5 Musa
10 “Tikki i, didok Jahowa ma tu au, ‘Bahen ma dua batu panuratan songon na parjolo i.+ Nakkok ma ho tu dolok asa ro ho tu jolokku. Jala bahen ma sada poti na sian hau. 2 Ai suratokku do muse tu dua batu panuratan i, sude hata naung husurat tu batu panuratan na parjolo naung diputtarhonmi. Dung i, ikkon bahenonmu do batu i tu poti i.’ 3 Alani i, hubahen ma poti na sian hau akasia dohot dua batu panuratan dos songon na parjolo i. Dung i, nakkok ma au tu dolok i jala huboan do batu panuratan na dua i.+ 4 Disuratton Ibana ma tu akka batu panuratan i akka hata naung disuratton Ibana hian,+ i ma Patik na Sappulu*+ i. Nungnga dipaboa Jahowa hian hata i tu hamu, sian tonga-tonga ni api+ tikki na marpungu hamu di dolok i.+ Dung i, dilehon Jahowa ma batu panuratan i tu au. 5 Turun ma au sian dolok i,+ jala hubahen ma akka batu panuratan i tu bagasan ni poti na hubahen i. Toktong do i adong disi, songon na diparettahon Jahowa tu au.
6 “Borhat ma halak Israel sian Beerot Bene-jaakan tu Moserot. Disi ma si Aron mate jala dikuburhon.+ Dung i, si Eleasar anakna i ma na manggattihon ibana gabe malim.+ 7 Sian i borhat ma nasida muse tu Gudgoda, jala sian Gudgoda tu Jobata.+ Massai godang do sunge* di inganan i.
8 “Di tikki i ma dipapulik Jahowa marga Lepi.+ Dipillit do nasida lao mamboan poti parpadanan ni Jahowa,+ lao marhobas di jolo ni Jahowa, jala lao mangido pasu-pasu tu bangso i di bagasan goarna,+ songon na diulahon nasida sahat tu saonari. 9 Alani i ma dang adong parbagianan manang warisan ni si Lepi songon haha anggina. Jahowa do na manjaga jala na mangalehon na porlu di ibana.* Ai songon i do didok Jahowa Debatamuna tu ibana.+ 10 Toktong ma au tinggal di dolok i saleleng 40 ari 40 borngin+ songon na huulahon na parjolo i. Ditangihon Jahowa do muse au di tikki i,+ jala gabe dang saut dipamate Jahowa hamu sude. 11 Dung i, didok Jahowa ma tu au, ‘Pimpin ma bangso i jala parade hamu ma dirimuna lao borhat, asa boi nasida masuk tu luat i jala mambuat luat na hujanjihon tu akka ompu ni nasida lao lehonokku gabe appuna ni nasida.’+
12 “Saonari ale Israel, aha do na dipangido Jahowa Debatamuna i sian hamu?+ Holan on do: Habiari hamu ma Jahowa Debatamuna i,+ ihutton hamu ma sude dalanna,+ haholongi hamu ma Ibana, somba hamu ma Jahowa Debatamuna i sian nasa rohamuna dohot sian nasa ngolumuna,+ 13 jala oloi hamu ma akka parettana dohot aturan ni Jahowa na hupaboa tu hamu sadari on, asa denggan ngolumuna.+ 14 Ai Jahowa Debatamuna i do nappunasa langit dohot langit ni langit an.* Jala Ibana do nappunasa tano on dohot nasa na adong di bagasanna.+ 15 Alai holan tu akka ompumuna i do Jahowa jonok, jala holan tu nasida do dipatudu Ibana holongna. Dipillit Ibana do hamu, i ma akka pinoppar ni akka ompumuna i+ sian sude akka bangso songon sadari on. 16 Alani i, paias* hamu ma rohamuna+ jala unang be takkang rohamuna.*+ 17 Ai Jahowa Debatamuna i do Debata na untimbo sian sude debata na asing,+ Tuan na untimbo sian sude tuan na asing, Debata na sangap, na massai gogo, na ikkon dipasangap jala dihabiari jolma. Ibana do Debata na so paimbar-imbarhon halak+ jala na so manjalo sogok. 18 Adil do Debata tikki manguhumi halak na so marama dohot na so marina, nang akka ina na mabalu.+ Jala dihaholongi Ibana do halak panoppang na sian bangso na asing,+ dilehon Ibana do sipanganon ni nasida dohot pakkean ni nasida. 19 Alani i, hamu pe ikkon dihaholongi hamu do akka halak panoppang na sian bangso na asing. Ai najolo panoppang do hamu di Mesir.+
20 “Jahowa Debatamuna i do na ikkon habiaranmuna. Ibana do na ikkon sombaonmuna.+ Ikkon tu Ibana do hamu toktong setia* jala ikkon di bagasan goarna do hamu marsumpa. 21 Ibana do na ikkon pujionmuna.+ Ibana do Debatamuna, na mangulahon sude ulaon na balga, ulaon na palongang roha, dohot na parohon biar di jolomuna.+ 22 Najolo holan 70 halak do akka ompumuna na lao tu Mesir.+ Alai saonari, nungnga dibahen Jahowa hamu massai godang songon akka bintang na di langit.+