5 Musa
31 Dung i, lao ma si Musa paboahon akka hata on tu sude halak Israel. 2 Didok ma, “Nungnga 120 taon be umurhu saonari.+ Dang boi be au mamimpin hamu.* Ai nungnga didok Jahowa tu au, ‘Dang na lao dohot be ho manaripari Sunge Jordan.’+ 3 Jahowa Debatamuna i do di jolomuna tikki manaripar hamu. Ibana sandiri do na lao pamatehon akka bangso di jolomuna. Usironmuna ma nasida,+ jala si Josua ma na mamimpin hamu manaripar sunge i,+ songon hata ni Jahowa. 4 Bahenon ni Jahowa ma tu akka bangso i dos songon na binahenna tu si Sihon+ dohot tu si Og+ akka raja ni halak Amori i. Jala bahenonna ma tu bangso i dos songon na binahenna tu luat ni nasida tikki dipamate Ibana nasida sude.+ 5 Bahenon ni Jahowa do hamu monang mangalo nasida. Jala ikkon bahenonmuna ma tu bangso i dos songon akka paretta na hupaboa tu hamu.+ 6 Ikkon barani do hamu jala togu.+ Unang mabiar hamu tu nasida jala unang pola ganggu rohamuna alani nasida.+ Ai Jahowa Debatamuna i do na mardalan rap dohot hamu. Dang tadikkononna hamu manang pasombuonna hamu.”+
7 Dijou si Musa ma si Josua tu jolo ni sude halak Israel. Didok ma tu ibana, “Ikkon barani do ho jala togu.+ Ai ho do na lao mamboan bangso on masuk tu luat na dijanjihon Jahowa mardongan sumpa tu akka ompu ni nasida, jala ho do na lao mangalehon luat i tu nasida gabe appuna ni nasida.+ 8 Jahowa do na mardalan di jolom. Toktong do didongani Ibana ho.+ Dang tadikkononna ho manang pasombuonna. Unang ma mabiar ho.”+
9 Disurat si Musa ma patik ni Debata i.+ Jala dilehon ma i tu akka malim, i ma halak Lepi na mangangkat poti parpadanan ni Jahowa, dohot tu sude pangituai* ni halak Israel. 10 Didok si Musa ma tu nasida, “Di ganup ujung ni taon na papituhon, di tikki naung ditottuhon di taon haluaon i,+ tikki Perayaan Pondok Daun,*+ 11 i ma tikki ro sude halak Israel tu jolo ni Jahowa+ Debatamuna di inganan na pinillitna i, ikkon dijahahon hamu do sude Patik on asa sude halak Israel mambege.+ 12 Papungu ma sude bangso on,+ bawa, borua, dakdanak, dohot sude halak na sian bangso na asing na adong di akka kotamuna.* Papungu ma nasida, asa ditangihon jala diparsiajari nasida taringot tu Jahowa Debatamuna, asa dihabiari nasida Ibana, jala asa diulahon nasida sude hata na di Patik i. 13 Jala akka anak ni nasida na so mamboto Patik on pe, dohot ma manangihon+ jala marsiajar makkabiari Jahowa Debatamuna, saleleng mangolu hamu di luat na lao buatonmuna i dung manaripar hamu sian Sunge Jordan.”+
14 Didok Jahowa ma tu si Musa, “Satokkin nai, mate nama ho.+ Jou ma si Josua, jala ro ma hamu tu kemah parpunguan* asa hulantik ibana gabe pamimpin.”+ Ro ma si Musa dohot si Josua tu kemah parpunguan. 15 Dung i ro ma Jahowa di bagasan ombun* jala so ma ombun i di pintu ni kemah parpunguan i.+
16 Dung i, didok Jahowa ma tu si Musa, “Satokkin nai mate nama ho.* Dang setia be bangso on tu Au,* sombaon ni nasida nama akka debata na asing di luat na lao didapotton nasida i.+ Tinggalhonon ni nasida nama Au+ jala dang diulahon nasida be parjanjian na hubahen dohot nasida.+ 17 Tikki masa i, muruk situtu ma Au tu nasida.+ Hutadikkon ma nasida,+ jala mandao ma Au sian nasida*+ sahat tu na mate nasida sude. Dung masa hasusaan jala dung ro jea tu nasida,+ dohonon ni nasida ma, ‘Dang didongani Debata be hita umbahen na masa hasusaan on.’+ 18 Alai toktong do Au mandao sian nasida* alani sude hajahaton ni nasida. Ai marbalik do nasida sian Au lao mangihutton akka debata na asing.+
19 “Saonari suratton hamu ma ende on.+ Ajarhon ma i tu halak Israel.+ Suru ma nasida mamparsiajari i,* asa marhite ende i ingoton ni nasida ma aha na masa molo dang dioloi nasida Debata.+ 20 Dung huboan nasida tu luat na hujanjihon tu akka ompu ni nasida,+ i ma luat na godang susu dohot madu i,+ mangan ma nasida sappe butong jala sonang* ma ngolu ni nasida disi.+ Alai marbalik do nasida manomba debata na asing, dang diargai nasida Au. Jala dilanggar nasida do parjanjiakku.+ 21 Molo dung masa godang jea dohot hasusaan tu nasida,+ ende on ma na paingotton nasida taringot tu aha na masa molo so dioloi nasida Debata. (Ai dang boi lupa pinoppar ni nasida tu ende i.) Nungnga huboto aha na di pikkiran ni nasida.+ Nungnga huboto i andorang so huboan dope nasida masuk tu luat na hujanjihon mardongan sumpa i.”
22 Di ari i, disurat si Musa ma ende i jala diajarhon ibana ma i tu halak Israel.
23 Dilantik Ibana ma si Josua+ anak ni si Nun. Didok ma, “Ikkon barani do ho jala togu.+ Ai ho do na lao mamboan bangso Israel masuk tu luat na hujanjihon mardongan sumpa tu nasida.+ Toktong do donganakku ho.”
24 Disi sae disurat si Musa sude akka Patik i tu sada bukku,+ 25 diparettahon si Musa ma songon on tu halak Lepi na mamboan poti parpadanan ni Jahowa, 26 “Buat hamu ma bukku Patik+ on jala peakkon hamu ma i di labbung ni poti+ parpadanan ni Jahowa Debatamuna i. Bukku on ma na gabe saksi lao manguhumi hamu. 27 Ai takkas do hutanda hamu, bangso pangalo+ do hamu jala jogal do rohamuna.*+ Haru tikki mangolu dope au, nungnga mangalo hamu tu Jahowa, lam ma dung mate au! 28 Papungu ma sude akka pamimpin sian sude marga dohot akka komandan, asa ditangihon nasida hata na lao hupaboa on. Langit dohot tano on ma na gabe saksina.+ 29 Ai takkas do huboto molo dung mate au, ulahononmuna do na jahat+ jala manirpang do hamu sian dalan na huparettahon tu hamu. Jala pasti masa do hasusaan tu hamu+ di ari na naeng ro. Ai diulahon hamu do na jahat di jolo ni Jahowa, jala dibahen hamu do haccit rohana marhite pangalahomuna.”
30 Dung i, dijahahon si Musa ma ende on di jolo ni sude halak Israel, sian mulana sahat tu ujungna:+