Hesekiel

36 “Ale anak ni jolma, paboa ma akka na lao masa tu akka dolok ni Israel. Dokkon ma, ‘Ale akka dolok ni Israel, tangihon ma hata ni Jahowa. 2 Songon on do hata ni Jahowa Tuan Natumimbul i, “Didok akka musumuna do songon on taringot tu hamu, ‘Tuani ma i, nungnga gabe appunatta+ be akka inganan na timbo* na dibahen sian najolo!’”’

3 “Alani i, paboa ma aha na lao masa. Dokkon ma, ‘Songon on do hata ni Jahowa Tuan Natumimbul i, “Ai nungnga dipasombu nasida tarulang luatmuna i. Diserang nasida do hamu sian sude inganan, asa gabe appuna ni akka bangso na di sakalilingmuna i hamu. Sai dipahata-hata nasida do hamu jala diparoa-roa.+ 4 Alani i, ale akka dolok ni Israel, tangihon ma hata ni Jahowa Tuan Natumimbul i! Songon on do hata ni Jahowa Tuan Natumimbul i tu sude dolok, tu akka sunge, tu akka rura, tu akka kota na maruppak jala na tarulang,+ dohot tu kota naung ditinggalhon, i ma kota naung dibuat musu akka artana jala naung dileai akka bangso na tinggal di sakaliling ni nasida.+ 5 Songon on ma hata ni Jahowa Tuan Natumimbul i tu sudena i, ‘Alani rimashu+ makkatai ma Au tu sude bangso na adong dope di sakalilingmuna i dohot tu sude halak Edom. Ai nasida do na marlas ni roha mambuat akka luat i gabe appuna ni nasida. Jala direhei+ nasida do akka naposokki, dibuat nasida do akka arta ni nasida dohot sude panjappalan ni nasida.’”’+

6 “Alani i, paboa ma na lao masa tu luat ni Israel, dokkon ma tu sude dolok-dolok, tu akka sunge, dohot tu akka rura, ‘Songon on do hata ni Jahowa Tuan Natumimbul i, “Ida ma! Di bagasan muruk dohot rimashu, makkatai nama Au. Ai nungnga marlea hamu dibahen akka bangso.”’+

7 “Alani i, songon on ma hata ni Jahowa Tuan Natumimbul i, ‘Angkatokku ma tanganku lao marsumpa. Bahenokku ma maila sude bangso na di sakalilingmuna.+ 8 Alai anggo hamu akka dolok ni Israel, bahenokku ma gok hau disi. Mardakkai ma i jala marparbue lao di Israel bangsokki.+ Ai satokkin nai, mulak nama nasida. 9 Ai donganakku nama hamu jala huparrohahon nama hamu. Diula nama hamu jala disabur nama boni disi. 10 Bahenokku ma lam godang rakyatmuna, i ma halak Israel i. Diingani ma muse akka kota+ jala dibangun ma akka naung ruppak.+ 11 Tutu, bahenokku ma lam godang rakyatmuna dohot binatang na dipiaro hamu.+ Lam godang ma nasida jala martamba-tamba. Bahenokku ma hamu diingani songon najolo i.+ Jala lam mamora ma hamu lobi sian najolo i.+ Sian i botoonmuna ma na Au do Jahowa.+ 12 Bahenokku ma Israel bangsokki tinggal di luatmuna. Nasida ma na gabe nappunasa hamu.+ Hamu ma na gabe parbagianan ni nasida, jala dang bahenonmuna be nasida gabe tilahaon.’”+

13 “Songon on ma hata ni Jahowa Tuan Natumimbul i, ‘Ai didok nasida do tu hamu, “Hamu do luat na mamboddut akka jolma jala na mambahen akka bangso tilahaon.”’ 14 ‘Alani i, dang boddutonmuna be akka jolma manang dang bahenonmuna be akka bangso tilahaon,’ ninna Jahowa Tuan Natumimbul i. 15 ‘Dang pasombuonku be hamu marlea dibahen akka bangso manang direhei akka halak.+ Dang bahenonmuna be hancur bangsomi,’ ninna Jahowa Tuan Natumimbul i.”

