Ulaon ni Apostel

24 Dung lima ari, ro ma Sintua ni Malim Ananias+ tu Kaesarea. Diboan ibana do piga-piga pangituai* dohot sahalak pengacara na margoar si Tertullus. Dung i dipaboa nasida ma tu gubernur i+ boasa dialuhon nasida si Paulus. 2 Dijou ma si Tertullus, dung i mulai ma ibana makkatai lao manudu si Paulus, ninna ma,

“Gubernur Feliks na huparsangapi hami, dihilala hami do hadameon na dibahen ho. Godang do akka na muba tu bangso on ala marbisuk do ho tikki mambahen akka rencana. 3 Alani sudena i, mandok mauliate ma hami manang sadihari pe jala manang didia pe. 4 Alai asa unang pagodangku habis tikki ni damang, hupangido ma jo asa tangihon hami satokkin. 5 Takkas do huida hami sibahen hagutturon+ do bawa on.+ Gaor do dibahen ibana sude halak Jahudi di saluhut portibi on. Jala ibana do pamimpin ni sekte ni halak Nasaret.+ 6 Dohot do muse bagas joro naeng dibahen ibana ramun,* gabe hutakkup hami ma ibana.+ 7* —— 8 Molo disukkun damang ibana, botoonmu ma na sittong do sude hatanami on taringot tu ibana.”

9 Dung dibege hatana i, dohot ma akka halak Jahudi mandok songon i. Jala didok nasida ma na tutu do sude na dipatorang si Tertullus i. 10 Dibahen gubernur i ma tanda asa makkatai si Paulus, dung i ninna ma,

“Huboto do, nungnga martaon-taon damang gabe hakim ni bangso on. Alani i las do rohakku paboahon alussu tu damang.+ 11 Boi do patakkasonmu, dang salpu dope 12 ari dung lao au tu Jerusalem manomba Debata.+ 12 Jala dang hea diida nasida au marsoal dohot manang ise pe di bagas joro, manang mambahen hagutturon di akka sinagoga* dohot di inganan na asing di kota i. 13 Jala dang boi dipatudu nasida tu damang na sittong tuduhan ni nasida taringot tu au. 14 Alai huakkui ma tu damang, taringot tu sekte na didok nasida i, huihutton do i lao marhobas tu Debata ni akka ompukku.+ Ai porsea do au tu sude Patik i dohot tu sude na Sinurat ni Akka Panurirang.*+ 15 Dos songon nasida, porsea do au, na lao dipahehe Debata+ do halak na burju dohot halak na jahat.+ 16 Alani i, huulahon do sian nasa gogokku asa toktong ias panggora ni rohakku di jolo ni Debata dohot di jolo ni jolma.+ 17 Alai dung salpu piga-piga taon, ro do au tu Jerusalem mamboan hepeng lao mangurupi+ bangsokku dohot pasahatton pelean tu Debata. 18 Tikki huulahon i, diida nasida do au mambahen ulaon paiasson diri di bagas joro.+ Tikki i, dang godang huboan donganku jala dang adong hubahen hagutturon. Alai adong do disi piga-piga halak Jahudi na sian Provinsi Asia. 19 Alani i, molo adong parsoalan ni nasida tu au, ikkon nasida do nian na ro tu jolom lao mangaluhon au.+ 20 Manang suru ma akka halak na adong dison paboahon hasalaan na dapot ni nasida tikki diadili au di jolo ni Sanhedrin.* 21 Molo tung pe dialuhon nasida au holan alani hata on do, i ma tikki hudok di jolo ni nasida, ‘Alai diadili do au saonari, ala porsea au na boi mulak mangolu halak naung mate!’”+

22 Godang do diboto si Feliks taringot tu Dalan ni Tuan i.+ Dipaso ibana ma pengadilan i, ninna ma, “Jolo ro ma si Lisias komandan ni tentara i asa hubahen keputusan ni parsoalanmuna on.” 23 Dung i disuru ibana ma perwira na manjaga i asa toktong ditahan si Paulus, alai dang songon na parjolo i be dibahen tu ibana. Diloas do akka donganna mangalehon akka na porlu di ibana.

24 Dung salpu piga-piga ari, ro ma si Feliks dohot istrina si Drusila halak Jahudi i. Disuru ibana ma asa dijou si Paulus. Dung i ditangihon ibana ma si Paulus paboahon haporseaonna taringot tu Kristus Jesus.+ 25 Alai tikki dipatorang si Paulus taringot tu marpangalaho na denggan, mangarajai diri, dohot ari panguhuman di ari na naeng ro,+ gabe mabiar ma si Feliks, jala didok ma, “Attong, songon i ma jolo! Molo adong tikki na denggan, husuru pe dijou ho muse.” 26 Laos di tikki i, sai dipaima-ima ibana do asa dilehon si Paulus hepeng tu ibana. Alani i, lam jotjot ma dijou ibana si Paulus lao makkata-hatai dohot ibana. 27 Alai dung salpu dua taon, si Perkius Festus ma na manggattihon si Feliks. Ala naeng mambuat roha ni halak Jahudi,+ dipasombu si Feliks do si Paulus toktong di penjara.