Na disurat si Mateus

27 Dung torang ari, marrapot ma sude malim kepala* dohot akka pangituai* ni bangso i asa dibahen hukuman lao pamatehon Jesus.+ 2 Dung ditali, diboan ma Jesus jala dipasahat tu si Latus, gubernur i.+

3 Nungnga diboto si Judas penghianat i be naung ditottuhon hukuman lao pamatehon Jesus. Gabe manolsoli ma ibana jala dipaulak ma 30 logam perak i tu akka malim kepala dohot tu akka pangituai.+ 4 Ninna ibana ma, “Nungnga mardosa au, ai hupasahat do halak na so marsala* tu hamu.” Ninna nasida ma, “Dang urusannami i. Urusanmu ma i!” 5 Disappatton si Judas ma hepeng logam perak i tu bagas joro. Dung i lao ma ibana, digattukkon ma dirina.+ 6 Dibuat akka malim kepala ma hepeng logam perak i jala didok, “Mangihutton patik, dang boi bahenon i tu panimpanan ni arta na di bagas joro. Ai manggattihon hosa* ni sahalak bawa do hepeng on.” 7 Dung sahata nasida, dipakke nasida ma hepeng i manuhor tano ni sitopa hudon gabe kuburan ni akka halak na so tinanda. 8 Alani i ma, sahat tu saonari digoari do i Tano Mudar.+ 9 Dung i saut ma hata ni Panurirang* Jeremia na mandok, “Dibuat nasida do na 30 logam perak i, i ma arga naung ditottuhon piga-piga halak Israel lao gabe tuhor ni bawa i. 10 Dipakke nasida ma i lao manuhor tano ni sitopa hudon, songon na diparettahon Jahowa* tu au.”+

11 Dung i, jongjong ma Jesus di jolo ni gubernur, disukkun gubernur i ma ibana. Ninna ma, “Tutu do ho raja ni halak Jahudi?” Dialusi Jesus ma, “Tutu, songon na nidokmi ma.”+ 12 Alai, tikki dipandok akka malim kepala dohot akka pangituai hatorangan na so tutu taringot tu Jesus, dang olo ibana mangalusi.+ 13 Disukkun si Latus ma tu ibana, “Nungnga godang hata dipandok nasida lao manudu ho, na so dibege ho do i?” 14 Alai nanggo sakkababa pe dang adong dialusi Jesus hatana i. Gabe longang ma gubernur i.

15 Di ganup perayaan Paska, somal do dipalua gubernur sahalak tahanan sian penjara. Dipalua ibana do manang ise na dihalomohon godang halak.+ 16 Di tikki i, dipenjarahon do si Barabas. Tarbarita do ibana di sude luat alani hajahatonna. 17 Alani i, tikki marpungu godang halak disi, disukkun si Latus ma tu nasida, “Ise ma dipangido rohamuna paluaokku, si Barabas do manang Jesus na digoari Kristus?” 18 Ai diboto si Latus do, dipasahat nasida pe Jesus tu ibana, ala na late do roha ni nasida mangida Jesus. 19 Alai, tikki hundul si Latus di kursi pengadilan,* disuru istrina ma sasahalak mandapotton ibana lao mandok, “So tung dibahen ho manang aha tu halak na mangulahon na sittong i. Ai marsak situtu do au sadari on alani nipikku na bodari taringot ibana.” 20 Alai sai dijujui akka malim kepala dohot akka pangituai ma akka na pungu i asa mandok, “Palua ma si Barabas,+ jala pamate ma Jesus.”+ 21 Dung i, didok gubernur i ma muse tu nasida, “Ise ma sian na dua on dipangido rohamuna lao paluaokku di hamu?” Dialusi nasida ma, “Si Barabas.” 22 Didok si Latus ma muse tu nasida, “Attong aha ma bahenokku tu Jesus na digoari Kristus on?” Dialusi nasida ma, “Gattung ma ibana tu hau!”+ 23 Didok si Latus ma, “Boasa? Ai aha huroa na jahat diulahon ibana?” Alai lam gogo do didok nasida, “Gattung ma ibana tu hau!”+

24 Diida si Latus ma dang marlapatan hatana i, gariada lam gaor do akka jolma i. Gabe dibuat ibana ma aek jala disussi ma tanganna di jolo ni akka jolma i. Didok ibana ma, “Dang dohot au martanggung jawab tu parmate ni bawa on.* Marsapata tu hamu ma i.” 25 Sude ma jolma i mandok, “Lok ma marsapata tu hami dohot tu pinopparnami mudarna i.”+ 26 Dipalua ibana ma si Barabas, alai disuru ibana ma asa dilissingi Jesus.+ Dung i dipasahat ibana ma Jesus tu nasida asa digattung tu hau.+

27 Diboan akka tentara ni gubernur ma Jesus tu jabu ni gubernur i jala marpungu ma sude tentara i makkaliangi ibana.+ 28 Dibukka nasida ma pakkean ni Jesus, dung i dipakkehon ma tu ibana jubah na merah.+ 29 Didandan nasida ma suga-suga gabe songon mahkota. Dibahen ma i tu uluna jala dilehon ma hau-hau tu tangan kananna. Marsinggang ma nasida tu jolona, direhei ma ibana, ninna ma, “Horas ma di raja ni halak Jahudi i!”* 30 Ditijuri nasida ma ibana,+ dibuat ma hau-hau i lao mangattuk uluna. 31 Ujungna dung direhei ibana, dibukka ma jubahna i jala dipakkehon ma abit luarna tu ibana. Dung i, diboan ma ibana asa dipakkuhon tu hau.+

