5 Musa

14 “Akka anak ni Jahowa Debatamuna do hamu. Molo adong halak na mate,+ unang seati hamu dagingmuna+ manang dicukkur hamu alismuna sappe habis. 2 Ai bangso na badia do hamu+ di Jahowa Debatamuna. Sian sude bangso na adong di tano on,+ nungnga dipillit Jahowa hamu gabe bangsona dohot appunana na massai arga.*

3 “Unang pangan hamu manang aha pe na dihagigihon Debata.+ 4 On ma akka binatang na boi panganonmuna:+ lombu, biru-biru, hambing, 5 rusa, kijang, rusa roe, hambing liar, dohot kijang gunung. 6 Boi do allangonmuna sude binatang na marngalu* jala na kukuna bola dua. 7 Alai dang boi allangonmuna binatang na holan marngalu manang binatang na holan na bola dua kukuna. Uppamana unta, kelinci,* dohot marmut.* Marngalu do akka binatang i alai dang bola dua kukuna. Jadi binatang na ramun* do sudena i.+ 8 Dung i babi, nang pe bola dua kukuna alai dang marngalu. Jadi binatang na ramun do babi. Akka i ma binatang na so boi allangonmuna manang na so boi jamaonmuna bakkena.

9 “Sian sude binatang na mangolu di aek na boi allangonmuna, i ma binatang na adong sisikna dohot siripna.+ 10 Alai dang boi allangonmuna sude binatang na so adong sisikna dohot na so adong siripna. Ai ramun do i sude.

11 “Boi do allangonmuna sude pidong na so ramun. 12 Alai dang boi allangonmuna akka pidong on: lali, rajawali siallang dekke, lali na birong siallang bakke,+ 13 lali na merah, lali na birong dohot sude ragam ni lali, 14 sude ragam ni burung gagak, 15 burung unta, burung hantu, burung camar, sude ragam ni burung falkon, 16 burung hantu na gelleng, burung hantu na pinggolna ganjang, angsa, 17 pelikan, pidong siallang bakke, burung pecuk padi, 18 burung bangau,* sude ragam ni burung kuntul, burung hupo, dohot kelelawar. 19 Ramun do sude serangga na marhabong. Dang boi allangonmuna i. 20 Alai boi do allangonmuna sude binatang na habang, na so ramun.

21 “Dang boi allangonmuna binatang naung mate tikki didapot.+ Boi do lehononmuna i tu halak na sian bangso na asing na tinggal di kotamuna* jala boi do i allangonna. Manang boi do i jualonmuna tu halak na sian bangso na asing. Ai bangso na badia do hamu di Jahowa Debatamuna.

“Unang robus hamu anak ni hambing rap dohot susu ni indukna.+

22 “Ganup taon, ikkon lehononmuna do saparsappulu sian hasil ni boni na disuan hamu di ladangmuna.+ 23 Ikkon allangonmuna do di jolo ni Jahowa Debatamuna i saparsappulu sian gandummuna,* anggurmuna na baru, dohot miakmuna. Jala ikkon allangonmuna do disi anak ni lombu manang biru-birumuna na parjolo tubu. Allang hamu ma i di inganan na dipillit Ibana lao pasangappon goarna.+ Ulahon hamu ma i, asa marsiajar hamu makkabiari Jahowa Debatamuna saleleng ni ngolumuna.+

24 “Molo dao do sian ingananmuna inganan na dipillit Jahowa Debatamuna lao pasangappon goarna i,+ jala dang boi boanonmuna tusi akka hasil ni ladangmuna i ala padaohu (ai na lao pasu-pasuon ni Jahowa Debatamuna do hamu), 25 hepengkon hamu ma i, jala boan ma hepeng i tu inganan na pinillit ni Jahowa Debatamuna. 26 Pakke ma hepeng i lao manuhor manang aha pe lomo ni rohamuna. Boi do tuhoronmuna lombu, biru-biru, hambing, anggur, siinumon na maralkohol na asing, dohot manang aha pe lomo ni rohamuna. Allang hamu ma disi, di jolo ni Jahowa Debatamuna. Jala marlas ni roha ma hamu rap dohot keluargamuna.+ 27 Alai sotung lupa hamu tu halak Lepi na tinggal di kotamuna.+ Ai dang mandapot parbagianan manang warisan nasida songon hamu.+

28 “Di ujung ni ganup tolu taon, ikkon boanonmuna do saparsappulu sian sude hasil panenmuna di taon i. Ikkon sippanonmuna do i di kotamuna.+ 29 Dung i ro ma halak Lepi na so mandapot parbagianan manang warisan songon hamu, halak panoppang, halak na so marama,* dohot ina na mabalu na di kota i. Ro ma nasida lao mangallang i sappe butong.+ Molo diulahon hamuna i, dipasu-pasu Jahowa Debatamuna i ma sude na diulahon hamu.+