Surat ni si Judas
1 Au si Judas naposo ni Jesus Kristus anggi ni si Jakobus.+ Husuratton do on tu akka halak na tarpillit+ na dihaholongi Debata, Ama i, jala na diramoti ala marsada dohot Jesus Kristus.+
2 Anggiat ma ditambai Debata asi ni roha, dame, dohot holong di hamu.
3 Hamu akka dongan na huhaholongi, nungnga marsitutu au manurat taringot tu haluaon naung tadapot i.+ Alai rikkot do huhilala manuratton on, lao manjujui hamu mampartahatton haporseaon+ sian nasa gogomuna, i ma haporseaon na dilehon sahali ro di saleleng ni lelengna tu akka halak na badia. 4 Ai adong do akka halak na sipsip masuk tu tonga-tongamuna. Nasida ma naung leleng ditottuhon di Surat na Badia lao diuhumi. Dang dipasangap nasida Debata, ai dipakke nasida do asi ni roha ni Debata na massai balga i lao mangulahon ulaon ni halak na so umboto ila.*+ Jala dang setia nasida tu Jesus Kristus,+ Tuan dohot nappunasa hita.
5 Takkas do nian diboto hamu sudena on, alai hupaingot ma hamu muse. Nang pe naung dipalua Jahowa* bangsona sian tano Mesir,+ alai diripasson do na so marhaporseaon.+ 6 Nang akka suru-suruan na so hot di surgo na manadikkon inganan ni nasida hian,+ diratte do nasida di haholomon situtu saleleng ni lelengna paima ro ari panguhuman na balga i.+ 7 Songon i do nang Sodom dohot Gumora ro di akka kota di sakalilingna, sai diulahon nasida do seks na so patut* jala sai diadu nasida do hisap-hisap ni daging na so somal.+ Dihukum do nasida di api saleleng ni lelengna asa gabe sipasingot i tu hita.+
8 Suang songon i ma, diihutton nasida do angan-angan ni nasida, dibahen nasida do ramun* dagingna, leas do roha ni nasida tu na marhuaso, jala dileai nasida do akka na mandapot hasangapon sian Debata.+ 9 Alai tikki marsalisi si Mikhael+ pamimpin+ ni suru-suruan i tu Sibolis taringot tu bakke ni si Musa,+ didok rohana dang patut ibana manguhumi Sibolis i marhite hata na mangaleai.+ Ai ninna do, “Jahowa* ma na mamissang ho.”+ 10 Alai dileai nasida do sude na so diattusi nasida.+ Dos songon binatang na so marroha na holan mangihutton naluri+ do nasida tikki mangulahon ulaonna. Alani i gabe sega ma nasida.
11 Marjea ma nasida, ala diihutton nasida do dalan ni si Kain,+ jala alani upa marlojong do nasida mangihutton ulaon ni si Bileam+ na sala. Gabe diripasson do nasida ala dialo nasida do na marhuaso songon na binahen+ ni si Kora!*+ 12 Songon batu karang na buni di toru ni aek do nasida tikki rap marpesta* hamu dohot nasida.+ Ai songon parmahan na so maila do nasida na holan manarihon butuhana sandiri.+ Songon ombun na so parohon udan do nasida na niullus ni alogo+ tusan tuson. Songon hau do nasida na so marparbue di tikkina, naung mate* jala naung diuppat. 13 Ai songon galumbang ni laut do nasida na margumo-gumo mamboan kotoran.+ Songon bintang na so hot di dalanna naung ditottuhon tu haholomon saleleng ni lelengna.+
14 Si Henok,+ i ma sundut* papituhon sian si Adam. Dohot do ibana paboahon hata ni Debata* taringot tu nasida, tikki didok, “Ida ma! Nungnga ro Jahowa* rap dohot marpulu ribu* suru-suruanna na badia+ 15 lao manguhumi sude jolma.+ Hukumonna ma akka jolma na so pasangappon Debata alani pambahenan ni nasida na jahat dohot hata ni nasida na mangaleai Debata.”+
16 Holan na marungut-ungut+ do nasida taringot tu parngoluon ni nasida, diihutton nasida do hisap-hisap ni nasida,+ marhata manggang, jala mamuji-muji halak lao mandapot uttung.+
17 Alai hamu akka dongan na hinaholongan, ingot ma hata ni akka apostel ni Tuan Jesus Kristus. 18 Didok nasida do tu hamu, “Di tikki parpudi, ro ma akka pangarehei na mangihutton hisap-hisap ni nasida na jahat.”+ 19 Pamola-mola do nasida, jala mangihutton+ hisap-hisap ni daging* ala dang adong tondi parbadia di nasida. 20 Alai hamu akka dongan na hinaholongan, patogu hamu ma haporseaonmuna na badia i jala martangiang ma di bagasan panogu-noguon ni tondi parbadia,+ 21 asa toktong hamu di bagasan holong ni roha ni Debata,+ huhut paimahon asi ni roha ni Tuanta Jesus Kristus na parohon hangoluan saleleng ni lelengna.+ 22 Toktong ma patudu asi ni roha+ tu akka halak na ganggu rohana.+ 23 Tarik hamu ma nasida+ sian api asa malua nasida. Toktong ma patuduhon asi ni roha tu na asing, alai jaga ma hamu, jala hasogohon hamu ma dosa na niulahon ni nasida.*+
24 Debata do na manjaga hamu asa unang tartuktuk jala toktong dang marsala,+ asa marlas ni roha hita di adopan ni hamuliaonna. 25 Sasada Ibana do Debata Sipalua hita marhite Jesus Kristus Tuanta i. Di Ibana ma hamuliaon, hasangapon, hagogoon, dohot huaso sian najolo, saonari sahat ro di saleleng ni lelengna. Amen.