Josua
1 Dung mate si Musa naposo ni Jahowa i, didok Jahowa ma tu si Josua*+ anak ni si Nun na mangurupi+ si Musa, 2 “Nungnga mate si Musa naposokki.+ Saonari lao ma ho dohot sude bangso Israel menyeberang sian Sunge Jordan. Jala masuk ma hamu tu tano na hulehon tu bangso Israel.+ 3 Tudia pe hamu lao, lehonokku do inganan i tu hamu songon na hujanjihon tu si Musa.+ 4 Lehonokku do tu hamu mulai sian gurun on sahat tu Libanon, sahat tu Sunge Euprat, sunge na balga i, i ma sude tano ni halak Het+ jala sahat tu Laut na Balga* di sabola barat.+ 5 Dang adong na boi manaluhon ho saleleng mangolu ho.+ Donganakku do ho songon tikki Au mandongani si Musa.+ Dang tadikkonokku manang pasombuonku ho.+ 6 Ikkon barani do ho jala togu.+ Ai ho do na hupillit lao mamboan bangso on tu luat naung hujanjihon* tu ompu ni nasida.+
7 “Ikkon barani do ho jala togu. Ulahon ma sude Patik na pinaboa ni si Musa naposokki tu ho. Unang ma manimbil ho tu kanan manang tu kiri,+ asa marbisuk ho manang tudia pe ho lao.+ 8 Toktong ma hatahon taringot tu bukku na marisi Patik i.+ Jaha jala rimangi ma* i arian nang borngin, asa boi denggan ulahononmu sude na tarsurat disi.+ Dung i boi ma ho marhasil jala marbisuk.+ 9 Hudok ma muse tu ho, ikkon barani do ho jala togu. Unang ma ho mabiar, ai didongani Jahowa Debatam do ho manang tudia pe ho lao.”+
10 Dung i, didok si Josua ma tu akka pamimpin ni bangso i, 11 “Lao ma hamu tu perkemahan ni bangso i jala dokkon ma tu nasida, ‘Parade ma sipanganonmuna. Ai naeng menyeberang nama hita sian Sunge Jordan tolu ari nai. Jala buatotta ma tano naung dilehon Jahowa Debatanta tu hita.’”+
12 Dung i didok si Josua ma muse tu halak na sian marga Ruben, marga Gad, dohot tu satonga sian marga Manasse, 13 “Ingot hamu ma paretta ni si Musa, naposo ni Jahowa i,+ ‘Nungnga dilehon Jahowa Debatamuna tano on tu hamu asa dame ngolumuna.* 14 Alani i, dison ma tinggal istrimuna, anakkonmuna, dohot pinahanmuna, di sabola timur ni Sunge Jordan on.+ Ai nungnga dilehon si Musa tano on tu hamu. Alai ikkon dohot do menyeberang akka bawa naung boi marporang.+ Nasida ma na parjolo menyeberang sian marga na asing, jala ikkon rade do nasida lao marporang.+ Ikkon urupanmuna do akka marga na asing i 15 sahat tu na dilehon Jahowa hadameon tu nasida, songon na nilehonna tu hamu. Ikkon jolo buaton ni nasida do tano naung dilehon Jahowa Debatamuna tu nasida. Dung i, mulak ma hamu tuson, tu sabola timur ni Sunge Jordan on.+ Jala maringanan ma hamu dison, di tano naung nilehon ni si Musa, naposo ni Jahowa i tu hamu.’”
16 Dung i dialusi nasida ma si Josua, “Huulahon hami pe sude parettami. Jala tudia pe hami disuru ho, huoloi hami pe.+ 17 Huoloi hami pe ho, songon hami mangoloi si Musa. Sai didongani Jahowa Debatam ma ho songon Ibana mandongani si Musa.+ 18 Ikkon dipamate+ do halak na mangalo parettam dohot na so mangoloi hatam. Alai ikkon barani do ho jala togu.”+