Rut
4 Lao ma si Boas tu gerbang ni kota.+ Nungnga dipaboa ibana hian tu si Rut, adong do na marhak manobus* ibana.+ Tikki hundul si Boas di gerbang i, lewat ma halak na marhak manobus i. Didok si Boas ma, “Ro ma jo ho dongan,* hundul ma jo ho.” Ro ma ibana jala hundul disi. 2 Dung i, dijou si Boas ma sappulu pangituai* di kota i+ jala didok ma, “Hundul ma jo hamu.” Jadi hundul ma nasida.
3 Didok si Boas ma tu halak na marhak manobus* i,+ “Nungnga mulak si Naomi sian Moab.+ Naeng gadisonna nama tano ni si Elimelek keluargatta i.+ 4 Alani i hudok ma tu ho, ‘Tuhor ma i di jolo ni akka halak dohot di jolo ni akka pangituai.+ Molo olo ho manobus* i, na denggan ma i. Alai molo so olo ho, paboa ma tu au. Alana, ho do na marhak manobus i baru pe asa au.’” Didok ibana ma, “Hutobus pe i.”+ 5 Dung i didok si Boas ma, “Molo dituhor ho tano i sian si Naomi, ikkon tuhoronmu do i muse sian si Rut halak Moab na mabalu i. Asa toktong tano i gabe appuna ni pinoppar ni na mate i.”+ 6 Didok halak na marhak manobus* i ma, “Molo songon i do, dang olo au manobus i. Rugi annon au.* Ho ma na manobus i. Hulehon pe hakku tu ho.* Dang boi tobusokku i.”
7 Songon on ma cara ni halak Israel najolo lao patuduhon naung sah hak ni nasida lao manobus,* jala songon dia cara mangalehon hak milik ni sasahalak tu na asing: Ikkon bukkaon ni bawa i do solopna+ jala lehononna tu halak na manggattihon ibana. Songon on ma cara ni halak Israel mambahen sah sada parjanjian. 8 Tikki didok halak na marhak manobus* i tu si Boas, “Ho ma na manobus i,” dilehon ma solopna tu si Boas. 9 Dung i didok si Boas ma tu pangituai kota i dohot tu sude na disi, “Hamu ma na gabe saksi+ sadari on tanda naung hutuhor sian si Naomi sude appuna ni si Elimelek, si Kilian, dohot si Malon. 10 Asing ni i, bahenokku nama si Rut halak Moab i, i ma istri ni si Malon i gabe istrikku, asa toktong tano ni si Malon i gabe appuna ni pinopparna.+ Alani i toktong ma adong goar ni si Malon di tonga-tonga ni keluargana dohot hutana. Jala hamu ma saksina sadari on.”+
11 Sude ma halak na di gerbang ni kota i dohot akka pangituai ni kota i mandok, “Hami ma saksina! Anggiat ma dipasu-pasu Jahowa na lao gabe istrim songon si Rahel dohot si Lea, ompu ni halak Israel.+ Anggiat ma sonang ngolum di Eprata+ jala tarbarita goarmu di Betlehem.+ 12 Anggiat ma dilehon Jahowa di ho pinoppar sian borua i,+ asa gabe songon pinoppar ni si Peres+ pinopparmu, i ma anak ni si Juda sian si Tamar.”
13 Dung i dibahen si Boas ma si Rut gabe istrina. Mangulahon seks ma ibana dohot si Rut. Dipasu-pasu Jahowa ma si Rut jala ditubuhon ma sada anak. 14 Didok akka borua ma tu si Naomi, “Pinuji ma Jahowa, ala dibahen Ibana do adong na manobus* ho. Anggiat ma tarbarita goar ni poso-poso on di Israel! 15 Gabe tamba do semangatmu dibahen ibana. Jala ibana do na lao mangurus ho molo dung matua. Parumaenmi do na manubuhon ibana di ho. Holong do roha ni parumaenmi tu ho+ jala dumenggan do i di ho sian pitu anak.” 16 Dibuat si Naomi ma poso-poso i jala diabing, jala ibana ma na manjaga* poso-poso i. 17 Dung i dibahen akka borua tetangga ni si Naomi ma goar ni poso-poso i. Didok nasida ma, “Nungnga ditubuhon sada anak di si Naomi.” Dibahen nasida ma goarna si Obed.+ Ibana ma bapak ni si Isai,+ jala si Isai ma bapak ni si Daud.
18 On ma tarombo ni si Daud sian si Peres:*+ Anak ni si Peres, i ma si Hezron.+ 19 Anak ni si Hezron, i ma si Ram. Anak ni si Ram, i ma si Aminadab.+ 20 Anak ni si Aminadab,+ i ma si Nahason. Anak ni si Nahason, i ma si Salmon. 21 Anak ni si Salmon, i ma si Boas. Anak ni si Boas, i ma si Obed. 22 Anak ni si Obed, i ma si Isai.+ Jala anak ni si Isai, i ma si Daud.+