16 Dung i didok Jahowa ma muse tu au, 17 “Ale anak ni jolma, tikki tinggal halak Israel di luat ni nasida, dibahen nasida do ramun* luat i marhite pambahenan dohot pangalaho ni nasida.+ Ramun do na binahen ni nasida i di jolokku, dos ma i songon borua na datang bulan.+ 18 Alani i, huusehon ma rimashu tu nasida. Ai nungnga diusehon nasida mudar di luat i+ jala nungnga dibahen nasida gabe ramun luat i alani debata ni nasida na huhagigihon* i.+ 19 Alani i, hubahen ma nasida marserak tu tonga-tonga ni akka bangso dohot tu tonga-tonga ni akka luat.+ Huhukum ma nasida hombar tu pangalaho dohot pambahenan ni nasida. 20 Tikki lao nasida tu luat ni akka bangso i, dibahen nasida do marlea goarhu na badia i.+ Didok nasida do, ‘Bangso ni Jahowa do i, alai dipaksa do nasida kaluar sian luat naung dilehon tu nasida hian.’ 21 Alani i, dang pasombuonku be gabe marlea goarhu na badia i, i ma goar naung marlea dibahen halak Israel di tonga-tonga ni bangso inganan ni nasida marserak.”+

22 “Alani i, dokkon ma songon on tu halak Israel, ‘Songon on ma hata ni Jahowa Tuan Natumimbul i, “Ale halak Israel, dang alani hamu umbahen na huulahon i. Alai alani goarhu na badia i do, i ma goarhu naung dibahen hamu marlea di tonga-tonga ni bangso ingananmuna marserak i.”’+ 23 ‘Pasti pabadiaokku do goarhu na sangap i,+ i ma goarhu naung dibahen marlea di tonga-tonga ni bangso, i ma goarhu naung dibahen hamu marlea di tonga-tonga ni nasida. Sian i botoon ni akka bangso ma na Au do Jahowa,’+ ninna Jahowa Tuan Natumimbul i, ‘sian pambahenakku tu hamu botoon ni nasida ma Debata na badia do Au. 24 Boanokku ma hamu sian luat ni akka bangso, jala papunguokku ma hamu sian sude luat.+ Boanokku ma hamu mulak tu luatmuna. 25 Pispisokku ma aek tu hamu, dung i gabe ias ma hamu.+ Paiasokku ma hamu sian sude na mambahen hamu gabe ramun.+ Jala paiasokku ma hamu sian sude debatamuna na huhagigihon i.+ 26 Lehonokku ma tu hamu roha na imbaru+ dohot pikkiran na imbaru.+ Bolokkonokku ma sian rohamuna i roha na karas na songon batu,+ jala lehonokku ma tu hamu roha na lambok.* 27 Pakkeonku ma gogokku lao paubahon pikkiranmuna jala bahenokku ma hamu mandalatton aturanki.+ Oloanmuna ma patik naung hutottuhon jala diulahon hamu ma i. 28 Dung i tinggal ma hamu di luat naung hulehon tu akka ompumuna i. Gabe bangsokku ma hamu jala Au ma na gabe Debatamuna.’+

29 “‘Paluaokku ma hamu sian sude na mambahen hamu gabe ramun. Jala suruokku ma gandum* asa godang parbuena. Dang parookku be haraparon tu hamu.+ 30 Bahenokku ma godang situtu parbue ni akka hau dohot hasil ni ladangmuna. Marhite songon i, dang marlea be hamu di tonga-tonga ni akka bangso alani haraparon na masa tu hamu.+ 31 Dung i ingotonmuna ma akka ulaonmuna na jahat i dohot akka pambahenanmuna na so denggan i. Gabe magigi ma hamu tu dirimuna sandiri alani hasalaanmuna dohot alani akka ulaonmuna na huhagigihon i.+ 32 Alai boto hamu ma on: Dang alani hamu umbahen na huulahon on,’+ ninna Jahowa Tuan Natumimbul i. ‘Ai ikkon marlea do nian hamu jala dipaila alani sude pambahenanmuna i, ale hamu halak Israel.’

33 “Songon on ma hata ni Jahowa Tuan Natumimbul i, ‘Di ari tikki na hupaias i hamu sian sude hasalaanmuna, bahenokku ma gabe diingani akka kota+ jala dibangun muse akka naung maruppak.+ 34 Diula ma muse luat naung tarulang i. Idaon ni akka halak na lewat ma naung diula muse luat naung tarulang i. 35 Dohonon ni akka halak ma, “Nungnga gabe songon Taman Eden+ be luat na tarulang i. Ai akka kota naung hancur, naung tarulang, jala naung maruppak i nungnga dibahen be bentengna jala nungnga diingani be.”+ 36 Jala botoon ni akka bangso na adong di sakalilingmuna i ma na Au do Jahowa. Botoon ni nasida ma na Au sandiri do manuan akka hau di luat na tarulang i. Jala Au sandiri do na mambangun akka naung ruppak. Au do Jahowa, Au sandiri do na mandok i jala na mangulahon i.’+

37 “Songon on ma hata ni Jahowa Tuan Natumimbul i, ‘Paloasokku ma halak Israel mangido tu Au, asa mambahen nasida lam godang dos songon godang ni biru-biru. Jala lehonokku do pangidoan ni nasida i. 38 Songon punguan ni halak na badia, songon biru-biru na di Jerusalem* di tikki perayaan,+ songon i ma godang ni akka halak di kota naung maruppak i.+ Sian i botoon ni nasida ma na Au do Jahowa.’”