Habakuk
Sai marjaga ma au asa huboto aha na lao dohonon ni Ibana* marhite au,
Jala asa huboto songon dia alussu tikki dipasingot Ibana au.
2 Dung i didok Jahowa ma tu au,
“Suratton ma parnidaan on jala surat ma i takkas di batu panuratan* i,+
Asa mura dijaha di jolo ni godang halak.+
3 Ai na lao saut do parnidaan i di tikki naung ditottuhon,
Na lao tibu nama i masa, jala sittong do parnidaan i.
Ai molo pe tarlambat i masa,* toktong ma pos roham* paimahon i!+
Ai pasti do saut i.
Jala dang na lao tarlambat.
4 Ida ma halak na ginjang rohana,
Dang halak na tigor marroha ibana.
Alai toktong do mangolu halak na mangulahon na sittong, ala setia do ibana.*+
5 Sasittongna boi do anggur i mambahen halak gabe mangulahon ulaon ni halak na oto,
Alani i do, dang na lao marhasil halak na ginjang rohana.
Nang pe massai male ibana dos songon Kuburan,*
Jala dos do ibana songon hamatean, dang na lao puas ibana.
Torus do papunguonna sude bangso
Jala torus do papunguonna sude jolma lao gabe appunana.+
6 Pasti do dihatai sude halak ibana, direhei, jala diburai.+
Dohonon ni nasida ma,
‘Sadia leleng nai ma torus papungu-punguonna arta na so appunana?
Marjea ma ibana,
Ai nungnga lam godang utangna!
7 Ai na lao toppu ma ro sitagih utangmu,
Didungoi nasida ma ho jala dihutur-hutur ma ho,
Jala buaton ni nasida ma artam.+
8 Nungnga dipamate ho godang halak,
Nungnga diulahon ho na jahat di tano on.
Diulahon ho do i di akka kota dohot tu akka pendudukna,+
Dibuat ho do sude arta ni akka bangso.
Alani i, ro nama bangso na asing mambuat sude artam.+
9 Marjea ma halak na mangulahon na so sittong lao mangalului uttung di keluargana,
Dibahen ibana do asarna di inganan na timbo,
Asa malua ibana sian parmaraan.
10 Rencana na binahenmu mambahen keluargam maila.
Nungnga diulahon ho dosa, ai nungnga godang dipamate ho bangso.+
11 Ai dohot do batu na di tembok marsurak,
Jala hau na di atap mangalusi ibana.
12 Marjea ma na mambunu halak lao mambangun sada kota,
Jala na pajongjokkon sada huta marhite mangulahon na jahat!
13 Ida ma! Loja do akka jolma karejo, alai na lao ditutung api do sudena i.+
Jala sian nasa gogona do akka bangso mangulahon ulaonna, alai marisuang do i sude.
Jahowa Pamimpin ni Akka Tentara* i do na mambahen i masa.
14 Songon aek na manggohi laut,+
Songon i ma tano on digohi parbinotoan taringot tu hamuliaon ni Jahowa.
15 Marjea ma halak na muruk jala na tarrimas,
Jala na mangalehon tu donganna siinumon na mambahen nasida mabuk,
Ala lomo rohana naeng mangida nasida salang-salang!
16 Na lao dibahen nama ho marlea,* asa unang dipasangap be ho.
Na lao minum ma ho, na lao diida halak ma ho salang-salang jala dang marsunat.*
Na lao juppang ma tikkim minum sian cawan na di tangan kanan ni Jahowa.+
Muba ma hasangaponmi gabe mambahen ho marlea.
17 Na lao masa ma tu hamu hajahaton na binahenmuna tu Libanon.
Dihancurhon hamu do sude, jala mabiar do akka binatang,
Alai na lao masa ma songon na binahenmuna i tu hamu.
Ai nungnga godang halak dipamate hamu,
Jala diulahon hamu do na jahat di tano on,
Di akka kota, dohot tu sude pendudukna.+
18 Porsea do jolma tu akka patung
Sude patung i dibahen sian hau, batu, dohot bosi.
Palsu do sude poda na dapot ni nasida sian akka patung* i.
Dang boi makkatai patung i.+
Jadi aha ma guna ni akka patung i tu akka na paturehonsa?
19 Marjea ma halak na mandok tu hau naung diponggol, “Dungo ma ho!”
Manang tu batu na so boi makkatai, “Dungo ma ho! Ajari ma hami!”
20 Alai di bagas jorona na badia i do Jahowa.+
Ikkon hohom do sude na di tano on di jolona!’”+