Hesekiel

38 Dung i didok Jahowa ma muse tu au, 2 “Ale anak ni jolma, ida ma doppak Gog na sian luat Magog,+ pamimpin na untimbo na di Mesek dohot Tubal.+ Paboa ma aha na lao masa taringot ibana,+ 3 Dok ma, ‘Songon on do hata ni Jahowa Tuan Natumimbul i, “Ale Gog pamimpin na untimbo di Mesek dohot Tubal, au ma na gabe alom. 4 Bahenokku ma hamu manirpang jala bahenokku ma hait-hait tu osang-osangmuna.+ Boanokku ma hamu kaluar rap dohot sude tentaram.+ Boanokku ma akka hodam dohot akka tentara na hundul di hoda i. Marpakkean na sangap do nasida sude, jala pasukan tentara na balga do nasida. Sude do nasida mamboan perisai na balga dohot perisai na gelleng.* Jala sude do nasida mamboan podang. 5 Rap do nasida dohot halak Persia, Etiopia, dohot halak na sian luat Put.+ Sude nasida mamakke perisai na gelleng dohot takkuluk bosi. 6 Massai godang do halak na rap dohot ho. Dohot do muse Gomer, rap dohot sude tentarana, dohot pinoppar ni si Togarma+ na sian inganan na undao di sabola utara+ rap dohot sude tentaram.

7 “‘“Parade ma dirim, ho dohot sude tentara na marporang dohot ho. Parade hamu ma dirimuna, ho ma na gabe komandan* ni nasida.

8 “‘“Dung salpu manang na piga leleng dijou ma ho. Ujungna, di ujung ni akka taon i lao ma ho mangalo sada luat appuna ni akka halak naung mulak jala naung malua sian podang. Nasida nungnga dipapungu sian akka bangso tu dolok ni Israel naung leleng tarulang i. Nungnga dipapungu akka penduduk ni luat i sian tonga-tonga ni akka bangso jala nungnga dame nasida tinggal disi.+ 9 Songon badai ma ho ro mangalo nasida. Ditutupi ho ma luat i songon ombun. Ai na lao ro ma ho rap dohot sude tentaram, dohot sude bangso na rap dohot ho mangalo nasida.”’

10 “Songon on do hata ni Jahowa Tuan Natumimbul i, ‘Di ari i, tubu ma na jahat di bagasan roham dohot di pikkiranmu. Jala marsakkap ma ho lao mangulahon na jahat. 11 Dohononmu ma, “Ro nama au mangalo akka huta na so martembok.+ Ro nama au mangalo akka halak na dame jala na aman ngoluna. Ai tinggal do nasida sude di akka huta na so martembok, marpalang, manang margerbang.” 12 Aloonmu ma akka halak na tinggal di luat naung hancur i, i ma luat naung diingani+ akka halak naung dipapungu sian tonga-tonga ni akka bangso,+ luat ni akka halak na papunguhon arta dohot hamoraon+ jala na tinggal di tonga-tonga ni tano on. Buatonmu ma godang arta dohot barang ni nasida.

13 “‘Dohonon ni Seba,+ Dedan,+ akka partiga-tiga na sian Tarsis,+ dohot sude tentarana ma tu ho, “Na lao mambuat arta dohot mangarampok do ho umbahen na lao ho mamorangi luat i? Na lao mambuat perak dohot mas, akka arta, dohot akka barang-barang do ho umbahen na dipapungu ho akka tentaram?”’

14 “Alani i anak ni jolma, paboa ma aha na lao masa. Dokkon ma tu Gog, ‘Songon on do hata ni Jahowa Tuan Natumimbul i, “Di ari i botoonmu ma nungnga dame ngolu ni Israel bangsokki tinggal di luat i.+ 15 Dung i ro ma ho sian ingananmu, sian inganan na undao di sabola utara.+ Ro ma ho rap dohot godang halak na ro sian godang bangso. Sude do nasida hundul di atas ni hoda. Massai godang do nasida dos songon pasukan tentara na massai balga.+ 16 Ale Gog, na lao ro nama ho mangalo Israel bangsokki, dos songon ombun na manutupi sada luat. Di ujung ni akka ari i, boanokku ma ho lao mangalo luat appunakki.+ Alani i, di tikki hupabadia dirikku marhite ho di jolo ni akka bangso, botoon ni nasida ma taringot tu Au.”’+

17 “Songon on do hata ni Jahowa Tuan Natumimbul i, ‘Mulai sian najolo nungnga makkatai Au marhite naposokku, i ma akka panurirang* na di Israel. Saleleng martaon-taon dipaboa nasida do taringot sasahalak na lao mangalo halak Israel. Ho ma halak na nidok ni nasida i.’

18 “‘Di ari i, di ari tikki ro Gog mangalo luat ni halak Israel, marsigorgor ma rimashu’+ ninna Jahowa Tuan Natumimbul i. 19 ‘Di bagasan murukku dohot rimashu na marsigorgor i, makkatai ma Au. Di ari i, masa ma gempa na massai gogo di luat ni Israel. 20 Mabiar ma sude alani Au. Mabiar ma sude dekke na di laut, pidong na di langit, binatang buas na di ladang, sude binatang na manjirir di tano, dohot sude jolma na di tano on. Masursur ma akka dolok,+ jala maruppak ma sude tembok.’

21 “‘Parookku ma podang mangalo ibana di sude akka dolokku,’ ninna Jahowa Tuan Natumimbul i. ‘Bahenokku ma akka tentarana masibunuan sama nasida.+ 22 Hukumokku ma ibana, parookku ma sahit na masa di godang inganan+ tu ibana dohot tu akka tentarana. Godang ma halak na marmatean, parookku ma udan na massai doras, udan es,+ udan api,+ udan belerang+ tu ibana, tu tentarana, dohot tu akka halak na sian akka bangso na rap dohot ibana.+ 23 Bahenokku ma sangap dirikku, pabadiaokku ma dirikku jala patuduokku ma i di jolo ni godang bangso. Botoon ni nasida ma na Au do Jahowa.’