5 Musa

5 Dijou si Musa ma sude halak Israel jala didok ma, “Hamu sude ale halak Israel, bege hamu ma akka patik dohot aturan naung ditottuhon na lao hupaboa tu hamu sadari on. Ikkon diparsiajari hamu do sudena i, jala ikkon marsitutu do hamu mangulahon i. 2 Dibahen Jahowa Debatanta i do parjanjian dohot hita di Horeb.+ 3 Dang tu akka omputta parjanjian i dibahen Jahowa. Alai tu hita do, tu hita sude na mangolu sadari on. 4 Langsung* do Jahowa makkatai dohot hamu di dolok i sian bagasan api.+ 5 Jala au do na jongjong di holang-kolangmuna dohot Jahowa,+ lao pasahatton hata ni Jahowa tu hamu. Ai mabiar do hamu tu api i, jala dang olo hamu nakkok tu dolok i.+ Didok Ibana ma,

6 “‘Au do Jahowa Debatamuna, na mamboan hamu kaluar sian Mesir ingananmuna gabe hatoban.*+ 7 Holan Au do na ikkon disomba hamu. Dang boi hamu manomba debata na asing.*+

8 “‘Unang bahen hamu patung,*+ manang gambar na suman tu manang aha pe na adong di langit, di tano on, manang na adong di aek di toru ni tano on. 9 Unang marsomba hamu tu sudena i. Unang tubu di roham lao manomba i.+ Ai Au do Jahowa Debatamuna. Hupangido do tu hamu asa holan Au Debata na disomba hamu.*+ Ai molo adong na marsogo ni roha tu Au, pasombuonku ma anakna, pahoppuna, dohot ninina manaon hasusaan alani dosana i.+ 10 Alai tu akka halak na patuduhon holong tu Au jala na mangulahon parettakku, patuduokku do holong* tu ibana sahat tu marribu-ribu sundutna.*

11 “‘Unang ma sembarangan mamakke goar ni Jahowa Debatamuna.+ Ai dihukum Jahowa do manang ise pe na sembarangan mamakke goar ni Debata.+

12 “‘Ikkon dirayahon hamu do ari Sabat asa toktong i badia, songon na diparettahon Jahowa Debatamuna tu hamu.+ 13 Boi do hamu karejo saleleng onom ari.+ 14 Alai di ari papituhon, i ma ari Sabat tu Jahowa Debatamuna,+ dang boi hamu karejo.+ Songon i nang ianakkonmuna, hatobanmuna, lombumuna, halodemuna, akka binatang na dipiaro hamu, dohot akka panoppang na tinggal di kotamuna.*+ Molo dibahen hamu songon i, boi ma hatobanmuna maradi songon hamu.+ 15 Ingot hamu ma, najolo gabe hatoban do hamu di Mesir. Diboan Jahowa Debatamuna i do hamu marhite hagogoonna na tung massai balga i.+ Alani i do disuru Jahowa Debatamuna i hamu mangarayahon ari Sabat.

16 “‘Pasangap ma omakmu dohot bapakmu,+ songon na diparettahon Jahowa Debatamuna tu hamu, asa leleng hamu mangolu, jala denggan ngolumuna di luat na nilehon ni Jahowa Debatamuna tu hamu.+

17 “‘Unang hamu mambunu.+

18 “‘Unang hamu mangalakkup.+

19 “‘Unang hamu manakko.+

20 “‘Unang hatahon na so tutu taringot donganmu.+

21 “‘Unang tubu di roham lao mambuat jabu ni donganmu. Unang tubu di roham lao mambuat istri ni donganmu,+ manang ladangna, hatobanna, lombuna, dohot halodena. Jala unang tubu di roham naeng mambuat manang aha pe na adong di donganmu.’+

22 “Dipaboa Jahowa do sude paretta i tu sude bangso on di dolok i. Gogo do soarana makkatai sian bagasan ni api, dohot sian ombun na hapal na massai holom situtu,+ jala dang adong be tamba ni i. Disuratton Ibana ma i tu dua batu panuratan i, jala dilehon Ibana ma i tu au.+

23 “Alai dung dibege hamu soara sian ombun na golap i tikki na galak api di dolok i,+ ro ma sude pamimpin sian ganup margamuna dohot akka pangituai* tu labbungku. 24 Didok hamu ma, ‘Nungnga dipatudu Jahowa Debatanta i be hamuliaonna dohot hasangaponna tu hita. Jala nungnga tabege soarana sian bagasan ni api i.+ Nungnga taida be sadari on boi do toktong mangolu jolma, nang pe naung makkatai ibana dohot Debata.+ 25 Alai dang olo hami mate alani api na balga na boi manutung hami. Molo ditangihon hami do torus soara ni Jahowa Debatanta i, pasti mate do hami. 26 Ai adong huroha jolma na asing na songon hita na mambege soara ni Debata sian api alai toktong mangolu? 27 Holan ho ma na lao tusi lao mambege sude hata na dipaboa Jahowa Debatanta i. Dung i, ho ma na paboahon tu hami sude na didok Jahowa Debatanta i. Ditangihon jala diulahon hami pe na nidokna i.’+

28 “Dibege Jahowa do sude na nidokmuna i. Didok Jahowa ma tu au, ‘Nungnga hubege be sude na nidok ni bangso i tu ho. Denggan do hata ni nasida i.+ 29 Molo toktong do mabiar roha ni nasida tu Au,+ jala dioloi nasida sude parettakku,+ denggan ma ngolu ni nasida dohot sude pinoppar ni nasida saleleng ni lelengna!+ 30 Saonari suru ma nasida mulak tu kemahna be. 31 Alai anggo ho, ikkon toktong do ho dison rap dohot Au, asa hupaboa tu ho sude paretta, patik, dohot aturan naung ditottuhon na ikkon ajarhononmu tu nasida. Ikkon ulahonon ni nasida do sudena i di luat na lao hulehon i tu nasida.’ 32 Ikkon manat do hamu mamparrohahon sudena i jala mangulahon i songon na diparettahon Jahowa Debatamuna tu hamu.+ Unang manirpang hamu tu kanan manang tu kiri.+ 33 Ikkon diihutton hamu do sude dalan na diparettahon Jahowa tu hamu,+ asa mangolu hamu, denggan ngolumuna, jala leleng hamu mangolu di luat na lao buatonmuna i gabe appunamuna.+