Jesaya
63 Ise do na ro sian Edom,+
Na sian Bosra+ na mamakke baju na cerah,*
Na massai uli bajuna,
Na mardalan di bagasan huaso na massai balga?
“Au do i, Debata na makkatahon na sittong,
Debata na mamakke huasona na massai balga lao paluahon.”
2 Boasa warna merah bajum?
Jala boasa pakkeanmu songon pakkean ni halak na mandege-dege anggur di inganan pamoroan ni anggur?+
3 “Sahalakku do mandege-dege inganan ni anggur,
Dang adong nanggo sahalak pe sian akka bangso na mandongani Au.
Torus do nasida hudege-dege di bagasan murukku,+
Jala sai hudege-dege do nasida di bagasan rimashu.
Marbirsakan ma mudar ni nasida tu bajukku,
Jala gabe gok mudar ma sude bajukku.
4 Nungnga hutottuhon+ andigan ari lao mambalos,
Jala nungnga juppang be taon lao manobus bangsokki.
5 Nungnga huida, alai dang adong na olo mangurupi,
Tarsonggot do Au ala dang adong na olo mangurupi.
Alani i, marhite tanganku sandiri ma Au parohon haluaon,*+
Jala rimashi ma na mangonjar rohakku mangulahon i.
6 Di bagasan murukku, hudege-dege ma bangsokki,
Mabuk ma nasida hubahen alani rimashu+
Jala huusehon ma mudar ni nasida tu tano.”
7 Huhatahon ma taringot tu holong* na pinatudu ni Jahowa,
Akka ulaon ni Jahowa na patut dipuji,
Ai nungnga godang na diulahon Jahowa tu hita,+
Godang do na diulahon Ibana tu halak Israel,
Alani asi ni rohana dohot holongna* na massai balga i.
8 Ai didok Ibana do, “Sasittongna nasida ma bangsokku, akka anak na toktong setia* tu Au.”+
Alani i, Ibana do na gabe Sipalua ni nasida.+
9 Di tikki susa nasida, marsak do pakkilalaanna.+
Suru-suruan na adong di jolona* ro paluahon nasida.+
Alani holongna dohot asi ni rohana, ditobus* Ibana do nasida,+
Toktong do diangkat jala diboan Ibana nasida.+
10 Alai mangalo+ do nasida jala dibahen do lungun rohana.*+
11 Dung i mulai ma diingot nasida na masa najolo,
Na masa di tikki ni si Musa naposona i, jala didok,
“Nungnga didia Debata na mamboan nasida kaluar sian laut+ rap dohot akka parmahan ni bangsona i?+
Didia do Debata na mangalehon tu ibana tondi parbadia?+
12 Didia do Debata na mangurupi tangan kanan ni si Musa+ marhite tanganna na gogo i,
Debata na mambola laut di jolo ni nasida,+
Lao mambahen asa diingot goarna+ i saleleng ni lelengna?
13 Didia do Debata na mambahen nasida boi mardalan di tonga-tonga ni laut na margalumbang,*
Na mambahen nasida dang tartuktuk tikki mardalan,
Songon hoda na mardalan di gurun pasir?
14 Dos songon binatang na diparmahan na turun tu rura lao maradi,
Dibahen tondi parbadia ni Jahowa ma nasida maradi.”+
15 Sai tatap ma sian surgo,
Sian ingananmu na timbo, na badia jala na mulia* i.
Boasa dang diparrohahon Ho be hami?
Jala boasa dang dipatuduhon Ho be huasomi?
Nungnga didia holong ni roham+ dohot asi ni roham+ na massai balga i?
Ditahan Ho do sudena i, dang dilehon Ho tu hami.
16 Ai Ho do Ama di hami.+
Nang pe ra dang ditanda si Abraham hami,
Jala dang diakkui si Israel hami,
Alai Ho do Amanami, ale Jahowa.
Ho do na manobus* hami mulai sian najolo.+
17 Ale Jahowa, boasa dipasombu* Ho hami manirpang sian dalanmi?
Boasa dipasombu* Ho takkang rohanami umbahen gabe dang mabiar hami tu Ho?+
Mulak ma Ho muse humokkop naposomon,
Humokkop akka marga naung gabe appunami.+
18 Holan satokkin do luat i gabe appuna ni bangsom na badia i.
Nungnga didege-dege alonami ingananmu na badia i.+
19 Nungnga tung leleng hami gabe songon halak na so hea diparetta Ho,
Songon akka halak na so hea dijou mamakke goarmu.