32 Tikki na mardalan i, pajuppang ma nasida dohot si Simon sahalak bawa sian huta Kirene. Dipaksa ma ibana mamboan hau partinaonan* i.+ 33 Sahat ma nasida tu inganan na digoari Golgata, lapatanna Inganan ni Tengkorak.+ 34 Dilehon nasida ma inumonna anggur na dicampur tu empedu.*+ Alai dung didai, dang olo ibana manginum. 35 Dung dipakkuhon nasida ibana tu hau, dibahen nasida ma undi lao mambagi-bagi pakkean luarna.+ 36 Jala hundul ma nasida disi manjaga ibana. 37 Dibahen do papan di atas ni uluna, jala tarsurat do di papan i hajahaton na dituduh diulahon ibana. Songon on ma isina, “On ma Jesus, raja ni halak Jahudi.”+

38 Dipakkuhon do muse dua pangarampok rap dohot ibana. Sada di sabola kananna jala sada nai di sabola kirina.+ 39 Mangupir do akka halak na lewat sian i mangida ibana,+ jala dileai nasida do ibana.+ 40 Ninna nasida ma, “Anggo didok ho, naeng ruppakkononmu do bagas joro jala pajongjongonmu i muse di bagasan tolu ari.+ Palua ma jo dirim! Molo tutu do ho anak ni Debata, turun ma ho sian hau partinaonan*+ i!” 41 Dohot do muse akka malim kepala, siboto surat,* dohot akka pangituai mangarehei Jesus. Didok nasida do,+ 42 “Anggo halak na asing dipalua do, hape dirina dang boi dipalua! Ai dang raja ni Israel+ ibana tahe? Molo boi ibana turun sian hau partinaonan* i, porsea ma hita tu ibana. 43 Porsea do ibana tu Debata. Attong, molo tutu do lomo roha ni Debata tu ibana, pasti paluaon ni Debata do ibana saonari.+ Ai didok ibana do, ‘Anak ni Debata do au.’”+ 44 Laos dohot do muse akka pangarampok na dipakkuhon di labbungna i mangarehei ibana.+

45 Mulai sian jam 12 arian* sahat tu jam tolu botari,*+ makkolom ma saluhut luat i. 46 Hira-hira jam tolu botari, gogo ma didok Jesus, “Eli, Eli, lama sabakhtani?” lapatanna, “Debatakku, Debatakku, boasa tadikkononmu au?”+ 47 Tikki dibege halak na jongjong disi hatana i, didok nasida ma, “Dijou ibana do si Elia.”+ 48 Pittor marlojong ma sahalak sian nasida mambuat bunga karang. Disornoppon ma i tu anggur na asom. Dung i dibahen ma i tu hau-hau jala dilehon ma i lao inumonna.+ 49 Alai ro ma deba sian nasida mandok, “Pasombu ma disi! Taida ma jolo manang na ro do si Elia paluahon ibana.” 50 Dung i, gogo ma soara ni Jesus laos tos ma hosana.*+

51 Laos di tikki i, ribak dua+ ma tire ni bagas joro+ sian ginjang sahat tu toru,+ humutur ma tano jala marbolaan ma akka dolok batu. 52 Marbukkaan ma akka kuburan, godang ma bakke ni halak na badia na markaluaran 53 jala godang do halak na mangida i. (Dung dipahehe Jesus, lao ma akka halak na ro tu kuburan i tu kota na badia.*) 54 Diida komandan ni tentara dohot akka na manjaga Jesus i do humutur tano i. Diida nasida do muse masa akka tanda na asing, gabe mabiar ma nasida. Ninna ma, “Tutu do ibana Anak ni Debata.”+

55 Godang do disi akka borua na manatap-natap sian na dao. Nasida do akka borua na mangihutton Jesus sian Galilea jala na mangalehon na porlu di ibana.+ 56 Disi do si Maria Magdalena, si Maria omak ni si Jakobus dohot si Joses, dohot istri ni si Sebedeus+ omak ni si Jakkobus dohot si Johannes.*

57 Dung botari, ro ma sahalak bawa na mora sian Arimatea. Goarna i ma si Josep, jala nungnga gabe sisean ni Jesus+ ibana. 58 Lao ma si Josep manjuppangi si Latus jala dipangido ma bakke ni Jesus.+ Dung i, diparettahon si Latus ma asa dilehon bakke ni Jesus i tu si Josep.+ 59 Diboan si Josep ma bakkena i. Dibukkus ma i dohot abit linen na halus jala na ias.+ 60 Dipeakkon ma bakke i tu bagasan kuburan na baru,+ i ma sada liang na digali ibana di dolok batu. Digulikkon ma batu na balga manutup kuburan i, dung i lao ma ibana. 61 Alai, sai hundul do di jolo ni kuburan i+ si Maria Magdalena dohot si Maria na sada nai.

62 Marsogotna i, i ma di ari Sabat,*+ marpungu ma akka malim kepala dohot halak Parise di jolo ni si Latus. 63 Didok nasida ma, “Tuan, tikki mangolu dope panipu i hea do didok ibana, ‘Hehe do au di ari patoluhon.’+ 64 Alani i, parettahon ma asa dijaga kuburan i sahat tu ari patoluhon, asa unang ro akka siseanna manakko bakkena+ jala dohononna ma tu akka halak, ‘Nungnga hehe ibana sian na mate!’ Dung i, gabe umbalga ma gabus na parpudi on sian na parjolo i.” 65 Didok si Latus ma tu nasida, “Boan hamu ma panjaga tusi. Manat ma jaga hamu kuburan i.” 66 Borhat ma nasida jala rapat ma ditutup kuburan i mamakke batu. Dung i dibahen ma panjaga disi.