4 Musa
12 Dibuat si Musa do boru ni halak Kus gabe istrina.+ Alani i mulai ma diprotes si Miryam dohot si Aron ibana. 2 Didok nasida do, “Ai holan marhite si Musa huroha Jahowa makkatai? Marhite hita pe, makkatai do Ibana!”+ Jala dibege Jahowa do hata ni nasida i.+ 3 Si Musa do bawa na ullambok rohana* di tano on. Dang adong halak na songon ibana lambokna.+
4 Toppu ma makkatai Jahowa tu si Musa, tu si Aron, dohot tu si Miryam. Didok ma, “Ro ma hamu na tolu tu kemah parpunguan.” Dung i, lao ma nasida na tolu tusi. 5 Ro ma Jahowa di bagasan ombun+ jala jongjong di jolo ni pintu kemah parpunguan i. Dijou ibana ma si Aron dohot si Miryam, jala dipajonok nasida na dua ma. 6 Didok Ibana ma, “Tangihon hamu ma hatakkon. Molo adong di tonga-tongamuna sahalak panurirang* ni Jahowa, paboaokku do tu ibana ise Au marhite parnidaan.+ Jala makkatai do Au tu ibana marhite nipi.+ 7 Alai dang songon i hubahen tu si Musa naposokki. Nungnga hupasahat be sude bangsokki* tu ibana jala pos do rohakku tu ibana.*+ 8 Au do na langsung* makkatai tu ibana.+ Takkas do Au makkatai tu ibana, jala dang adong na buni.* Jala Au sandiri, Jahowa pataridahon dirikku tu ibana. Alai boasa barani hamu mandok hata na roa taringot tu si Musa naposokki?”
9 Muruk situtu ma Jahowa tu nasida na dua, gabe ditinggalhon Ibana ma nasida. 10 Pinda ma ombun i sian kemah i, jala hona kusta* ma si Miryam, bottar ma kulitna songon salju.+ Diida si Aron ma tu si Miryam jala diida ma nungnga hona kusta+ be si Miryam. 11 Pittor didok si Aron ma tu si Musa, “Asi ma roham tuan! Unang ma pasombu hami dihukum alani dosanami on! Ulaon na oto do na hubahen hami i. 12 Unang ma pasombu ibana songon poso-poso na mate tikki ditubuhon, naung satonga busuk dagingna tikki tubu!” 13 Jou-jou ma si Musa tu Jahowa, ninna ma, “Ale Debata, asi ma roham! Tolong ma pamalum ibana!”+
14 Didok Jahowa ma tu si Musa, “Molo bapakna sandiri manijuri bohina, ikkon dipaila do ibana saleleng pitu ari, dang i? Alani i, papulik ma ibana sian halak na asing saleleng pitu ari di luar ni perkemahan.+ Dukkon i pe boi ibana mulak muse.” 15 Dipapulik ma si Miryam sian halak na asing saleleng pitu ari di luar ni perkemahan.+ Jala saleleng dang mulak si Miryam, dang borhat halak Israel manang na tudia pe. 16 Dung i, borhat ma halak Israel sian Hazerot,+ jala markemah ma nasida di Gurun Elaparan.+