Surat na Parjolo tu Huria na di Tessalonik

3 Ala dang sabar be hami mamboto baritamuna, didok rohanami dumenggan ma hami tinggal di kota Atena.+ 2 Dung i, husuru hami ma si Timoteus+ mandapotton hamu. Donganta do ibana jala naposo* ni Debata na mamaritahon barita na uli taringot tu Kristus. Disuru hami do ibana lao manjujui jala patoguhon haporseaonmuna, 3 asa unang adong sian hamu na gale haporseaonna alani akka hasusaan i. Ai diboto hamu do na ikkon masa do i tu hita.+ 4 Tikki rap dope hami dohot hamu, nungnga dipaboa hami tu hamu na lao masa akka hasusaan tu hita. Jala tutu do i masa songon na diboto hamu.+ 5 Ala dang sabar be au lao mamboto baritamuna, husuru ma si Timoteus mandapotton hamu, asa huboto songon dia togu ni haporseaonmuna.+ Ai mabiar do au, atik boha naung dibahen Sibolis*+ hamu madabu tu dosa, gabe marisuang halojaonnami i.

6 Alai saonari nungnga mulak be si Timoteus tu hami.+ Diboan ibana do barita na denggan taringot tu haporseaonmuna dohot holong ni rohamuna. Dipaboa ibana do tu hami na toktong do diingot hamu hami, jala masihol do hamu naeng pajuppang dohot hami songon sihol ni rohanami naeng pajuppang dohot hamu. 7 Alani i akka dongan, nang pe haccit dihilala* hami jala susa ditaon hami, dipatogu do rohanami ala togu do haporseaonmuna tu Debata.+ 8 Jala lam togu* do muse rohanami molo toktong hamu setia mangihutton Tuan i. 9 Mandok mauliate do hami tu Debata alani hamu. Ai las situtu do rohanami dibahen hamu. 10 Arian nang borngin, sai ditangiakkon hami do asa boi pajuppang dohot hamu, asa boi hulehon hami na porlu tu hamu lao patoguhon haporseaonmuna.+

11 Sai anggiat ma dilehon Debata Ama i dohot Tuanta Jesus dalan di hami lao pajuppang dohot hamu. 12 Sai anggiat ma lam ditambai Tuan i holong ni rohamuna, holongmuna tu akka dongan sahaporseaon,+ dohot tu sude jolma, songon balga ni holong ni rohanami tu hamu. 13 Dung i gabe togu ma rohamuna, gabe sempurna ma hamu, jala badia ma hamu di jolo ni Debata+ di haroro ni Tuan Jesus+ dohot akka na badiana.