sunge Jordan, dohot huta parbatasan mulai sian Kineret sahat tu Laut Araba, i ma Laut Sira,* na di pat ni dolok Pisga tu sabola timur.+
18 “Dung i hudok ma tu nasida paretta on, ‘Nungnga dilehon Jahowa Debatamuna i luat on gabe appunamuna. Alani i, suru ma sude bawa sian margamuna na gogo jala na barani paradehon dirina lao marporang, jala lao manaripar parjolo di jolo ni akka haha anggimuna halak Israel+ na deba nai. 19 Holan istrimuna dohot akka anakmuna ma na toktong tinggal di akka kota na hulehon i tu hamu, songon i nang akka binatang na dipiaro hamu. (Takkas do huboto na godang situtu binatang na dipiaro hamu.) 20 Urupi ma akka haha anggim sahat tu na dibahen Jahowa dame ngolu ni nasida, songon naung dibahen Ibana tu hamu. Urupi ma nasida sahat tu na dibuat nasida luat na lao lehonon ni Jahowa i gabe appuna ni nasida, i ma luat na di bariba ni Sunge Jordan. Dukkon i, mulak ma hamu tu luat naung hulehon tu hamu.’+
21 “Tikki i, hudok ma paretta on tu si Josua,+ ‘Nungnga takkas diida ho sandiri songon dia dibahen Jahowa Debatamuna tu raja na dua on. Songon i ma na lao bahenon ni Jahowa tu sude harajaon na lao sitopotonmu.+ 22 Unang pola mabiar hamu tu nasida. Ai Jahowa Debatamuna i do na lao marporang humokkop hamu.’+
23 “Di tikki i, hupangido ma tu Jahowa, 24 ‘Ale Tuan Natumimbul Jahowa, nungnga dipatudu Ho hasangaponmu dohot huasom na balga*+ i tu au naposomon. Dang adong debata di langit manang di tano on na boi patuduhon huaso na balga songon na binahenmi.+ 25 Paloas ma au manaripar jala mangida luat na denggan na di bariba ni Sunge Jordan i, asa huida huta Libanon dohot akka huta na uli na di inganan na mardolok-dolok i.’+ 26 Alai alani hamu, muruk do Jahowa tu au+ jala dang ditangihon Ibana pangidoakki. Didok Jahowa do, ‘Nungnga sae be i! Unang be hatai taringot i tu Au. 27 Nakkok ma ho tu pussu ni Pisga.+ Ida ma tu sabola barat, tu utara, tu selatan, dohot tu timur. Parrohahon ma luat na niidami. Ai dang na lao dohot be ho manaripari Sunge Jordan.+ 28 Pillit ma si Josua+ manggattihon ho. Papos ma rohana jala patogu ma ibana. Ai ibana nama na mamimpin bangso i manaripar,+ jala ibana nama na lao mamimpin bangso i mambuat luat na niidami gabe appuna ni nasida.’ 29 Masa ma i sude tikki tinggal hita di rura na di jolo ni Bet-peor.+