Habakuk
3 Songon on ma tangiang ni Panurirang* Habakuk na dibahen di ende andung-andung:
2 Ale Jahowa, nungnga hubege be taringot tu na binahenmu.
Ale Jahowa, longang do rohakku tu akka na binahenmi.
Bahen ma muse songon i di tikkinami on!*
Bahen ma muse akka ulaon na palongang roha di tikkinami on.*
Molo masa hasusaan i, unang ma lupa Ho lao patuduhon asi ni roham.+
Hasangaponmi manutupi langit,+
Jala soara na mamuji Ho manggohi sude tano on.
4 Marsinondang do Ibana songon mataniari.+
Kaluar do sinondang sian tanganna na dua i,
Disi do buni hagogoonna i.
5 Mardalan do di jolom sahit na masa di godang inganan,+
Jala mangihut do sahit mohop sian pudim.
6 Molo jongjong Ibana, humutur do tano on.+
Molo dibereng Ibana akka bangso, pittor humitir do nasida alani biarna.+
Dihancurhon do akka dolok naung adong sian najolo,
Jala masursur do dibahen akka dolok-dolok naung adong sian tikki naung salpu.+
Mardalan do Ibana di dalan naung adong sian najolo.
7 Huida do masa hasusaan di akka kemah ni halak Kusan,*
Jala humutur akka kain kemah na di luat ni Midian.+
8 Ale Jahowa, na marsigorgor do rimasmu tu akka sunge?
Na muruk do Ho tu nasida?
Manang tikki hundul Ho di atas ni hodami,+
9 Nungnga dipakaluar panahmu, jala nungnga rade lao ditembakkon.
Nungnga rade be tukkot* lao dipakke mangihutton isi ni sumpami. (Sela)
Dibahen Ho do akka sunge mambola tano on.
10 Haccitan do akka dolok tikki diida Ho.+
Doras do udan turun sian langit,
Marsasak do aek na di toru ni tano,+
Jala diangkat do tanganna* timbo tu ginjang.
11 Dang mardalan be mataniari dohot bulan di langit.+
Songon cahaya do anak panahmu tikki ditembakkon.+
Jala marhillong situtu do tombakmu.*
12 Mardongan muruk do Ho mandalani tano on.
Mardongan rimas do Ho mandege-dege akka bangso.
13 Kaluar do Ho lao paluahon bangsom, lao paluahon halak na pinillitmu.
Diropukkon Ho do pamimpin na sian jabu ni parjahat.
Dihancurhon Ho do jabu i mulai sian fondasina sahat tu atapna. (Sela)
14 Dipakke Ho do sinjatana* lao manullang ulu ni akka tentarana,
Ro do nasida songon haba-haba lao mambahen hami marserak.
Las do roha ni nasida sipsip lao pamatehon akka halak na susa.
15 Dipakke ho do akka hodami lao mangalewati laut,
Lao mamolus laut na massai bidang jala na margalumbang.
Gale ma holi-holikku,+
Hitir-hitir ma pattu.
Alai tenang do au paimahon ari hasusaan i,+
Ari na lao masa tu akka bangso na ro mangalo hami.
17 Nang pe dang marbunga be hau ara,
Jala dang marparbue be hau anggur,
Nang pe dang boi be dipanen hau jetun,
Jala dang tubu be suan-suanan di ladang,
Nang pe mago hambing dohot biru-biru sian kandangna,
Jala dang adong nanggo sada pe lombu di kandang,
18 Alai anggo au, toktong do au marlas ni roha alani Jahowa.
Marlas ni roha do au alani Debata Sipalua au.+
19 Jahowa Tuan Natumimbul i do Silehon gogo di au,+
Dibahen Ibana do pattu songon pat ni rusa,
Asa boi au mardalan di dolok-dolok.+
Tu akka pamimpin ni parende: Diiringi akka alat musikku na martali.